Yoop

1 Im lant fon Us, hat een man kewoont woo Yoop keheest hat. Tee waar unxultich un ufrichtich; tee hat tiife respekt tsu Kot un hat sich wech kehal fon ale xlechtes. 2 Tee hat siwe soone un tray meet. 3 Tee hat 7.000 xeef, 3.000 kamele, 1.000 okse un 500 esel; tee hat aach fiil tiiner. Soo waar tee te kreeste fon ale woo im oryent kewoont hon. 4 Yeete soon, in sayn ap kexprochne taach, hot in sayn haus een kroos ese kemacht, ... 6 Te taach is khom woo te woere Kot sayn soone khom sin fer sich foer Yeehoowa xtele, un Satanaas waar aach unich tëne kewees. 7 Tan hot Yeehoowa Satanaas kefroot: “Fon woo khomst tuu heyer?” Satanaas hot tsu Yeehoowa keantwort: “Ich sin uf ti eyert iweraal torich kang un tat rom kelaaft.” 8 Un Yeehoowa hot fer Satanaas kesaat: “Host tuu mayne tiiner Yoop peopacht? Es kept nimant woo eenlich is wii eyer uf te eyert. Tee is eene unxultiche un kerechte man woo Kot tiif respektiirt un woo niks xlechtes aan nëmt.” 9 Too, hot Satanaas fer Yeehoowa keantwort: “Meecht Yoop Kot umsonst aan heere? 10 Host tuu net een tsaun um tëm, um sayn haus un um ales was eyer hot, ketuun? Tuu host ales was eyer kemacht hot, keseechent, un sayn kans fii tuut sich iwer ti kans eyert aus prayte. 11 Awer yets, xtrek tayn hant aus un tref ales was eyer hot, un es is sicher tas eyer tich in tayn aychne kesicht ferfluucht.” 12 Tan hot Yeehoowa fer Satanaas kesaat: “Kuk! Ales was eyer hot, is in tayn hant. Awer xtrek net tayn hant aus keeche tëm!” Too is Satanaas foer Yeehoowa wech kang. 13 Tan, am taach woo sayn soone un meet im haus fon iire elste pruuter waare fer ese un trinke, 14 is een pexeetsman khom un saat tsu Yoop: “Ti okse waare am tsakere un ti esel hon neewich tëne kekraast, 15 wii ti sapeer uf mool khom sin un hon se wech kenom, tii hon aach tayn tiiner mit ti xwaart toot kemacht. Ich sin te eensliche woo aus keris is fer tich tas fertseele.” 16 Wii tee noch am xpreche waar khomt een anere un saat: “Fayer fon Kot is fom himel khom un hot ti xeef un ti tiiner fernicht. Ich sin te eensliche woo aus keris is fer tich tas fertseele.” 17 Wii tee kraat am tas fertseele waar, khomt een anere un saat: “Ti kaltëer hon sich in tray krup in kericht un hon ti kamele wech kenom, tii hon aach tayn tiiner mit ti xwaart toot kemacht. Ich sin te eensliche woo aus keris is fer tich tas fertseele.” 18 Wii tee noch am xpreche waar, khomt noch een anere un saat: “Tayn soone un meet waare pay iire elste pruuter am ese un trinke. 19 Uf mool, is een xtarke wint khom ausm tesërt un hot ti fier eke fom haus ketrof un tas is uf ti yunge kefal un tii sin ale toot. Ich sin te eensliche woo aus keris is fer tich tas fertseele.” 20 Tan hot Yoop sich uf kextelt, hot sayn tsaych feris un ti hoer fom kop ap kexrapt: tan is tee uf te pootem kefal, sich kepoo, un 21 kesaat: Nakich sin ich fon mayn muter sayn layp khom un nakich wëre ich tsurik keen. Yeehoowa hots kep un Yeehoowa hots wech kenom. Tas Yeehoowa sayn naame sol wayter keloopt sin.” 22 In tas ales, hot Yoop net kesint orer kesaat tas Kot was ferkheertes kemacht hat.