1te Yoohan

3 Kuk mool wii kroos is te Fater sayn liip tsu uns — soo kroos tas mer Kot sayn khiner kenënt sin! Un tas is was mer sin. Tes weeche tuut ti welt uns net khëne, wayl tii hot tëm net khëne kelërnt. 2 Keliipte, yets sin mer Kot sayn khiner, awer es waar noch net ketsaycht was mer sin wëre. Meyer wise tas, wën eyer taytlich ketsaycht wërt, wëre mer soo wii tee, wayl meyer tëm siin tuun soo wii eyer is. 8 Yeete eene woo ti sint macht xtamt fon tëm Taywel heyer, wayl te Taywel fom aanfang aan sint macht. Mit tiise tswek is Kot sayn Soon khom: fer te Taywel sayn aarwayt se fermache. 10 Too traan wise meyer weer Kot sayn khiner sin un weer tëm Taywel sayn khiner sin: yeeter woo tas kerëchte nët macht, khomt net fon Kot, aach net tee woo sayn pruuter net liipt. 11 Wayl tas is ti nooricht woo teyer fon aanfang aan keheert hot: meyer mise eene te anere liipe, 12 net soo wii Kayn, woo fom Xlechte khom is un sayn pruuter um keprung hot. Un warom hot eyer tee um keprung? Wayl sayn aktsyoone xlecht waare, awer sayn pruuter sayns, waare kerecht. 15 Yeete eene woo sayn pruuter hast is wii yemant woo anere um pringt, un teyer wist tas nimant woo anere um pringt, eewiches leepe hot. 16 Torich tas hon mer ti liip khëne kelërnt: Yeesus hot sayn leepe fer uns ap kep, un es is unser flicht unser leepe fer unser priiter ap kepe. 17 Awer, wën yemant ti materyaalixe tinge fon tiise welt hot un siit tas sayn pruuter in noot is, un noch soo halt sich tsurik tëm mitlayt tsayche, wii khan Kot sayn liip uf tëm plaype? 18 Khinerche, mer sole net ploos mit wërter liipe, awer mit aktsyoone un eerlichkheet. 19 Torich tas wise mer tas mer fon te woerheet sin un tuun mer unser hërts foer tëm peruyche 20 imer wën unser hërts macht tas mer uns xultich xpiire, wayl Kot kreeser wii unser hërts is un tuut ales wise. 23 Yaa, tas is sayn kepoot: meyer sole aan tëm naame fon sayn soon Yeesus Kristus klaape un eene te anere liipe, soo wii eyer uns tas kepoot kep hot.