1te Korinter

8 Yets, iwer tas esmitel woo fer anere keeter aan kepoot sin: meyer wise tas meyer al khëntnis hon. Ti khëntnis macht tas te mënx fol mit hoochmuut playpt, awer ti liip tuut uf muute. 2 Wën yemant tënkt tas se etwas khëne tuut, tuut se nët khëne wii se solt khëne. 3 Awer, wën yemant Kot liipe tuut, is tee fon Tëm kekhënt. 4 Iwer esmitel ese woo fer anere keeter aan kepoot sin, meyer wise tas een falx kot niks in te welt is, un tas es kept khee aner Kot, ploos eens. 5 Wayl, opwool kepts tii woo wii keeter kenënt sin im himel un aach uf ti eyert, soo aach kepts fiile “keeter” un fiile “hëre”, 6 awer fer uns këpts wërklich ploos een Kot, te Fater, fon wëm tuut ales khome, un mëyer tuun fer tëm eksistiire; un këpts ploos een Hër, Yeesus Kristus, torich wëm is ales kemacht këp, un mëyer tuun torich tëm eksistiire. 7 Awer net al hon tiise khëntnis. Awer etliche, woo mit te anere keeter traan keweent waare, tuun tas esmitel ese wii een opfer fer anere keeter, un tëne sayn kewise, woo xwach is, wërt petreft. 8 Awer tas ësmitel tuut uns nët ticht pay Kot pringe; mëyer tuun nët xlëchter wëre wën mer nët ëse tuun, un nët pëser wëre wën mer tas ëse. 9 Awer phast uf tas ayre recht fer raus suuche nii een xtolpere xteen wërt fer tii woo xwach sin. 10 Wole mer saan tas yemant tich siit — tuu woo khëntnis host — etwas ese im thempel fon een falxe kot. Meecht tas net tas kewise fom xwache man influentsiire fer se ese was tsu anere keeter aan kepoot waar? 11 Soo, torich tas khëntnis woos tuu host, pringst tuu xaate fer tee woo xwach is, tayn pruuter fer weem Kristus kextorep is. 12 Wën tëyer soo sorte sinte keeche ayre priiter macht, un tuut tëne sayn xwache kewise petrëfe, tuut tëyer sinte keeche Kristus mache. 13 Es is weeche tas woo, wën tas esmitel mayn pruuter xtolpere mache tuut, tuun ich khee sort flayx mee ese, tas ich net mayn pruuter xtolpere mache.