Apokalipsis

16 Tan, hon ich een hart xtim keheert fom hayliche plats heer khome un tii hot fer ti siwe ëngele kesaat: “Keet un tuut ti siwe xisele fon Kot sayn wuut iwer ti ëyert aus xite.” 2 Te ëyerste is kang un hot sayn xisel iwer ti Ëyert aus kexut. Un een xlecht kexwiier woo xaate macht, hot ti layt woo ti mark fom wilt tier un woo tëm sayn pilt aan kepeet hon, petrof. 3 Te tsweete hot sayn xisel ins meer aus kexut. Un tas meer is wii tas pluut kep fon yemant woo toot is, un yeete leepëntiche kriatuere woo im meer waar, is kextorep. 4 Te trite hot sayn xisel in te fluse un in te waser kwele aus kexut. Un tii sin wii pluut kep. 5 Ich hon te ëngel, woo ti responsapiliteet iwer tas waser hat, keheert saan: “Tuu, Tee woo is, un woo waar, tee woo Leaal is, tuu pist kerechtich, wayls tuu tiise kerichte in kextelt host, 6 wayl tii hon tas pluut fon te haylicher un fon te profeete aus kexut, un tuu host pluut kep fer tëne trinke; wayl tas is was tii fertiine.” 7 Un ich hon te altar keheert saan: “Yaa, Yeehoowa Kot, te Ale Mechtiche, woere un kerechtich sin tayn kerichte.” 8 Te fierte hot sayn xisel iwer ti sun aus kexut. Un es is fer ti sun erlaupt ti layt mit fayer ferprëne. 9 Ti layt sin tan mit te xtarek hits ferprënt kep, awer noch soo hon se Kot sayn naame pelayticht, Tee woo ti autoriteet iwer tiise phëste hot, un tii hon sich net peroyt un aach net ti hërlichkheet fer Tëm kep. 10 Te finefte hot sayn xisel iwer te troon fon tëm wilt tier aus kexut. Un tëm sayn raych is in tunkelheet keplip, un ti layt hon aan kefang uf iire tsunge payse fon phayn, 11 awer tii hon te Kot fom himel pelayticht, weeche tëne iire phayn un kexwiire, un tii hon sich net weeche sayn aarwayte peroyt. 12 Te sekste ëngel hot sayn xisel iwer te kroos Eufrates flus aus kexut. Un tëm sayn waser is ketrokent kep, tas es een weech in kericht wërt fer ti kheeniche fom ufkang fon te sun. 13 Un ich hon tray unrayn inxpiriirte pekhantmachunge kesiin, woo eenlich wii froxe sin, woo fom maul fom trakoon, fom wilt tier un fom falx profeet raus khom sin. 14 Tas sin, in wërklichkheet, pekhantmachunge woo fon temoone inxpiriirt sin un tuun sinaale tsayche. Tii keen tsu te kheeniche fon te kans pewoont eyert fer tii se samele fer te kriich fon tëm kroose taach fom Ale Mechtiche Kot. 15 “Heer: Ich tuun wii een xpitspuup khome. Froo is tee woo wachsam playpt un sayn tsaych mit sich halt, tas tee net nakich laaft un ti layt net fer tëm sayn xaam kuke tuun.” 16 Un tii hon se kesamelt uf tëm plats woo in hepreeyx Armaxeton heest. 21 Tan, sin ti kroose xloose, yeete eene mit unkefeer tas kewicht fon een talënt, fom himel iwer ti layt khom, un ti layt hon Kot pelayticht weeche tiise phëst, wayl tiise phëst waar aarich kroos.