Apokalipsis

17 Eene fon te siwe ëngele woo ti siwe xisele hate, is khom un hot meer kesaat: “Khom, ich tuun teer tas kericht iwer ti kroos huure fraa tsayche, woo tuut iwer fiil waser setse; 2 ti kheeniche fon te eyert hon seksuaal imoraaliteet mit tëne kemacht, un ti pewooner fon te eyert hon sich mim wayn fon iire seksuaal imoraliteet pesof kemacht.” ” 3 Tee hot mich in te macht fom kayst tsu een tesërt kenom. Un ich hon een fraa kesiin woo uf een roote wilt tier hokt un tas tier waar fol mit naame woo Kot pelaytiche tuun un hat siwe khep un tseen hëne. 4 Ti fraa waar aan ketsoo mit een tsaych woo lila plau un root waar un hat xmuke fon kolt, fayne xteen un phërle aan sich, un in tëne sayn hant waar een khelich fon kolt fol apxayliche tinge un unrayniche tinge fon sayn seksuaal imoraaliteet. 5 Aan sayn xtërn waar een naame kexrip, een kehaymnis: “Papiloon ti Kroos, ti muter fon te huure un fon te apxayliche tinge fon te eyert.” 6 Ich hon kesiin tas ti fraa pesof waar mim pluut fon te haylicher un mim pluut fon Yeesus sayn tsayer. Wën ich tii kesiin hon, hon ich mich ferwunert. 7 Soo, hot te ëngel mich kesaat: “Warom host tuu tich ferwunert? Ich tuun fer tich tas kehaymnis saan fon te fraa un fon tëm wilt tier woo tii traan tuut un woo siwe khep un tseen hëne hot: 8 Tas wilt tier woos tuu kesiin host, waar, awer is net mee, awer tuut klaych fom tiife loch ruf khome un tuut tsu te fernichtung keen. Un ti pewooner fon te eyert (tii woo tsayt te aanfang fon te welt net sayn naame im puuch fom leepe kexrip kriit hon), tuun sich ferwunere wën se siin tas tas wilt tier waar, awer is net mee, awer wërt sin. 9 “Fer tas is es neetich een kluuch ferxtant hon: ti siwe khep tuun siwe përiche petayte un ti fraa sitst uf tëne. 10 Un es kept 7 kheeniche: 5 sin xon um kefal, eene is, un te aner is noch net khom, awer, wën eyer khome tuut, tuut eyer ploos pisye tsayt plaype. 11 Un tas wilt tier woo waar, awer woo net is, is aach een 8te kheenich; tas khomt fon te 7 kheeniche, un tuut tsu te fernichtung keen. 12 “Ti 10 hëner woos tuu kesiin host, petayte 10 kheeniche. Tii hon noch net een raych kriit; awer, tii kriin autoriteet wii kheeniche torich een xtun, mit tëm wilte tier. 13 Tii hon ploos een ketanke; un soo, kepe se sayn macht un autoriteet tsum wilte tier. 14 Tii tuun keeche tas Lam khëmpfe; awer wayl tee is Hër fon te hëre un Kheenich fon te kheeniche, tuut tas Lam tëne ap kewine. Un tii woo mit tëm sin, ti troye woo keruuft un raus kesuucht kep sin, tuun aach kewine.” 15 Tee hot mich kesaat: “Tas waser woos tuu kesiin host, woo ti huure fraa setst, petayte folke, kroose krupe layt, natsyoone un xprooche. 16 Ti tseen hërne woos tuu kesiin host un tas wilt tier tuun ti huure fraa hase; un tuun ale sayn tings xteele un tuun se nakich lose, tuun sayn flayx ese un tuun se kans im fayer ferprëne. 17 Wayl Kot hot in tëne sayn hërts te wunx ketuun tas se tëm sayn ketanke aus fiire teete, yaa, fer tëne sayne eensiche ketanke aus fiire, un soo, tas raych woo se hon fer tas wilte tier kepe, pis Kot sayn wërter sich erfiile tuun. 18 Ti fraa woos tuu kesiin host, simpolisiirt ti kroos xtaat woo een raych iwich ti kheeniche fon te eyert hot.”