Xeenesis

39 Yoosef is runer noo am Ejipt kenom woer, un een ejipter woo Potifaar keheest hot, woo ofitseer fom Faraoo sayn palas un te haupster fon te wachter waar, hot Yoosef fon te ismaeliter, woo tee tat hin kenom hate, ap kekhaaft. 2 Awer Yeehoowa waar mit Yoosef. Tes weeche, hot eyer ales kuut fërtich keprung un hat tas haus fon sayn hër, te ejipter, iwer sich kehat. 3 Un sayn hër hot kemërkt tas Yeehoowa mit tëm waar un tas Yeehoowa Yoosef keholef hot in ales was eyer kemacht hot. 4 Yoosef is fon tëm kuut aan kesiin woer un is sayn perseenliche tiiner kep. Soo hot Potifaar sayn haus un ale sayn tinge unich sayn responsapiliteet kelos. 5 Fon te tsayt aan faart, woo te ejipter sayn haus un ales was tëm waar, fer tee iwer kep hot, hot Yeehoowa, weeche Yoosef, tëm ejipter sayn haus keseechent. Yeehoowa sayn seechen waar iwer ales was tee im haus un ufm khamp hat. 6 Soo hot Potifaar ales was sayns waar, fer Yoosef iwer kep fer uf se phase un hot sich mit niks ketanke kemacht, ploos mit was eyer ese teet. Un Yoosef is aach xeen un xtark kewoer. 7 Een tsayt tëm noo, hot ti fraa fon sayn hër aan kefang noo Yoosef se kuke un se saan: “Lee tich mit meer.” 8 Awer tee hot tas net aan kenom un hot fer ti fraa fon sayn hër kesaat: “Mayn hër wees net was mit meer in sayn haus is, un ales was tëm keheert, hot eyer meer iwer kep fer uf se phase. 9 Es kept nimant in tëm haus kreeser wii ich, un tee hot meer kraat niks ferpoot, ploos tuu, wayls tuu tëm sayn fraa pist. Tes weeche, wii khent ich soo een kroos xlechtichkheet mache un keeche Kot sinte?” 10 Un soo, taach aan taach, hot se Yoosef aan kexproch, awer tee hot nii aan kenom sich pay tii se leye un aach net pay tii se plaype. 11 Awer, eene taach, wii tee ins haus khom is fer sayn aarwayt se mache, waar khee tiiner tat im haus keweest. 12 Too, hot se tee aans tsaych kekralt un saat: “Lee tich mit meer!” Awer tee hot sayn tsaych in iire hënt kelos, un is raus kexprung. 13 Wii se kesiin hot tas tee tas tsaych in sayn hënt kelos hat un is raus kexprung, 14 hot se aan kefang se xraaye un hot fer ti mëner fon sayn haus kesaat: “Kukt! Te hepreeyx, woo mayn man uns keprung hot, wil fon uns xpote. Tee hot fersuucht sich mit meer leye. Awer ich hon aan kefang se xraaye soo hart wii ich khont. 15 Wii tee mich xraaye keheert hot, hot tee sayn tsaych neewe mich laye kelos un is raus kexprung.” 16 Noo tëm, hot se tëm sayn tsaych neewe sich laye kelos pis tëm sayn hër hëm khom is. 17 Too, hot se tas selwiche fer tee kesaat: “Tee hepreeyxe tiiner woos tuu keprung host, is mich suuche khom fer fon meer se xpote. 18 Awer, wii ich aan kefang hon se xraaye, hot tee sayn tsaych neewe mich laye kelos un is raus kexprung.” 19 Wii sayn hër ti wërter fon sayn fraa keheert hot: “Tas is tas woo tayn tiine meer kemacht hot”, too, is tee wuutich kep. 20 Too hot Yoosef sayn hër tee kehool un hot tee in ti katee ap kep, tas plats woo ti kefangne fom kheenich inkexpërt keplip sin, un tee is wayter in te katee keplip. 21 Awer Yeehoowa waar wayter mit Yoosef kewees un hot tëm leaale liip ketsaycht, un hot kemacht tas eyer foer ti aue fon tëm xëf fon te katee, kuut aan kesiin weyer. 22 Soo hot te xëf fon te katee Yoosef aan kextelt iwer tii al woo tat inkexpërt waare un tee hot iwer ales was tat kemacht kep waar, triwer kexikt. 23 Te xëf fon te katee hot sich mit kaar niks ketanke kemacht iwer was Yoosef uf kephast hot, wayl Yeehoowa mit Yoosef waar un Yeehoowa hot tëm keholef in ales was eyer kemacht hot.