Xeenesis

2 Tas is Yaakop sayn kexicht. Wii te yung Yoosef 17 yoore alt waar, waar tee ti xeef am uf phase mit Piila sayn soone un Silpa sayn soone, fraae fon sayn fater. Un Yoosef hot een xlecht kexicht iwer tii fer sayn fater fertseelt. 3 Israël hot Yoosef mee wii sayn anere khiner keliipt, wayl tas te soon fon sayn altheet waar; un hot tëm een ekstra mantel mache kelos. 4 Wii sayn priiter kesiin hon tas sayn fater tee mee keliipt hot, wii sayn priiter al, too hon se aan kefang tee se hase un khonte net mee friitlich mit tëm xpreche. 5 Xpeeter hin, hot Yoosef een traam kehat un hot tee fer sayn priiter fertseelt, un tas waar noch mool een uersach fer tee se hase. 6 Tee hot fer tii kesaat: “Pite, heert te traam woo ich hat. 7 Meyer waare im mite khamp un hon mer lëst kepun un too, hot mayn last sich uf kextelt un is xteen keplip un ayere lëst sin um tëm rom kang un hon sich foer mayn last kepoo.” 8 Sayn priiter hon fer tee kesaat: “Tuust tuu tich wërklich iwer uns als kheenich mache un iwer uns rechiire?” Soo, weeche sayn treem un iwer was tee kesaat hot, hon se tee noch mee kehast. 9 Noo tëm, hat Yoosef noch een traam kehat un hot tee fer sayn priiter fertseelt: “Ich hon noch een traam kehat. Awer yets, hon ti sun, te moont un 11 xtërne sich foer mich kepoo.” 10 Too, hot tee tas fer sayn fater kesaat un aach fer sayn priiter, un sayn fater hot tee kexteert un saat: “Was petayt tee traam woos tuu hast? Meecht ich un aach tayn muter un tayn priiter khome un sich pis uf te pootem foer tich piie sole?” 11 Sayn priiter waare ayfersichtich fon tëm kep, awer sayn fater hot tas woo tee kesaat hot in te ketanke pehal. 18 Tii hon tee fon wayt aan kesiin un, eep eyer ticht khom is, hon se aan kefang pleen se mache fer tee um se pringe. 19 Too, hot eene fer te anere kesaat: “Kukt! Tat khomt tee treemer. 20 Yets is ti tsayt! Wole mer tee um pringe un too in een sistërne rin xmayse, un saan tas een wilt tier tee kefrest hët. Wole mer tan siin was mit tëm sayn treem pasiire tuun.” 21 Wii Rupen tas keheert hot, wolt eyer tee fon tëne rete, un saat: “Wole mer tee net um pringe.” 22 Rupen hot fer tii kesaat: “Tuut khee pluut aus xite. Tuut tee too im tesërt in tiise sistërn rin xmayse, awer tuut tee net wee mache.” Sayn opjetiiw waar tee fon tëne rete fer tsu sayn fater tsurik se kepe. 23 Soo, wii Yoosef khom is, hon sayn priiter tëm sayn mantel aus ketuun, ti ekstra mantel woo tee aan hat, 24 un hon se tee kefang un in ti sistërn rin kexmis. In tëne tsayt, waar ti sistërn leyer; waar khee waser trin. 25 Too, hon se sich kesetst fer se ese. Wii se in ti hee kekukt hon, hon se een krup fon ismaeliter kesiin woo fon Xileat kereest khom sin. Tëne sayn khameele hate resiin fon laatano, palsam un xaal fon een resiiniche paam kelaat, un tii sin runer noo am Ejipt kereest. 26 Yutaa saat tan fer sayn priiter: “Was teete mer fertiine wën mer unser pruuter um pringe teete un sayn pluut tsu xëte? 27 Wole mer tee fer ti ismaeliter ferkhaafe, awer wole mer tëm khee xaate mache. Wayl tee unser pruuter, unser flayx is.” Too, hon se sayn pruuter aan keheert. 28 Un, wii ti mityaniiter kexëfts mëner torich kang sin, too hon Yoosef sayn priiter tee fon te sistërn raus ketsoo un hon tee fer tswansich xtike silper fer ti ismaeliter ferkhaaft. Tiise mëner hon Yoosef fer te Ejipt kenom. 29 Xpeeter hin, wii Rupen tsurik aan ti sistërn kang is, un kesiin hot tas sayn pruuter net mee tat trin waar, hot tee sayn tsaych feris. 30 Wii tee tsurik pay sayn priiter khom is, saat eyer: “Te puup is ferxwun! Un ich — was mach ich yets?” 31 Too, hon se Yoosef sayn mantel kehool, een kaprite pok kaput kemacht un hon ti mantel in tas pluut rin kethunkt. 32 Nochter, hon se ti ekstra mantel fer sayn fater kexikt mit tiise pexeet: “Meyer hon tas kefun. Unersuuch, pite, op tas ti mantel fon tayn soon is orer net.” 33 Tee hot se unersuucht un saat: “Tas is ti mantel fon mayn soon! Een wilt tier hot tee woerxaynlich kefrest! Yoosef is mool sicher aus naner keris kep!” 34 Too, hot Yaakop sayn tsaych feris un hot een sak lumpe um te layp ketuun un hot torich fiil taache trauer weeche sayn soon kehal. 35 Sayn soone un sayn meete al hon fersuucht tee treeste, awer tee wolt net ketreest kep sin un saat: “In prile fer mayn soon, keen ich ins Kraap!” Un tee hot wayter weeche sayn soon keprilt. 36 In tee tsayt, hon ti mityaniiter Yoosef im Ejipt fer Potifaar ferkhaaft, ofitseer fom Faraoo sayn palas un te haupster fon te wachter.