1te Timoteus

4 Awer, tas inxpiriirt wort saat taytlich tas in te tsukhunft, tuun ëtliche fom klaape sich ap lënke, un tuun acht këpe fer inxpiriirte wërter woo hiner keen un fer inlërnunge fon te taywele, 2 torich ti falxheet fon te mëner woo liieray xprëche woo wii een hays ayse mark in sayn kewise hon. 3 Tii ferpiite ti hayrat un xike tas se sich wëch hale fom ësmitel woo Kot kemacht hot tas es mit tankpar ketiint wërt fon tii woo klaape hon un ti woerheet kenau khëne. 4 Wayl, ales was Kot kemacht hot is kuut un niks sol uf ti sayt kelos wëre woo mit tankpar aan kenom is, 5 wayl is kehaylicht këp torich Kot sayn wort un torichs kepeet. 6 Wëns tuu tiise aanreete fer ti priiter këpst, tuust tuu eene kuute tiiner fon Yeesus Kristus* wëre, kextërekt mit wërter fon klaape un fon te kuut inlërnung woos tuu troy noo keen tuust. Lit: Kristus Yeesus 7 Awer xtos ap ti falxe kexichte woo keen keeche was haylich is, soo wii ti kexichte woo ti alte fraae fertseele. Xtats tas, iip tich fer se leepe soo wii Kot es wil. Tas sol tayn tsiil sin. 8 Wayl te khërper iipe, pringt etwas kuutes, awer fer Kot tiine, is nutslich fer ale tinge, wayl tas erlaupt tas ti layt ti seechen kriin woo Kot ferxproch hot ins leepe hayt se taach un aach ins leepe woo khome tuut. 9 Tiise orientiirung is troy un fertiint tas se al tii aan nëme tuun. 10 Tes weeche, tuun mer xtram xafe un uns aan xtrenge; wayl meyer hon unser hofnung uf een lepeentiche Kot kextelt, woo te Reter fon ale sorte layt is, hauptseechlich tii woo troy sin. 11 Tuu wayter tiise orientiirunge këpe un tii in se lërne. 12 Los nii tas yemant tich niter xtelt wayls tuu yung pist. Xtats tas, say fer ti troye mënxe een payxpiil in te aat wiis tuu xprechst, wiis tuu tich aan xtelst, in te liip, im klaape, in moraalix raynheet. 13 Pis ich khome, tuu wayter tich aan xtrenge fer puuplix se leese, fer uf se muute, fer in se lërne. 14 Tuu net xlecht uf phase tas priwilëj woos tuu host, woos tuu torich een profetsii kriit host wën ti elteste khërperxaft tich in kesetst hot 15 Tuu aan tiise tinge triwer noo tenke; hal tich kans aan tiise tinge aan; soo wërts fer al taytlich tas tuu am foran keen pist. 16 Tuu wayter acht iwer tich selepst un iwer tayn inlërnung kepe. Tuu tich aan tiise tinge wayter hale, wayl wëns tuu tas machst, tuust tuu tich selepst un tii woo tich aan heere rete.