2te Kheeniche

5 Te kheenich fon Asiirya hot tas kans lant iwerfal; tee is tsu Samaria khom un hot sich tat torich tray yoore um rom kextelt. 6 Im noynte yoer fon Oseyas, hot te kheenich fon Asiirya Samaria ap kewun. Nochter, hot eyer tas folk fon Israël tsu Asiirya faart kenom. Tee hot kemacht tas se in Hala un Hapor, ticht pay te Kosan flus, woone teete un in te xtete fon te mëtos. 9 Ti israeliiter hon tinge kesuucht woo kaar net richtich foer Yeehoowa, sayn Kot, waare. Tii hon hayliche pletse in ale sayn xtete kepaut, fon te wachthorm pis ti xtete mit mauere. 10 Tii hon fer sich hayliche phayle un hayliche phoste uf kextelt uf ale hooche hiwele un unich yeete kriine paam; 11 un in ale hayliche pletse, hon se opfere ketëmpt soo wii ti natsyoone, woo Yeehoowa foer tëne faart kexikt hat, kemacht hate. Tii hon xlechte tinge kemacht fer Yeehoowa pelaytiche. 12 Tii hon wayter apxayliche keeter ketiint, opwool Yeehoowa tëne taytlich kesaat hot: “Teyer thërft tas net mache!” 13 Yeehoowa hot wayter Israël un Yutaa ërnst aan kereet torich sayn kanse profeete un sayn kanse witente, mit tiise wërter: “Lost noo uf ayre xlechte weeche keen! Heert mayn kepoote un mayn kesetse aan, tëm noo tas kans kesets woo ich fer ayre foerkhomer kexikt hon un woo ich fer aych torich mayn tiiner, ti profeete, pekhant kemacht hon.” 14 Awer tii hon tas net keheert un hon wayter sich tik khopich aan kextelt wii sayn foerkhomer, woo khee klaape aan Yeehoowa, sayne Kot, ketsaycht hate. 24 Tan hot te kheenich fon Asiirya layt fon Papiloon, Kuta, Awa, Hamat un Sefarwaym kepracht un hot se woone kemacht in te xtëte fon Samaria, uf ti israeliiter iire plats; tii hon sich hër kemacht iwich Samaria un hon in iire xtëte kewoont. 29 Awer, yeete natsyoon hot sayn aychne kot kemacht. Ti hon sayn keeter uf kextelt in te santuaarye fon te hayliche pletse woo ti samaritaaner kemacht hate; yeete natsyoon hot tas kemacht in te xtete woo se kewoont hon. 33 Soo, tii hon respekt tsu Yeehoowa ketsaycht, awer hon iire aychne Kote aan kepeet, tëm noo ti relichyoone fon te pletse woo se kepracht woer sin.