2te Yoohan
1 Te alte man, fer ti fraa woo raus kesuucht is un sayn khiner, woo ich wërklich liipe tuun — un net ploos ich, awer aach al woo ti woerheet khëne 2 weeche ti woerheet woo in uns is un woo fer imer in uns playpt. 3 Ti unfertiint kuutheet, ti parmhërtslichkheet un ti friit fon Kot, unser Fater, un fon Yeesus Kristus, Soon fom Fater, mit te woerheet un liip, tuun mit uns sin. 4 Ich sin aarich froo kep wën ich tsu wise kriit hon tas etliche fon tayne khiner in te woerheet keen, soo wii meyer tas kepoot fom Fater kriit hon. 5 Un yets, fraa, ich ferlange tas mëyer eene te anere liipe tuun. (Ich xraype aych net een nayes kepoot, awer eens woo mëyer fon aanfang aan hon.) 6 Un ti liip petayt tas: tas meyer wayter noo tëm sayn kepoote keen. Tas is tas kepoot, soo wii teyer fom aanfang aan keheert hot: teyer solt wayter in liip keen. 7 Wayl fiile hinerkeener hon sich uf ti welt ferprayt, tii woo net erkhëne tas Yeesus Kristus in flayx khom is. Tii tuun ti layt hiner keen un sin keeche Kristus. 8 Phast uf tas teyer net ferliirt was mer uns aan kextrengt hon fer se erayche, tas teyer ti komplët peloonung kriit. 9 Yeete eene woo keet iwer ti inlërnunge fon Kristus un net in tëne playpt, tuut net pay Kot plaype. Weer in tiise inlërnunge playpt, playpt paym Fater un aach paym Soon. 10 Wën yemant pay aych khomt un net tiise inlërnunge pringt, nëmt tee net in ayre haus aan un piit tëm aach net ti tsayt. 11 Wayl weer ti tsayt fer tëm piit, is mitxultich fon tëm sayn xlechte aarwayte. 12 Opwool ich fiil tings hon fer aych xraype, ich wil net tas mit papiier un thinte mache, awer ich hofe aych pesuuche khome un mit aych perseenlich xpreche, tas ayre frooheet komplët wërt. 13 Ti khiner fon tayn xwester, tii woo raus kesuucht is, xike kriise fer aych.