Lukas

7 Es is ti tsayt fon tëm Fest fom Proot oone Heep khom, woo se tas Oostre opfer opfere miste; 8 tan hot Yeesus Pheeter un Yoohan kexikt tas mache: “Keet un macht tas Oostre ese fërtich tas meyer es ese khene.” 9 Tii hon tëm kesaat: “Hër, woo wilst tuu tas meyer tas fërtich mache sole?” 10 Tee hot tëne kesaat: “Heert mool: Soo wii teyer in te xtat rin keet, een man mit een let kruuch waser tuut aych in keeche khome. Keet tëm noo in tas haus woo tee rin keet, 11 un saat fer te hër fom haus: ‘Te Leerer hot kexikt fer tich frooe: “Woo is tas pesuuch xtup tsimer, woo ich tas Oostre ese mit mayn tisipele ese khan?”’ 12 Un tee man tuut aych een kroos xtup tsimer, woo mopiliirt is, in tëm tsweet xtok fom haus tsayche. Macht tas Oostre ese tat fërtich fer uns.” 13 Tii sin tan kang, un hon ales soo kefun wii tee tëne kesaat hat, un hon tas Oostre ese fërtich kemacht. 14 Wii ti xtun khom is, hot eyer sich mit sayn aphostele aan tëm aan keleet. 15 Tee hot tëne kesaat: “Ich hat een kroose wunx fer tiise Oostre mit aych ese eep ich layte mus, 16 wayl ich saans aych: Ich tuun es net wiiter ese pis tas sich im Kot sayn Raych erfiilt.” 17 Un wii eyer een khelich kriit hot, hot eyer ketankt un kesaat: “Hoolt te khelich un kept tas eene fer ti anere ap, 18 wayl ich saans aych: Fon yets aan faart, tuun ich net mee fom traupe xtok sayn frucht trinke pis Kot sayn Raych khomt.” 19 Tee hot aach een proot kehool un ketankt. Too hot eyer es keproch un tëne kep, un hot kesaat: “Tas representiirt mayn khërper, woo fer aych kep wërt. Macht tas imer fer aan mich aan se tenke.” 20 Noo se ese, hot eyer aach tas selwiche mit tëm khelich kemacht, un hot kesaat: “Te khelich petayt te naye pakt woo torich mayn pluut kemacht wërt, woo fer aych aus kexut wërt. 21 Awer weest tas te tee woo mich hinerkeet, is mit mich am tix. 22 Yaa, te Mënxe Soon keet faart, tëm noo wiis foer raus kesaat kep is; awer ferfluucht is tee woo tëm hinerkeet!” 23 Soo, hon se aan kefang eene fer ti anere frooe, weer fon tëne teet tas wërklich mache. 24 Tan, hon se een xtark tsënkeray aan kefang iwich weer fon tëne te kreeste weyer. 25 Awer tee hot tëne kesaat: “Ti kheeniche fon te natsyoone tuun iwich tëne hërxe, un tii woo autoriteet iwer tëne hon, sin wii ‘ti kroose’ kenënt. 26 Awer mit aych, sol tas net soo sin. Xtats tas, te kreeste tswixich aych sol sich aan xtele wii wën tee te yingste weyer, un tee woo fiirt, wii tee woo petiint. 27 Weer is tan kreeser: tee woo am tix is orer tee woo petiint? Is es net tee woo am tix is? Awer ich sin tswixich aych als yemant woo petiint. 28 Awer, teyer sayt tii woo mit mich in mayn proope keplip sayt; 29 un ich mache mit aych een pakt fer een raych, soo wii mayne Fater es mit mich kemacht hot, 30 tas teyer mit mich am tix est un trinkt, in mayn Raych, un tas teyer aych uf troone setst fer ti tswelef xtëme fon Israël richte. 31 Simoon, Simoon, horich mool: Te Taywel hot ferlangt tas teyer al wii wayts kesiipt wëre solt. 32 Awer ich tuun weeche tich tsu Kot aan hale tas tayn klaape net ferxweecht; un wëns tuu tsurik khomst, ferxtërk tayn priiter.” 33 Tan hot tee tëm kesaat: “Hër, ich sin fërtich fer mit tich in kexpërt un soo kaar um keprung wëre.” 34 Awer, eyer hot kesaat: “Ich saans teer, Pheeter: Te haan tuut hayt net kreye eeps tuu tray mool ap saast tas tuu mich khënst.” 35 Tee hot tëne aach kesaat: “Wii ich aych kexikt hon oone kelt thax, oone leepensmitel sak un oone santaalye, meecht etwas aych kefeelt hon?” Tii hon keantwort: “Nee!” 36 Tan hot tee tëne kesaat: “Awer yets, weer een kelt thax hot, nëm se mit, un aach een leepensmitel sak; un weer khee xwaart hot, sol sayn mantel ferkhaafe un eene khaafe. 37 Wayl ich saans aych tas ales was kexrip kep is, erfiilt sich in mich: ‘Tee is mit te xlechte ketseelt kep.’ Yaa, tas tuut sich in mich erfiile.” 38 Tii hon tan kesaat: “Hër, meyer hon too hiir tswaay xwaarte.” Tee hot tëne keantwort: “Tas is kenuuch.” 39 Wii tee raus kang is, is tee, wii tee keweent waar, tsum Oliiwe Përich kang, un ti tisipele sin tëm aach noo kang. 40 Wii se tsum plats hin khom sin, hot tee tëne kesaat: “Tuut wayter peete, tas teyer net in fersuuchung falt.” 41 Un tee is fon tëne wech kang soo wayt wii ma een xteen xmayse khan. Tat, hot eyer sich kekniit un hot aan kefang se peete: 42 “Fater, wëns tuu wilst, tuu te khelich fon mich wech hoole. Awer es is tayn wile woo kemacht wëre sol, net mayns.” 43 Tan is een engel fom himel fer tee tsum foer xayn khom un hot tee kextërkt. 44 Awer tee is soo ëngstlich kep tas eyer noch tiifer kepeet hot; un tëm sayn xwits is wii pluut trope kep woo ufm pootem kefal sin. 45 Noo se peete, is eyer uf kextii un is pis ti tisipele kang. Tii waare am xloofe, kaput miit weeche ti traurichkheet. 46 Tee hot tëne kesaat: “Warom sayt teyer am xloofe? Xtayt uf un tuut wayter peete, tas teyer net in fersuuchung falt.” 47 Wii tee noch am xpreche waar, is een kroos folek khom, un te man woo Yuutas keheest hot, eene fon te Tswelef, hot tas folek kefiirt. Tee is ticht pay Yeesus khom fer tëm een khus kepe. 48 Awer Yeesus hot tëm kesaat: “Yuutas, tuust tuu te Mënxe Soon mit eene khus hinerkeen?” 49 Wii tii woo um tëm rom waare kesiin hon was pasiire teet, hon se kesaat: “Hër, sole meyer keeche tëne mit te xwaart keen?” 50 Eene fon tëne is soo kaar keeche te sklaaw fom hooche priister kang un hot tëm sayn rechte oer ap kehakt. 51 Awer Yeesus hot keantwort: “Yets xeeks!” Un eyer hot am sklaaw sayn oer kekrif un tee keheelt. 52 Yeesus hot tan fer ti haupste priister, fer ti soltaate fom thempel un fer ti elteste woo tat waare fer tëm fange, kesaat: “Sin ich een pantit, tas teyer keeche mich mit xwaart un knipele khom sayt? 53 Wii ich mit aych im thempel waar, taach noo taach, hot teyer net ti hënt keeche mich kehoop. Awer tas is ayer tsayt un ti tsayt woo ti tunkelheet rechiirt.” 54 Tan hon se tëm kefang un faart kenom noom haus fom hooche priister. Awer Pheeter is tëne fon wayt noo kang. 55 Wii se een fayer in te mite fom hoof aan kemacht hon un sich mitsamer hin kesetst hon, hot Pheeter sich mit tëne kesetst. 56 Awer een fraa woo tat kexaft hot, hot tee tat kesiin, foer tas fayer kesetst. Tii hot tëm kuut aan kekukt un kesaat: “Tiise man waar aach pay tëm kewees.” 57 Awer tee hot tas ap kesaat: “Fraa, ich khëne tee net.” 58 Khorts tsayt tëm noo, hot een aner persoon tee kesiin un saat: “Tuu pist aach eene fon tëne.” Awer Pheeter hot kesaat: “Nee, man, ich sin tas net.” 59 Un, unkefeer een xtun tëm noo, hot een aner man kesaat: “Tiise man waar sicher aach mit tëm kewees, wayl tee een kalileer is!” 60 Awer Pheeter hot kesaat: “Man, ich wees net was tuu am xpreche pist.” Un in tiise tsayt, wii tee noch am xpreche waar, hot een haan kekreet. 61 Too temit, hot te Hër sich rom ketreet un richt tsu Pheeter kekukt, un Pheeter hot sich erinert was te Hër tëm kesaat hat: “Hayt, eep te haan kreye tuut, tuust tuu mich tray mool ap saan.” 62 Tan is eyer faart kang un hot piterlich keprilt. 63 Ti mëner woo Yeesus in kexpërt kehal hon, hon tan aan kefang tëm ferxpote un ferxlaan; 64 un tan, noo se tëm sayn kesicht tsu ketekt hon, hon se kesaat: “Profetisiir! Weer hot tich ferxlaa?” 65 Un hon wayter xpoteray keeche tëm kemacht.