Yoop

2 Noo tas, is te taach khom woo te woere Kot sayn soone khom sin fer sich foer Yeehoowa xtele, un Satanaas waar aach unich tëne fer sich foer Yeehoowa xtele. 2 Tan hot Yeehoowa Satanaas kefroot: “Fon woo khomst tuu heyer?”Satanaas hot tsu Yeehoowa keantwort: “Ich sin uf ti eyert iweraal torich kang un tat rom kelaaft.” 3 Un Yeehoowa hot fer Satanaas kesaat: “Host tuu mayne tiiner Yoop peopacht? Es kept nimant woo eenlich is wii eyer uf te eyert. Tee is eene unxultiche un kerechtiche man woo Kot aan heere tuut un nëmt niks xlechtes aan. Tee halt sich fest aan sayn intekriteet, opwool tuu mich keeche iim xtele wilst, fer ich iim fernichte oone een uersach.” 4 Awer te Taywel hot fer Yeehoowa kesaat: “Haut fer haut. Een mënx tuut ales kepe fer sayn leepe se rete. 5 Awer yets, xtrek tayn hant aus un krayf tëm sayn knoche un flayx aan, un sicher tuut eyer tich foer tayn aychne kesicht ferfluuche.” 6 Tan hot Yeehoowa tsu Satanaas kesaat: “Tuu host tee in tayn hant. Awer nëm sayn leepe net wech.” 7 Soo is Satanaas foer Yeehoowa wech kang un hot kemacht tas iwich Yoop kexwiire aus keproch sin fon unich ti fiis pis ufm khop. 8 Yoop hot sich aan ex kesetst un hot aan kefang sich kratse mit een xtik fon een ferprochne leet waser. 9 Sayn fraa hot tsu iim kesaat: “Halst tuu tich noch fest aan tayn intekriteet? Ferfluuch Kot un xtërep!” 10 Awer tee hot keantwort: “Tuu xprechst wii een fraa oone ferxtant. Sole mer aan nëme fom woere Kot ploos was kuut is, un aach net was xlecht is?” In tas ales, hot Yoop mit sayn lipe net kesint.