Was khan tich helfe yeete woch xtutiire?
IS ES xweyer fer tich ti Piipel yeete woch xtutiire? Tuust tuu als mool xpiire tas es leetich is? Tsiimlich sicher tuun meyer al uns manich mool soo xpiire. Awer tenk iwer anere tinge woos tuu aach reeklich machst, soo wii tich paate. Es ferlangt tsayt un aanxtrengung, awer noo heyer xpiire mer uns fiil peser. Kraat soo, khene mer uns kuut xpiire wën mer ti Piipel xtutiire. (Ëfe. 5:26) Mërk mool etliche itee woo tich helfe khene:
Mach een plaan fer yeete woch. Meyer wise tas unser perseenlich xtuutyum is eene fon te wichtichste tinge woo mer mache mise. (Fili. 1:10) Fer tich helfe tayn plaan noo keen, xrayp tas uf een tseetelche un xtel tas uf een plats woos tuu es ofts siin tuust. Orer xtel een alarm in tayn telefoon fer tich een pisye foer tayn xtuutyum erinere.
Tenk iwer was tich helfe tuut tich konsentriire. Wii khanst tuu tich laychter konsentriire? Is es peser fer tich een xtun uf een mool xtutiire orer tas mache in khërtse xtike tsayt? Tuu weest was peser fer tich pariirt; soo, pleen tayn tsayt fer se xtutiire mit tas im khop. Wën ti tsayt fer se xtutiire khomt awer es feelt tich ti lust, fiilaycht khanst tuu fersuuche ploos 10 minute xtutiire. Een pisye xtutiire is peser wii kaar niks xtutiire, wayl soo kaar in een khorts tsayt khanst tuu etwas lërne. Un noo tas tuu aan kefang host, fiilaycht kriist tuu te wunx fer lënger xtutiire. (Fili. 2:13)
Tuu foner traan ëntxlise was tuu xtutiire tuust. Wëns tuu waarte tuust pis te xtun fon tayn xtuutyum fer ploos tan ëntxlise was tuu lërne tuust, tuust tuu net tayn “tsayt in te pest aat wiis meechlich is” penutse. (Ëfe. 5:16) Fersuuch een list mache mit te sache woos tuu kërn xtutiire teest. Tsum payxpiil, wëns tuu een frooch iwer een sache host, xrayp tas uf. Un am ën fon tayn xtuutyum, khan sin tas tuu anere sache in tayn list tepay xtele khanst.
Mach ënerunge wëns neetich is. Tas haupste is yeete woch xtutiire. Fer tas hin kriin, fiilaycht must tuu ënere wanee, wii lang orer was tuu xtutiirst.
Meyer kriin fiil nutse wën mer een rutiin hon fer ti Piipel xtutiire. Unser fraayntxaft mit Yeehoowa wërt xtërker, meyer lërne kuute ëntxlise mache un meyer kriin aach muut. (Yos. 1:8)