Pornokrafii — Kefeerlich orer net?

Hayt se taach is pornokrafii iweraal,a un siit aus tas ti layt tas kuut aan nëme. Meyer khene siin in ti moote, propakante, fiilme, musike, piichelcher, in telewysoon, videogames, selulaar, tablets, sites fer pilter fer anere tsayche. Nii in anere tsayte hon soo fiil mënxe uf soo fiil pletse soo fiil pornokrafii kekukt wii yets. — Kuk te khaste “Fakte iwich pornokrafii”.

Aach was ti layt tenke iwich pornokrafii hot sich keënert. Ti leerin Gail Dines xraypt: “Hayt sin ti pilter un wiiteos soo oone xaam tas was friier waar aan kesiin wii krop pornokrafii is hayt se taach aan kesiin wii etwas normaal”.

Was tenkst tuu too triwer? Is pornokrafii ploos een tsayt fertraypt woo khee xaate macht? Orer is tas wërklich etwas kiftiches? Yeesus saat: “Kraat soo, tuut yeete kuute paam kuute frucht kepe, awer yeete xlechte paam tuut xlechte frucht kepe.” (Matheus 7:17) Was fer sort frucht khomt fon pornokrafii? Fer tas wise, wole mer unersuuche etliche frooche iwich pornokrafii.

Wii petrëft ti pornokrafii te mënx?

Was ti spesyaliste saan: Pornokrafii is aarich sichtich, un etliche unersuucher un toktere ferklayche tas mit crack.

Brian,b woo sich aan keweent hot pornokrafii kuke in te internet, saat: “Ich khont tas net im xtich lose. Tas waar wii ich hipnotisiirt weyer. Ti kroos xult woo ich kexpiirt hon hot kemacht tas ich ketsitert hon un khop wee hat. Ich hon mich aarich aan kextrengt fer noo lose, awer yoore tëm noo khont ich noch net plaype oone pornokrafii kuke.”

Layt woo pornokrafii kuke sin fer sich un ferxtekele was se mache. Tas is net tsu wunere tas se sich aleen xpiire, sich xeeme, ëngstlich sin, pees un traurich. Als mool, hon se ketanke fer sich um pringe. “Ich hon ploos am mich selepst ketacht” saat Sérgio, woo neekst yeete taach download fon pornokrafii in sayn selulaar kemacht hot. “Ich hon mich oone weyert kexpiirt, xultich, aleen un oone muut. Ich hat angst un hon mich tsu fiil kexeemt fer hilef ferlange.”

Soo kaar triwer wech kuke oone tas mer wil, een pornokrafii pilt khan te mënx petrëfe. In een ausleyung foer te komitee Nort Amërika Senaat, Judith Reisman, een pekhant unersuucherin iwich te efekte fon pornokrafii, saat: “Pornokrafii pilter tuun fest in kehënt plaype un tuun te ferënere. Tas playp klaych fest in ti ketanke, oone tas ma wil, tii plaype fer imer in te piokiimix erinerung un is xweer orer unmeechlich tas ferkese.” Susan, fon 19 yoer, hot pornokrafii wiiteos in te internet kesiin oone tas se wolt. Tii saat: “Ti wiiteos un pilter sin fest in mayn ketanke keplip un khome tsurik oone ich waarte. Ich tenke tii keen nii mee kans aus mayn ketanke.”

IN KHORTSE WËRTER: Ti layt woo pornokrafii kuke kepe wii sklaaw un tuun fiil layte. (2 Pheeter 2:19.)

Wii petrëft ti pornokrafii ti familye?

Was ti spesyaliste saan: “Pheyerche un familye keen aus naner weeche pornokrafii.” — The Porn Trap, (Ti fal fon te pornokrafii) fon Wendy un Larry Maltz.

Pornokrafii macht kroose xaate fer ti hayrat un ti familye:

• Ferxweecht ti fertraung, intimiteet un liip unich tas pheyerche. (Xpriiche 2:12-17)

• Muut uf ekoiistix sin, sich net khimere un net tsu friite sin mit sayne man orer fraa. (Ëfeser 5:28, 29)

• Pringt uf fantasii un ferkheerte seksuaale winxe. (2 Pheeter 2:14)

• Macht tas tee woo tas kukt tswinge wil sayne man orer fraa aan nëme xeemliche seksuaale akte. (Ëfeser 5:3, 4)

• Emotsyonaal un fiisix untroy sin. (Matheus 5:28)

Ti Piipel saat tas te man orer ti fraa sol “net hinerlistich” sin eene mim anere. (Malakias 2:16) Untroy sin is een aat hinerlistichkheet woo khan mache tas tas pheyerche aus naner keet un tiwors macht, un tas macht kroose xaate fer ti khiner.

Ti pornokrafii khan aach ti khiner in een tirëkt aat petrëfe. Brian, woo xon kenënt is woer, saat: “Wii ich 10 yoer alt waar, hon ich ferxtekele kexpiil un hon mayne papa sayn pornokrafii piichelche kefun. Ich hon aan kefang tas kuke in ferxtekelt un ich khont net ferxteen warom ich tas soo kërn kekukt hon. Tas waar te aanfang fon een xlecht kewoonheet woo yoore aan kehal hot, soo kaar wii ich xon kroos waar.” Xtuutye tsayche tas pornokrafii khan mache tas ti yunge eente iire seksuaale leepe aan fange, sich oone xaam aan xtele, seksuaal kewaltich sin un psikoloxik un emotsyonaal propleeme hon.

IN KHORTSE WËRTER: Pornokrafii is een kift woo fernicht tas liip unich tas pheyerche un pringt fiil xaate un xmërtse. (Xpriiche 6:27)

Was saat ti Piipel iwich pornokrafii?

KOT SAYN WORT SAAT: “Macht aach toot ti kliite fon ayre khërper woo se tuun hon mit seksuaal imoraaliteet, unraynheet, iwermeesiche seksuaale luste, xlechte winxe un kiirichkheet, woo itolatrii is.” (Koloser 3:5)

In khortse wërter khan ma saan tas Yeehoowac Kot hast ti pornokrafii. Tas petayt net tas tee sëks aan siit wii etwas xeemliches. Yeehoowa hot uns ti seksualiteet kep tas ti ferhayrate khente liip eene tsum aner tsayche, sich fraye mit samer un khiner hon. (Tyako 1:17)

Warom khene mer saan tas Yeehoowa sicher keeche ti pornokrafii is? Kuk etliche motiiwe:

• Tee weest tas pornokrafii khan xaate mache fer unser leepe. (Ëfeser 4:17-19)

• Tee liipt uns un wil uns xitse fon ales woo xaate macht. (Isayas 48:17, 18)

• Yeehoowa wil ti hayrat un ti familye xitse. (Matheus 19:4-6)

• Tee wil hon tas mer sole moraalix rayn sin un respektiire ti anere sayn recht. (1 Thesalooniker 4:3-6)

• Yeehoowa wil net tas mer ti seksualiteet xlecht penutse awer tas mer se eere sole. (Hepreeyer 13:4)

• Tee wees tas ti pornokrafii is een fertreet, ekoiistix un taywilich aan siin fom sëks. (Xeenesis 6:2; Yuutas 6, 7)

IN KHORTSE WËRTER: Ti pornokrafii fernicht unser fraayntxaft mit Kot. (Romaaner 1:24.)

Yeehoowa is parmhërtslich mit tëne woo wole sich fray mache fon te pornokrafii. Ti Piipel saat: “Yeehoowa is parmhërtslich un tuut uns ferxteen, is ketultich un hot raychlich leaale liip. Wayl eyer wees wii meyer kemacht sin, erinert sich tas meyer xtaap sin.” (Psalm 103:8, 14) Tee laat ti teemuutiche in fer pay iim khome ‘fer parmhërtslichkheet kriin un unfertiint kuutheet fine fer tëne helfe in te richtich tsayt’. (Hepreeyer 4:16; kuk te khaste “Wii sich fray mache fon te pornokrafii”.)

Fiil mënxe khene sich fray mache fon te pornokrafii mit Kot sayn hilef. Kuk was ti Piipel saat iwich etliche woo xlechte kewoonheete im xtich kelos hon: “Teyer sayt kewext kep; teyer sayt kehaylicht kep; teyer sayt kerecht aus kexproch kep im naame fom Hër Yeesus Kristus un mim kayst fon unser Kot.” (1 Korinter 6:11) Soo wii te aphostel Phaul, khene se tan saan: “Fer ales sin ich xtark torich tee woo meer kraft kept.” (Filiper 4:13)

Susan, woo hot kephakt ti kewoonheet fer pornokrafii kuke, saat: “Yeehoowa is te eensiche woo tich helfe khan tich ferhoole. Wëns tuu iim sayn hilef un oryentiirung ferlangst, tan khanst tuu rayn foer iim wëre. Tee lost tich nii im xtich.”