XTUUTYUM ARTIKEL 25
Elteste, was khent teyer mit Kiteoon sayn payxpiil lërne?
“Ich teet net kenuuch tsayt hon wën ich teet noch xpreche iwer Kiteoon.” (HEPREEYER 11:32)
LIIT 124 Imer leaal sin
WAS TUUN MER SIIN?a
1. Tëm noo 1te Pheeter 5:2, was fer wichtich flicht hon ti elteste kriit?
YEEHOOWA hot een flicht fer ti elteste kep: tëm sayn weyertliche xeef kuut uf phase. Tiise troye mëner sin aarich petanklich tas Yeehoowa uf tëne traut fer ti priiter un xwestere tiine. Un ti elteste tuun xtram xafe fer ti xeef “wërklich uf phase”. (Yee. 23:4; lees 1te Pheeter 5:2.b) Meyer sin aarich petanklich tas mer soo sorte mëner in unser kemaynte hon!
2. Was fer sort kefoore khene etliche elteste mit mache?
2 Wën se sayn flichte uf phase, tuun ti elteste fiile kefoore mit mache. Tsum payxpiil: es is neetich fiil aarwayt fer ti kemaynt uf phase. Tony, een elteste in te Fereenichte Xtaate fon Amërika, must lërne sayn krënse erkhëne un net tsu fiil aarwayt aan nëme. Tee leet aus: “Am aanfang fon te pantemii fon coronavirus, hon ich fersuucht imer mee mache fer ti fersamlunge un ti preetich aarwayt orkanisiire. Awer ekaal wii fiil ich kexaft hon, es waar imer mee fer se mache. Tsum xlus, hat ich soo fiil se tuun, tas ich khee mee tsayt hat fer ti Piipel leese, xtutiire un peete.” Ilir, een elteste in Kosovo, hot een aner propleem mit kemacht. Wii eyer uf een plats kewoont hot woo es kriich waar, hot eyer es xweyer kefun ti oryentiirunge fon te Orkanisatsyoon foliche. Tee saat: “Mayn koraaj is keproopt kep wii ti filyaal mich een flicht aan kepoot hot: ti priiter un xwestere in een kefeerliche plats helfe. Ich hat pang un ti oryentiirung hot net praktix aus kesiin.” Tim, een misyoneer in Asya, hot es xweyer kefun al sayn flichte yeete taach uf phase. Tee saat: “Als mool, waar ich soo miit tas ich khee kraft hat fer ti priiter un xwestere uf phase.” Was khan ti elteste helfe wën se eenliche kefoore mit mache?
3. Wii khene al nutse fon Kiteoon sayn payxpiil kriin?
3 Ti elteste khene mim payxpiil fom richter Kiteoon lërne. (Hep. 6:12; 11:32) Tee waar een xeefer fon Kot sayn folek un hot Kot sayn folek aach kexitst. (Rich. 2:16; 1 Kro. 17:6) Kraat soo, sin ti elteste in kesetst kep fer Kot sayn folek uf phase torich een xlime tsayt. (Aph. 20:28; 2 Tim. 3:1) Kiteoon hot sayn krënse erkhënt, waar teemuutich, folich un hot persewerans ketsaycht wii eyer sayn flichte erfiilt hot. Ti elteste khene fiil too temit lërne. Un wën tii woo net elteste sin Kiteoon sayn payxpiil xtutiire, khene se lërne noch mee petanklichkheet tsayche weeche ti elteste un tëne noch peser pay xteen. (Hep. 13:17)
WËN TAYN TEEMUUT KEPROOPT IS
4. Wii hot Kiteoon ketsaycht tas eyer eene teemuutiche man waar?
4 Kiteoon waar eene teemuutiche man, woo sayn krënse erkhënt hot.c Wii Yeehoowa sayn engel fer Kiteoon kesaat hot tas eyer raus kesuucht kep is fer ti israeliiter fon te mechtiche mityaniiter pefraye, hot tiise teemuutiche man keantwort: “Mayn familye is te unwichtichste fon Manasës, un ich sin te unwichtichste fon mayn fater sayn haus.” (Rich. 6:15) Kiteoon hot ketenkt tas eyer net kwalifitsiirt waar fer tiise flicht uf phase, awer Yeehoowa wust tas eyer tas mache khont. Mit Yeehoowa sayn hilef, hot Kiteoon es hin kriit sayn flicht erfiile.
5. Wanee khan es xweyer fer een elteste sin, teemuut tsayche?
5 Ti elteste mache sayn pestes fer imer teemuutich sin un sayn krënse erkhëne. (Mik. 6:8; Aph. 20:18, 19) Tii proose sich net weeche sayn apiliteete orer was se xon kemacht hon. Awer tii tenke aach net tas se khee weyert hon weeche ti feeler woo se xon kemacht hon. Soo wii soo, als mool is es xweyer fer een elteste teemuut tsayche un sayn krënse erkhëne. Tsum payxpiil: khan sin tas eyer fiile flichte aan nëmt un tan es xweyer fint tas ales erfiile. Un fiilaycht is es xweyer teemuutich sin wën etliche layt tëm loope un anere tëm kritikiire weeche ti aat wii eyer sayn flichte uf phast. Wii khan Kiteoon sayn payxpiil ti elteste helfe in soo sorte situatsyoone?
Een elteste woo teemuut soo wii Kiteoon tsaycht, is wilich fer hilef ferlange — tsum payxpiil, fer ti preetich mit puplikatsyoone khareche orkanisiire (Kuk te apsats 6.)
6. Was khene ti elteste mit Kiteoon lërne iwer sayn krënse erkhëne? (Kuk aach tas pilt.)
6 Ferlang hilef. Yemant woo sayn krënse erkhënt, wees tas es kept etliche tinge woo eyer net kemacht kriit. Kiteoon hot tiise kwaliteet ketsaycht wii eyer hilef fer anere ferlangt hot. (Rich. 6:27, 35; 7:24) Kluuche elteste mache was eenliches. Tony, iwer weem mer foner traan kexproch hon, leet aus: “Weeche ti aat wii ich kroos ketsoo waar, hon ich mee aarwayt aan kenom wii ich uf phase khent. Tes weeche hon ich ëntxlist een xtuutyum in unser familye aanpeetung mache iwer wii wichtich es is unser krënse erkhëne. Un ich hon fer mayn fraa kefroot was se too triwer ketenkt hot. Ich hon aach noch mool kekukt te wiiteo Treine, confie e delegue como Jesus fez im site jw.org.” Tony hot aan kefang anere in laate fer tëm helfe sayn flichte uf phase. Was fer waar te resultaat? “Ti aarwayt in te kemaynt is kuut uf kephast — saat Tony — un yets hon ich mee tsayt fer mayn fraayntxaft mit Yeehoowa ferxtërke.”
7. Wii khene ti elteste Kiteoon noo mache wën se kritikiirt sin? (Tyako 3:13)
7 Kep net pees wën yemant tich kritikiirt. Tas khan aach een proop fer ti elteste sin. Kiteoon sayn payxpiil khan tëne noch mool helfe. Tee wust tas eyer net perfekt waar; tes weeche is eyer in ruu keplip wii ti mëner fon Efraiim tëm kritikiirt hon. Kiteoon hot keheert wii se sich pexweert hon un tee hot net krop keantwort, awer mit kexik; soo hot eyer teemuut ketsaycht un tas hot ti mëner fon Efraiim peruycht. (Rich. 8:1-3) Kluuche elteste mache Kiteoon noo. Wën se kritikiirt sin, heere se mit acht un kepe net pees. (Lees Tyako 3:13.)d Soo tuun se te friit in te kemaynt uf muute.
8. Wii sole ti elteste sich aan xtele wën se keloopt sin? Kep een payxpiil.
8 Kep ti kans eer tsu Yeehoowa. Wën anere Kiteoon keloopt hon wayl eyer ti mityaniiter ap kewun hat, hot eyer ti eer tsu Yeehoowa kep. (Rich. 8:22, 23) Wii khene ti elteste Kiteoon noo mache? Tii sole ti eer tsu Yeehoowa kepe weeche was se kemacht kriin. (1 Kor. 4:6, 7) Wole mer saan, tsum payxpiil, tas een elteste keloopt is weeche sayn apiliteet wii leerer. Tee khan antworte tas ti kans inlërnung fon te Piipel khomt orer tas meyer al fon Kot sayn Orkanisatsyoon keiipt sin. Als mool khene ti elteste sich frooe ep ti aat wii se in lërne ti eer tsu Yeehoowa kept orer ploos acht fer sich selepst ruuft. Kuk mool ti speryens fon een elteste woo Timothy heest. Wii eyer aan kefang hot wii elteste tiine, hot eyer kërn puuplixe reete kehal. Tee saat: “Ich hon lange un xweyere introtutsyoone un ferklaychunge kemacht. Ti layt hon mich ofts too teweeche keloopt. Es is xaat, awer tas hot ti acht fer mich keruuft, net fer ti Piipel orer fer Yeehoowa.” Mit te tsayt hot Timothy kemërkt tas, fer net ti acht fer sich selepst ruufe, must eyer ënere ti aat wii eyer in kelërnt hot. (Xpr. 27:21) Was fer waar te resultaat? Tee leet aus: “Yets tuun ti priiter un xwestere mich saan tas mayn reet se keholef hot torich een propleem triwer wech khome, een proop aus hale orer tichter pay Yeehoowa khome. Tiise wërter tuun mich peser kefale wii ti loope woo ich friier kriit hon.”
WËN TAYN FOLICHKHEET ORER KORAAJ KEPROOPT IS
Kiteoon tuut Kot foliche un sayn militeer ferkleene. Tee suucht raus 300 mëner woo sich wachsam ketsaycht hon (Kuk te apsats 9.)
9. Wii waare Kiteoon sayn folichkheet un koraaj im proop kextelt? (Kuk tas pilt am aanfang fom piichelche.)
9 Klaych wii Kiteoon wii richter in kesetst kep is, waare sayn folichkheet un koraaj im proop kextelt. Tee hot een kefeerlich flicht kriit: te altar woo sayn papa penutst hot fer Paal aan peete, fernichte. (Rich. 6:25, 26) Xpeeter, wii Kiteoon een militeer kesamelt hot, hot Yeehoowa tëm 2 mool kexikt tas militeer ferkleene. (Rich. 7:2-7) Tsum xlus, hot Yeehoowa kesaat tas eyer solt tas faynte militeer oomts atakiire. (Rich. 7:9-11)
10. Wanee khan es xweyer fer een elteste sin, folich wëre?
10 Ti elteste sole “fërtich fer aan heere” sin. (Tya. 3:17) Een folich elteste is fërtich fer aan heere was ti Piipel saat un aach was Kot sayn Orkanisatsyoon oryentiirt. Soo lost eyer een kuut payxpiil fer ti anere. Noch soo, khan es xweyer fer een elteste sin, folich wëre. Tsum payxpiil: im xtant kriit eyer fiile oryentiirunge orer tii sin fiks keënert un es is tëm xweyer tëne aan wëne. Als mool khan eyer sich soo kaar frooe ep een oryentiirung wërklich praktix orer kluuch is. Orer khan sin tas se tëm ferlange een flicht erfiile woo khent sayn frayheet ins kefoer xtele. In soo sorte situatsyoone, wii khene ti elteste Kiteoon sayn folichkheet noo mache?
11. Was sole ti elteste mache fer folich sin?
11 Heer ti oryentiirunge mit acht un tuu se aan wëne. Yeehoowa hot phaar oryentiirunge fer Kiteoon kep: tsum payxpiil, wii Kiteoon te altar fon sayn papa fernichte solt; tas plats woo eyer een altar fer Yeehoowa paue solt un was fer fiitsaych eyer opfere solt. Kiteoon hot net ti oryentiirunge in frooch kextelt — tee hot kemacht kraat was Yeehoowa kesaat hat. Hayt kriin ti elteste oryentiirunge fon Kot sayn Orkanisatsyoon torich priife, pekhantmachunge un informatsyoone woo uns helfe kesunt un ticht pay Yeehoowa plaype. Meyer liipe unser elteste wayl se ti oryentiirunge fon te Orkanisatsyoon troy aan wëne. Ti kans kemaynt kriit nutse too teweeche. (Psal. 119:112)
12. Wii khene ti elteste Hepreeyer 13:17 aan wëne wën ti Orkanisatsyoon een oryentiirung ënert?
12 Say wilich fer tich aan phase. Eriner tich tas Yeehoowa hot Kiteoon kexikt neekst al ti soltaate hëm xike. (Rich. 7:8) Fiilaycht hot Kiteoon sich kefroot: ‘Is tiise ënerung wërklich neetich? Meecht tas funtsyoniire?’ Soo wii soo, hot Kiteoon aan keheert. Wii tuun ti elteste hayt tsu taach Kiteoon noo mache? Wën ti Orkanisatsyoon een ënerung macht, tuun se tas klaych aan heere. (Lees Hepreeyer 13:17.)e Tsum payxpiil: in 2014, hot ti Rechiirente Khërperxaft keënert ti aat wii ti Raych Saale un Konkrës Saale petsaalt waare. (2 Kor. 8:12-14) Friier, hot ti Orkanisatsyoon kelt fer ti kemaynt keporicht fer te Raych Saal paue un ti kemaynt hot tas mit te tsayt tsurik petsaalt. Awer hayt tuut ti Orkanisatsyoon kontripuytsyoone fon al ti kemaynte uf te welt penutse fer Raych Saale un Konkrës Saale paue woos neetich is, soo kaar wën ti kemaynt fom plats ploos kleene kontripuytsyoone mache khan. Wii José tas tsum wise kriit hot, hat eyer tswayfele ep tas funtsyoniire teet. Tee hot ketenkt: ‘Noch net mool een Raych Saal wërt kepaut. Soo was tuut net too hiir funtsyoniire.’ Was hot José keholef ti oryentiirung pay xteen? Tee saat: “Ti wërter fon Xpriiche 3:5, 6 hon mich erinert tas ich mus uf Yeehoowa traue. Un ti resultaate sin wërklich wunerlich! Yets sin mer mee Raych Saale am paue. Un ti nay aat wii ti kontripuytsyoone penutst sin, pringt nutse fer ale kaar wayl tii woo mee hon, helfe tii woo weenicher hon.”
Aach wën unser aarwayt ferpoot is, khene mer, mit koraaj, een kuut preetich aarwayt mache (Kuk te apsats 13.)
13. (a) Was fer sicherheet hat Kiteoon? (b) Wii khene ti elteste Kiteoon noo mache? (Kuk aach tas pilt.)
13 Mach Yeehoowa sayn wile mit koraaj. Kiteoon hot Yeehoowa aan keheert opwool eyer pang hat un ti flicht kefeerlich waar. (Rich. 9:17) Kot hot Kiteoon sicher kelos tas Eyer tëm helfe teet Sayn folek xitse. Ti elteste woo in pletse leepe woo unser aarwayt ferpoot is, mache Kiteoon noo. Mit koraaj, fiire se ti fersamlunge un ti preetich aarwayt, opwool se khene in kexpërt orer aus kefroot wëre, sayn aarwayt ferliire orer wyolënts mit mache.f Torich ti kroos tripulatsyoon, mise ti elteste koraaj hon fer ti oryentiirunge woo se kriin, aan heere — soo kaar wën tas kefeerlich wërt. Meyer khene, tsum payxpiil, oryentiirunge kriin iwer wii een xtark kerichts pexeet preetiche orer wii te atak fon Kook fon Makook iwerleepe. (Ese. 38:18; Apo. 16:21)
WËN TAYN PERSEWERANS KEPROOPT IS
14. Wii waar Kiteoon sayn persewerans keproopt?
14 Kiteoon must een kroos fiisix aanxtrengung mache fer wii een richter tiine. Ti mityaniiter waare oomts fom khampf am aus rayse. Kiteoon hot se noo kexprung fom taal fon Yesreël pis te Yortan flus, woo tsiimlich sicher fiile heke trom rom hat. (Rich. 7:22) Meecht Kiteoon im Yortan flus xtil kehal hon? Nee! Kiteoon un sayn 300 mëner waare xon miit kewees, awer tii sin torich te Yortan flus kang un hon wayter ti mityaniiter noo kexprung. Tsum xlus, hon se ti faynte ketrof un tëne ap kewun. (Rich. 8:4-12)
15. Wii khan een elteste sayn persewerans keproopt sin?
15 Een elteste khan sich als mool aarich miit xpiire weeche sayn flichte in te kemaynt un in te familye. In soo sorte situatsyoone, wii khene ti elteste Kiteoon noo mache?
Liipliche elteste hon xon fiile keholef woo hilef praychte (Kuk ti apsetse 16-17.)
16-17. (a) Was hot Kiteoon keholef wayter aus hale? (b) Was fer sicherheet khene ti elteste hon? (Isayas 40:28-31) (Kuk aach tas pilt.)
16 Trau tas Yeehoowa tich ferxtërke tuut. Kiteoon hot ketraut tas Yeehoowa tëm ferxtërke teet un Kot hot kraat tas kemacht. (Rich. 6:14, 34) Kiteoon un sayn mëner waare, tsu fuus, 2 mityaniitixe kheeniche am noo xpringe; awer tiise kheeniche waare tsiimlich sicher uf kamele am aus rayse! (Rich. 8:12, 21) Noch soo, mit Yeehoowa sayn hilef, hon ti israeliiter ti faynte kefang un te kriich ap kewun. Ti elteste khene aach uf Yeehoowa traue, wayl “tee wërt nii miit un sayn kraft wërt nii al”. Tee tuut ti elteste kraft kepe wën se tas prayche. (Lees Isayas 40:28-31.)g
17 Kuk mool ti speryens fon Matthew, een mitkliit fon te Krankehaus Ferpiinungs Komisyoon. Was helft tëm aus hale? Matthew saat: “Ich mërke Yeehoowa sayn kraft, woo in Filiper 4:13 pexrip is. Ich waar ofts soo miit tas ich ketenkt hon tas ich net mee aus hale khent. Tan hon ich hërtslich tsu Yeehoowa kepeet fer mich ti neetich fiisix un mentaal kraft kepe fer ti priiter un xwestere helfe. In tiise xtune, hon ich kexpiirt tas Yeehoowa sayn kayst mich kraft kep hot un mich keholef hot wayter aus hale.” Soo wii Kiteoon, tuun unser elteste xtram xafe fer Kot sayn folek uf phase opwool tas net imer laycht is. Sicher, tii mise sayn krënse erkhëne un ferxteen tas se net mache khene ales was se kërn wolte. Awer tii khene traue tas Yeehoowa se heert wën se hilef ferlange un tas eyer se ferxtërke tuut fer wayter aus hale. (Psal. 116:1; Fili. 2:13)
18. In khortse wërter, wii khene ti elteste Kiteoon noo mache?
18 Ti elteste khene fiile lisyoone mit Kiteoon sayn payxpiil lërne. Tii mise sayn krënse erkhëne un teemuutich sin wën se raus suuche wii fiil flichte se aan nëme un aach wën se keloopt orer kritikiirt sin. Tii mise folich un koraajich sin, hauptseechlich soo lang wii tas ën fon tiise xlechte welt tichter khomt. Un tii mise traue tas Kot khan tëne ferxtërke, ekaal ti xwiirichkheete woo se mit mache. Sicher sin mer aarich petanklich weeche tiise flaysiche xeefer un mer kepe “imer fiil weyert fer soo sorte mëner”. (Fili. 2:29)
LIIT 120 Say teemuutich wii Yeesus
a Yeehoowa hot Kiteoon in kesetst fer Sayn folek uf phase un xitse in een xlim tsayt fon Israël sayn kexicht. Torich unkefeer 40 yoore, hot Kiteoon tiise flicht troy erfiilt. Awer tee hot phaar propleeme mit kemacht. Wii khan tëm sayn payxpiil ti elteste hayt helfe wën se kefoore mit mache? Tiise artikel kept uns ti antwort.
b (1te Pheeter 5:2) phast Kot sayn trop xeef uf, woo aych iwer kep is; tiint wii superintentente, net wayl iir mist, awer fraywilich foer Kot; aach net weeche liip tsu uneerlich kelt, awer mit muut;
c Wën mer teemuutich sin, tuun mer net tsu fiil iwer uns selepst tenke un mer ferxteen tas es kept etliche tinge woo mer net kemacht kriin. Meyer tuun aach ti anere respektiire un tëne siin wii wichticher wii uns selepst. (Fili. 2:3)
d (Tyako 3:13) Weer is kluuch un ferxtëntich tswixich aych? Eyer sol mit sayn kuut aanxtelung tsayche tas sayn aarwayte sin mit te tsaamheet, woo fon te kluucheet khomt, kemacht.
e (Hepreeyer 13:17) Sayt folich tsu tëne woo aych fiire un sayt wilich fer tëne sayn autoriteet respektiire, wayl tii tuun aych uf phase un mise een aprechnung weeche tas mache. Soo, tuun se tas mit frooheet mache un net oone muut, wayl tas khent aych xaate mache.
f Kuk te artikel “Continue adorando a Jeová mesmo quando a obra estiver proscrita” in A Sentinela Yuuli fon 2019, sayte 10-11, apsetse 10-13.
g (Isayas 40:28-31) Meechst tuu tas net wise? Host tuu tas net keheert? Yeehoowa, te Kriatoer fon te wayteste pletse fon te eyert, is Kot fer ti kans eewichkheet. Tee wërt nii miit un sayn kraft wërt nii al. Khan ma sayn ferxtëntnis kaar net ferxteen. 29 Eyer kept kraft fer tii woo miit sin, un ferxtërkt tii woo khee kraft mee hon. 30 Soo kaar ti yunge wëre miit un ferliire ti kraft, un yunge mëner xtolpere un fale, 31 awer tii woo uf Yeehoowa hofe, kriin wiiter kraft. Tii tuun hooch wii ti atler fliie. Tii tuun xpringe un ferliire net ti kraft; tii tuun laafe un wëre net miit.”