Pist tuu fërtich fer ti kroos tripulatsyoon?

1. Warom is es kluuch uns foer perayte fer ti unklike?

FOER perayt sin, khan unser leepe rete. Tsum payxpiil: wën een unklik pasiirt, ti layt woo foer perayt sin, hon een kreeser xans fer iwerleepe un ti anere helfe. Een umaniteer hilef orkanisatsyoon in Europa saat: “Sich kuut foer perayte, macht fiil aus.”

2. Warom sole mer uns foer perayte fer ti kroos tripulatsyoon? (Matheus 24:44)

² Ti “kroos tripulatsyoon” tuut uf een mool khome. (Mat. 24:21) Awer ti kroos tripulatsyoon wërt anerste wii ti meyerste unklike, wayl mer wise tas se khome tuut. Unkefeer 2.000 yoore tsurik, hot Yeesus sayn nookeener aan kesaat tas se solte sich foer perayte fer tiise taach. (Lees Matheus 24:44.)b Wën mer xon foer perayt sin, wërts laychter fer uns tiise xweyer tsayt aus hale un ti anere helfe tas selwiche mache. (Luk. 21:36)

3. Wii tuun ti persewerans, ti mitlayt un ti liip uns helfe fërtich fer ti kroos tripulatsyoon sin?

³ Meyer mise 3 kwaliteete ëntwikele woo uns helfe tuun fërtich fer ti kroos tripulatsyoon sin. Was tuun mer mache wën mer mise een xtark kerichts pexeet preetiche un ti layt sich keeche uns xtele? (Apo. 16:21) Meyer mise persewerans hon fer Yeehoowa aan heere un traue tas eyer uns xitse tuut. Was tuun mer mache wën unser priiter etliche orer al sayn materyaalixe tinge ferliire? (Hap. 3:17, 18) Ti mitlayt tuut uns uf muute tëne ti neetich hilef kepe. Un was tuun mer mache wën mer mise fer een tsayt mit unser priiter mitsamer leepe weeche te atak fon een krup natsyoone? (Ese. 38:10-12) Een xtark liip tsu te priiter un xwestere tuut uns helfe torich tiise xweyer tsayt triwer wech khome.

4. Wii tsaycht ti Piipel tas mer mise wayter persewerans, mitlayt un liip ëntwikele?

⁴ Kot sayn Wort muut uns uf wayter persewerans, mitlayt un liip ëntwikele. Tsum payxpiil, Lukas 21:19 saat: “Weeche ayre persewerans, tuut teyer ayre leepe hale.” Koloser 3:12 saat: “Tsiit aych aan mit liiplich mitlayt.” Un 1 Thesalooniker 4:9, 10 saat: “Kot tuut aych in lërne eene ti anere liipe. (...) Awer priiter, mer muute aych uf fer tas imer mee mache.” Tiise wersikele sin kexrip kep fer tisipele woo xon persewerans, mitlayt un liip ketsaycht hate. Awer tii solte wayter lërne wii tiise kwaliteete tsayche. Meyer mise tas selwiche mache. Fer uns helfe, tuun mer siin wii ti eyerste kriste yeete eene fon tiise kwaliteete ketsaycht hon. Tan tuun mer siin wii mer khene se noo mache un, soo, fërtich fer ti kroos tripulatsyoon sin.

FERXTËRK TAYN PERSEWERANS

5. Wii hon ti eyerste kriste sayn proope aus kehal?

⁵ Ti eyerste kriste muste aus hale. (Hep. 10:36) Tii hate ti selwiche propleeme woo ti meyerste layt in sayn tsayt hate; awer tii hate aach ekstra propleeme wayl se kriste waare. Fiile fon tëne waare keyacht, net ploos fon te yitixe relichyeese fiirer un ti romaanixe autoriteete, awer aach fon sayn aychne familye. (Mat. 10:21) Un tii muste aach uf phase fer net influentsiirt sin fon te falxe inlërnunge fon te aphostate, woo fersuucht hon ti kemaynt teele. (Aph. 20:29, 30) Noch soo, hon tiise kriste aus kehal. (Apo. 2:3) Wii? Tii hon aan piiplixe payxpiile fon persewerans, soo wii Yoop sayns, triwer noo ketenkt. (Tya. 5:10, 11) Tii hon kepeet fer kraft kriin. (Aph. 4:29-31) Un tii hon sich traan kehal aan te kuute resultaate woo sayn persewerans pringe teet. (Aph. 5:41)

6. Was lërnst tuu mit was Merita kemacht hot fer ti opositsyoon aus hale?

⁶ Meyer khene aach wayter aus hale wën mer ofts payxpiile fon persewerans in te Piipel un in unser puplikatsyoone xtutiire un too triwer noo tenke. Merita, een xwester in Alpaanya, hot kraat tas kemacht un tes weeche khont se ti wyolënt opositsyoon fon sayn familye aus hale. Tii saat: “Yoop sayn kexicht in te Piipel xtutiire, hot mich tiif aan kekrif. Tee hot fiil kelit un, opwool eyer wust net weer too hiner traan waar, hot eyer kesaat: ‘Pis ich xtërpe, tuun ich mayn intekriteet nii uf kepe!’ (Yoop 27:5) Ich hon triwer noo ketenkt aan wii laychter mayn propleeme waare ferklaycht mit Yoop sayns. Anerste wii tee, wust ich weer too hiner traan waar.”

7. Aach wën mer net xweyere propleeme hayt mit mache, was mise mer xon yets lërne se mache?

⁷ Meyer khene aach unser persewerans ferxtërke wën mer eftas tsu Yeehoowa peete un mit tëm iwer unser kanse soriche xpreche. (Fili. 4:6; 1 The. 5:17) Fiilaycht yets, host tuu net xweyere propleeme. Awer tuust tuu Yeehoowa sayn hilef im kepeet ferlange wëns tuu traurich, konfus orer tich oone ausweech xpiirst? Wëns tuu xon yets Yeehoowa sayn hilef ferlangst fer mit te kleene propleeme um keen, tuust tuu tas selwiche mache wën kreeser propleeme im futuer foer khome. Tas tuut tich ti sicherheet kepe tas Yeehoowa wees wanee un wii tich helfe. (Psal. 27:1, 3)

8. Ti proope hayt aus hale, helft uns mit proope woo noch khome tuun. Wii tuut Mira sayn payxpiil tas tsayche? (Tyako 1:2-4) (Kuk aach tas pilt.)

⁸ Meyer hon een kreeser xans fer ti kroos tripulatsyoon aus hale, wën mer ti proope xon hayt phake. (Rom. 5:3) Warom khene mer tas saan? Fiile priiter un xwestere hon raus kefun tas, wën se een propleem aus hale, es helft tëne te neekste propleem phake. Wën se een propleem mit Kot sayn hilef aus hale, is sayn klaape ferxtërkt tas Yeehoowa fërtich un wilich is fer tëne helfe. Un wayl se uf Yeehoowa klaape, khene se ti neekste proop aus hale. (Lees Tyako 1:2-4.)c Mira, een pyoneerin in Alpaanya, hot kemërkt tas, wayl se propleeme in te ferkangne yoore aus kehal hot, khan se wayter persewerans hayt tsayche. Tii erkhënt tas als mool, xpiirt se wii wën se ti eensich weyer woo soo fiil propleeme hët. Awer tan tuut se sich traan tenke wii fiil Yeehoowa tëne xon keholef hot in te letste 20 yoore. Un tii saat fer sich selepst: ‘Playp troy! Los net noo Yeehoowa yets tiine, noo tas eyer tich keholef hot soo fiil xweyere situatsyoone aus hale.’ Tuu khanst aach triwer noo tenke aan wii fiil mool Yeehoowa tich xon keholef hot aus hale. Say tich sicher: Kot mërkt yeete mool woos tuu een proop aus halst un tee tuut tich peloone. (Mat. 5:10-12) Soo, wën ti kroos tripulatsyoon aan fangt, tuust tuu xon wise wii persewerans tsayche un wërst pextimt wayter aus hale.

TSAYCH MITLAYT

9. Wii hot ti kemaynt in Antyokya fon Siirya mitlayt ketsaycht?

⁹ Kuk mool was pasiirt is wii ti kriste in Yuteea een kroos hungernoot mit keleept hon. Sicher, wii ti kemaynt in Antyokya fon Siirya tas tsum wise kriit hot, hon se mitlayt fon sayn priiter in Yuteea kexpiirt. Awer tii hon aach etwas kemacht fer sayn priiter in Yuteea helfe. Tii hon “ëntxlist, yeete eene, tëm noo sayn situatsyoon, hilef xike fer ti priiter woo in Yuteea keleept hon”. (Aph. 11:27-30) Yuteea waar net ticht, awer ti priiter in Antyokya waare pextimt tëne helfe. (1 Yo. 3:17, 18)

10. Wii khene mer mitlayt tsayche wën ti priiter un xwestere unklike mit mache? (Kuk aach tas pilt.)

¹⁰ Meyer khene aach mitlayt tsayche wën mer tsum wise kriin tas unser priiter am layte sin weeche xtorme un anere xweyere situatsyoone. Meyer tuun uns klaych aan piite fer se helfe; meyer khene, tsum payxpiil, fer ti elteste saan tas mer wole in een umaniteer hilef proyëkt xafe. Meyer khene aach kontripuytsyoone fer ti weltwayt aarwayt mache orer peete fer tii woo ti unklik kelit hon.d (Xpr. 17:17) Fer een payxpiil kepe: in 2020, sin mee wii 950 Umaniteer Hilef Komisyoone uf te kans welt in kextelt kep fer hilef kepe fer tii woo es praychte torich ti pantemii fon coronavirus. Meyer sin aarich petanklich fer ti priiter un xwestere woo in te umaniteer hilef xafe. Weeche mitlayt tsu sayn priiter un xwestere, tuun se tëne materyaalixe tinge kepe, tëne helfe Kot wayter tiine un, in etliche situatsyoone, soo kaar hayser un aanpeetunge pletse kans mache orer noch mool uf paue. (Kuk aach 2 Korinter 8:1-4.)

11. Wii khene mer eer tsu unser himlixe Fater kepe wën mer mitlayt tsayche?

¹¹ Wën een unklik pasiirt un mer mitlayt tsayche, ti anere mërke unser aanxtrengung fer hilef kepe. Tsum payxpiil, in 2019, hot te triles xtorm Dorian een Raych Saal in te Pahamas fernicht. Wii ti priiter te Raych Saal am uf paue waare, hon se yemant kontraktiirt woo net Yeehoowa sayn Tsayer waar. Tii hon tëm ferlangt wii fiil es khoste teet ti neetich aarwayt mache. Tee hot keantwort: “Teyer khent mayn feramente kratis penutse un ich tuun aych aach ti materyaale un ti aarwayter kratis fersoriche. (…) Ich wil tas fer ayre Orkanisatsyoon mache. Ti aat wii teyer ayre fraaynte pehantelt, hot mich ferwunert.” Ti meyerste layt in te welt khëne net Yeehoowa. Awer fiile fon tëne siin was Yeehoowa sayn Tsayer mache fer ti anere helfe. Wën mer mitlayt tsayche, khene ti layt mee iwer Yeehoowa lërne, tee woo “raych in parmhërtslichkheet” is, un tas lost uns aarich froo. (Ëfe. 2:4)

12. Wii mitlayt yets ëntwikele khan uns foer perayte fer ti kroos tripulatsyoon? (Apokalipsis 13:16, 17)

¹² Warom wërt es neetich mitlayt tsayche torich ti kroos tripulatsyoon? Ti Piipel saat tas tii woo ti rechiirunge fon te welt net pay xteen, tuun propleeme mit mache — yets un torich ti kroos tripulatsyoon. (Lees Apokalipsis 13:16, 17.)e Fiilaycht, prayche ti priiter un xwestere hilef kriin fer tas neetiches hon. Wën unser Kheenich Yeesus ti mënxe richte khomt, wole mer hon tas tee uns fint soo lang wii mer mitlayt am tsayche sin un tas eyer uns tan in laat ‘tas Raych ërpe’. (Mat. 25:34-40)

FERXTËRK TAYN LIIP

13. Tëm noo Romaaner 15:7, wii hon ti eyerste kriste ti liip eene tsu te anere ferxtërkt?

¹³ Ti liip hot ti eyerste kriste itentifitsiirt. Awer waar es tëne laycht liip tsayche? Mërk mool ti unerxiitliche sorte layt woo teel fon te kemaynt in Roma waare: etliche waare yuute, woo kelërnt hon tas mosayxe Kesets aan heere; awer anere waare fon te natsyoone un sin mit unerxiitliche kewoonheete kroos ketsoo kep. Tsiimlich sicher etliche fon te kriste waare sklaawe un anere waare fray mënxe — fiilaycht etliche fon tëne hate soo kaar sklaawe. Yaa, ti kriste waare kans anerste. Wii khonte se too triwer wech khome un sayn liip ferxtërke? Te aphostel Phaul hot se aan kereet eene ti anere “hërtslich aan nëme”. (Lees Romaaner 15:7.)f Was wolt eyer saan? Tas kreekix wort woo Phaul too penutst hot, petayt yemant kuut un krooshërtslich aan nëme, soo wii in sayn haus orer pay sayn fraaynte. Phaul hot, tsum payxpiil, fer Fileemon kesaat wii eyer solt Onësimus — een sklaaw woo aus keris is — aan nëme: “Nëm tëm kuut aan.” (File. 17) Akila un Prisila hon Apolo, woo weenicher iwer ti kristliche inlërnunge wii tëne wust, in sayn haus hërtslich aan kenom. (Aph. 18:26) Ti kriste sin net aus naner kang wayl se anerste waare, awer tii hon eene te aner hërtslich aan kenom.

14. Wii hon Anna un sayn man liip ketsaycht?

¹⁴ Een aner aat wii mer khene liip fer unser priiter un xwestere tsayche, is tëne sayn fraaynte sin un tsayt mit tëne fertraype. Tas tuut tëne aach uf muute liip tsu uns tsayche. (2 Kor. 6:11-13) Kuk mool ti speryens fon Anna un sayn man, woo misyoneere sin. Klaych wii se sich kewanert hon fer een nay insetsung in Oëst Afrika, hot ti pantemii fon coronavirus aan kefang. Tes weeche khonte se sich net perseenlich mit te kemaynt fersamele un es waar aach xweyer ti priiter un xwestere khëne lërne. Wii khent tas pheyerche liip tsayche? Tii hon mit te priiter fom plats kexproch torich wiiteokonferëns un tii hon kesaat tas se wolte tëne peser khëne lërne. Ti familye sin petanklich kep weeche ti liip woo ti misyoneere ketsaycht hon un tii hon aan kefang tëne ofts aan ruufe un mensagens xike. Warom hon ti misyoneere sich aan kextrengt fer ti priiter fom plats peser khëne lërne? Anna saat: “Ich ferkese mich nii ti liip woo ti priiter fer mayn familye ketsaycht hon in te kuute un xlechte tsayte. Sayn payxpiil hot mich uf kemuut liip tsayche.”

15. Was host tuu kelërnt mit Vanessa sayn payxpiil iwer al unser priiter un xwestere liipe? (Kuk aach tas pilt.)

¹⁵ Fiile fon uns sin in een kemaynt woo ti priiter unerxiitliche kultuure, personaliteete un kewoonheete hon. Meyer khene unser liip tsu tëne al ferxtërke wën mer uns traan hale aan tëne sayn kuute kwaliteete. Vanessa, een xwester woo in Nay Seelant leept, hot es imer xweyer kefun kuut rom khome mit etliche priiter un xwestere fon sayn kemaynt. Opwool se pees kep is mit te personaliteet woo etliche hate, hot se ëntxlist mee tsayt mit tëne plaype, xtats sich wech fon tëne hale. Tas hot Vanessa keholef se mërke was Yeehoowa in te priiter siit. Tii saat: “Tsayt mayn man aan kefang hot wii sirkuyt superintentent tiine, plaype mer mee mit priiter woo unerxiitliche personaliteete hon. Un yets is es fer mich laychter mit tëne kuut rom khome. Yets liipe ich ti unerxiite tswixich ti layt. Sicher Yeehoowa liipt tas aach, wayl ti layt woo eyer lost tëm aan peete, sin kans anerste tswixich sich.” Wën mer lërne ti layt siin wii Yeehoowa se siit, tsayche mer unser liip tsu tëne. (2 Kor. 8:24)

16. Warom wërt es neetich unser priiter un xwestere liipe torich ti kroos tripulatsyoon? (Kuk aach tas pilt.)

¹⁶ Ti liip wërt aarich wichtich sin torich ti kroos tripulatsyoon. Wën se aan fangt, wii meecht Yeehoowa uns xitse? Kuk mool was eyer sayn folek aan kereet hot se mache wii ti friirix Papiloon atakiirt kep is: “Keet, mayn folek, keet in ayre tsimere rin un macht ti teere hinich aych tsu. Ferxtekelt aych fer een tsayt pis ti wuut torich keet.” (Isa. 26:20) Khan sin tas mer mise tiise selwich oryentiirung aan heere torich ti kroos tripulatsyoon. Ti “tsimere” khene ti kemaynte petayte. Yeehoowa ferxprecht uns torich ti kroos tripulatsyoon xitse wën mer wayter eenich mit unser priiter un xwestere plaype. Tes weeche mise mer uns yets aan xtrenge, net ploos fer unser priiter un xwestere aus hale, awer aach fer tëne wërklich liipe. Unser retung hëngt too tefun ap!

TUU TICH YETS FOER PERAYTE!

17. Wën mer uns yets foer perayte, was kriin mer kemacht torich ti kroos tripulatsyoon?

¹⁷ “Yeehoowa sayn kroose taach” wërt een aarich xlim tsayt sin fer al ti mënxe — Kot sayn folek tepay! (Sof. 1:14, 15) Awer wën mer uns yets foer perayte, khene mer uns in ruu hale un ti anere helfe. Ekaal te propleem woo mer mit mache, tuun mer persewerans tsayche. Wën unser priiter layte, tuun mer mitlayt tsayche un unser pestes mache fer tëne helfe tas neetiches hon. Un wën mer xon yets lërne unser priiter un xwestere liipe, tuun mer tëne wayter liip im futuer tsayche. Yeehoowa tuut tan uns peloone mit eewiche leepe in een welt woo mer ferkese tuun was unklike un xwiirichkheete sin. (Isa. 65:17)