1 Kwonik

14 Iram+, wa vil Ti, te voye moun pot mesaj bay David e l te voye bwa sèd, bòs ki konn taye wòch* ak bòs ki konn travay bwa pou yo bati yon kay* pou David+. 2 Epi, David te wè se Jewova ki mete l wa sou pèp Izrayèl la+, paske li te leve wayòm li an byen wo pou byen pèp Izrayèl la+.

3 David te vin gen plis madan marye+ nan Jerizalèm e li te vin gen plis pitit gason ak plis pitit fi+. 4 Men non pitit li te vin genyen nan Jerizalèm yo+: Chamwa, Chobab, Natan+, Salomon+, 5 Iba, Elichouwa, Èlpelèt, 6 Noga, Nefèg, Jafya, 7 Elichama, Beyelyada ak Elifelèt.

8 Lè moun Filisti yo tande yo chwazi David kòm wa sou tout pèp Izrayèl la+, yo tout monte pou y al dèyè David+. Lè David aprann sa, li soti pou l goumen avèk yo. 9 Apre sa, moun Filisti yo vini e yo te kontinye atake moun ki nan Vale* Refayim+ yo. 10 Epi, David mande Bondye: “Èske m mèt monte al goumen ak moun Filisti yo? Èske w ap lage yo nan men m?” Lè sa a, Jewova di l: “Ou mèt monte, m ap lage yo nan men w san mank+.” 11 Vrèmanvre, David monte Baalperazim+, li touye moun Filisti yo nan zòn sa a. Apre sa, David di: “Vrè Dye a sèvi avè m pou l kraze ènmi m yo tankou yon kote dlo pase li kraze.” Se sa k fè yo te rele zòn sa a Baalperazim*. 12 Moun Filisti yo te kite zidòl yo te genyen yo nan zòn nan, e moun ki te avèk David yo te boule yo nan dife sou lòd David+.

13 Annapre, moun Filisti yo vin atake moun ki nan vale a yon lòt fwa ankò+. 14 Yon lòt fwa ankò, David mande Bondye sa pou l fè, men vrè Dye a di l: “Pa monte dwat sou yo. Okontrè, al pase pa dèyè yo, epi atake yo anfas kote ki gen touf bwa a*+. 15 Lè w tande yon bri nan tèt pyebwa yo ki tankou bri moun k ap mache, ou mèt atake yo, paske vrè Dye a ap pase devan w pou l touye sòlda ki nan lame Filisti a+.” 16 Vrèmanvre, David fè egzakteman sa vrè Dye a ba l lòd fè a+, epi yo touye moun Filisti yo soti Gabawon rive Gezè+. 17 Se konsa moun nan tout peyi te vin konnen David, e Jewova te fè moun nan tout nasyon pè l+.