Eklezyas

6 Gen yon lòt malè* mwen wè ankò sou tè a*, e se yon bagay ki rive anpil moun: 2 Vrè Dye a bay yon moun richès ak anpil byen ansanm ak anpil glwa, yon fason pou moun sa a gen tout sa l vle*. Men, vrè Dye a pa pèmèt li jwi yo, se yon lòt moun ki gendwa ap jwi yo. Sa a tou ap pase, e se kòmsi moun sa a te gen yon move maladi. 3 Si yon moun ta vin papa 100 fwa, li ta viv anpil ane, epi li vin granmoun, men li* pa jwi bon bagay li genyen yo anvan l al nan tonm*, ebyen, fò m di yon timoun ki fèt tou mouri pi bon pase l+. 4 Paske, timoun sa a te fèt pou granmesi. Li mouri nan fènwa. Epi, fènwa kouvri non l. 5 Se vre timoun ki fèt tou mouri a pa t janm wè solèy e li pa t janm konn anyen, men, li toujou pi bon* pase moun sa a+. 6 Ki avantaj yon moun ap jwenn si l viv 2 000 an, men li pa janm konn sa k rele kè kontan? Èske tout moun pa pral menm kote+?

7 Tout travay di yon moun ap fè se pou bouch li+. Malgre sa, vant* li pa janm plen. 8 Paske ki avantaj yon moun ki gen sajès genyen sou yon moun ki sòt+, oubyen sa sa ap itil moun ki malere a si l konn ki sa pou l fè pou l viv*? 9 Li pi bon pou w pwofite sa w gen devan je w pase pou w anvi sa w pa ka genyen*. Sa a tou ap pase, se kòmsi se dèyè van w ap kouri.

10 Kèlkeswa sa ki egziste a, yo te deja ba l yon non. Epitou, sa lòm ye parèt byen klè. Li pa ka nan diskisyon* ak yon moun ki gen plis fòs pase l. 11 Tank gen pawòl*, se tank yo pa vo anyen. E ki sa moun jwenn nan sa? 12 Kiyès ki konnen ki sa ki pi bon pou yon moun fè nan lavi a pandan ti tan l ap viv pou granmesi a, kote lavi l pase tankou lonbray+? Paske kiyès ki ka di yon moun sa k pral rive sou tè a apre l fin mouri?