Nonb
21 Lè wa Arad la, moun Kanaran+ ki te abite Negèb, te tande Izrayelit yo rive toupre wout Atarim, li t al atake yo e li te pran kèk ladan yo kòm prizonye. 2 Se sa k fè Izrayelit yo te fè Jewova yon pwomès, yo te di l: “Si w lage pèp sa a nan men nou, n ap detwi tout vil yo genyen yo san mank.” 3 Jewova te koute sa pèp Izrayèl la te di a e li te lage moun Kanaran yo nan men yo, yo te detwi yo ansanm ak vil yo genyen yo. Se poutèt sa yo te rele zòn sa a Òma*+.
4 Pandan yo t ap kontinye chemen yo soti Mòn Ò+ ki toupre Lanmè Wouj, yon fason pou yo pa t pase nan peyi Edòm+, vwayaj la te fè pèp la* fatige anpil. 5 Moun yo te kontinye ap pale kont Bondye ak Moyiz+, yo t ap di: “Poukisa nou te fè nou monte kite peyi Ejip pou nou vin mouri nan dezè a? Pa gen ni manje ni dlo isit la+, epi nou* vin rayi* vye manje sa a+.” 6 Se sa k fè Jewova te voye yon seri sèpan ki gen pwazon nan mitan pèp la e yo te pran mòde pèp la. Konsa, anpil Izrayelit te mouri+.
7 Se poutèt sa pèp la te vin kot Moyiz, yo te di l: “Nou te peche lè nou te pale kont Jewova e kont ou a+. Pale ak Jewova pou l ka retire sèpan yo pou nou.” Epi, Moyiz te pale avè l pou pèp la+. 8 Apre sa, Jewova di Moyiz: “Fè estati yon koulèv ki gen pwazon epi mete l sou yon poto. Konsa, nenpòt moun koulèv mòde dwe gade estati koulèv la pou l pa mouri.” 9 Menm kote a, Moyiz fè yon sèpan an kuiv+ e li mete l sou yon poto+. Nenpòt lè yon sèpan te mòde yon moun, moun nan te gade sèpan an kuiv la, li te rete vivan+.
10 Annapre, Izrayelit yo te deplase, yo t al monte tant yo Obòt+. 11 Ansuit, yo te kite Obòt e yo t al monte tant yo Ijeyabarim+, nan dezè ki anfas Mowab la, nan direksyon lès. 12 Lè yo kite zòn sa a, y al monte tant yo toupre Vale Zerèd+. 13 Apre sa, yo deplase epi y al monte tant yo nan zòn Vale Anon+, ki nan dezè a, ki soti depi nan fwontyè Amorit yo. Paske se Vale Anon ki fwontyè peyi Mowab, ki separe peyi moun Mowab yo ak peyi Amorit yo. 14 Se sa k fè liv Lagè Jewova yo pale de zòn “Vayèb ki nan Soufa, Vale Anon yo 15 ak pant* vale yo ki rive jis kote moun yo te abite nan vil A e ki rive toupre fwontyè peyi Mowab.”
16 Annapre, yo t ale nan zòn Beyè, kote ki gen pi dlo a. Jewova te pale ak Moyiz de pi sa a, lè l te di: “Rasanble pèp la pou m ba yo dlo.”
17 Lè sa a, pèp Izrayèl la chante yon chante ki di:
“Fè dlo monte, ou menm, pi! Annou chante pou li!
18 Se pi prens yo te fouye a, se pi gwo potanta nan pèp la te fouye a,
Yo te fè sa ak baton dirijan an e avèk pwòp baton pa yo.”
Apre sa, yo soti nan dezè a pou y ale Matana. 19 Epi, yo soti Matana pou y ale Naalyèl, e detan yo Naalyèl, y ale Bamòt+. 20 Yo kite Bamòt pou y ale nan vale ki nan tèritwa* Mowab la+, sou tèt Mòn Pisga+ ki bay sou Jechimon*+.
21 Kounye a, pèp Izrayèl la voye kèk moun al di Siyon, wa Amorit yo+: 22 “Kite nou pase nan peyi w la. Nou pap pase nan okenn jaden, ni nan okenn plantasyon rezen. Nou pap bwè dlo nan okenn pi. N ap pase tou dwat nan wout Wa a, jiskaske nou fin pase nan tèritwa w la+.” 23 Men, Siyon pa t kite pèp Izrayèl la pase nan tèritwa l la. Okontrè, Siyon te rasanble tout pèp li a e li te pati al dèyè pèp Izrayèl la nan dezè a. Lè l rive Jahaz, li kòmanse batay ak pèp Izrayèl la+. 24 Men, pèp Izrayèl la te pote laviktwa sou li ak epe+, epi yo pran peyi l la+, soti Vale Anon+ rive Vale Jabòk+ ki toupre desandan Amon yo. Li pa t rive pi lwen pase vil Jazè paske Jazè+ te gen menm fwontyè ak tèritwa desandan Amon yo+.
25 Se konsa, pèp Izrayèl la te pran tout vil sa yo e yo te kòmanse abite nan tout vil Amorit yo+, ki nan Esbon, ak tout vil ki ozalantou l yo e ki sou kont li. 26 Esbon se te vil kote Siyon, wa Amorit yo, te batay ak wa Mowab la e li te pran tout tèritwa wa Mowab la te genyen, rive jis Vale Anon. 27 Se sa k fè, vin gen yon pawòl ki di:
“Vin Esbon.
Se pou yo bati vil Siyon an e se pou yo mete l kanpe fèm!
28 Paske gen yon dife ki soti Esbon, yon flanm dife ki soti nan vil Siyon an.
Li boule vil A nan peyi Mowab ak tout chèf ki abite sou tèt Vale Anon yo.
29 Malè pou nou, moun Mowab! Moun pa Kemòch+ yo, n ap peri!
Kemòch lakòz pitit gason l yo al nan mawon e li kite Siyon, wa Amorit yo, fè pitit fi l yo vin prizonye.
30 Ann atake yo,
N ap detwi Esbon rive jis Dibon+,
Ann ravaje l rive jis Nofa,
E gen yon dife k ap rive jis Medeba+.”
31 Konsa, Izrayèl te vin abite nan peyi Amorit yo. 32 Annapre, Moyiz te voye kèk mesye kòm espyon nan vil Jazè+. Yo te pran vil ki ozalantou Jazè yo e ki sou kont li yo, epi yo te mete Amorit ki t ap viv nan vil sa yo deyò. 33 Apre sa, yo chanje direksyon e yo monte nan wout ki mennen Bazan an. Epi, Òg+, wa Bazan an, soti ak tout pèp li a pou yo vin batay avèk yo nan Edreyi+. 34 Epi, Jewova di Moyiz: “Pinga w pè l+, paske m ap lage l nan men w ansanm ak tout pèp li a ak tout peyi l la+, e w ap fè l menm sa w te fè Siyon, wa Amorit yo, ki t ap viv Esbon+.” 35 Konsa, yo te kontinye bat wa a ansanm ak pitit gason l yo ak tout pèp li a jiskaske pa t ret yon moun nan pèp la ki te ret vivan+. Apre sa, yo pran peyi l la+.