Nonb

3 Kounye a, men moun ki te nan fanmi Arawon ak Moyiz nan epòk Jewova te pale ak Moyiz sou Mòn Sinayi+: 2 Non pitit gason Arawon yo se te Nadab, premye pitit li, Abiyou+, Eleyaza+ ak Itama+. 3 Se konsa pitit gason Arawon yo te rele. Yo te prèt Bondye te chwazi e yo te ba yo pouvwa pou yo sèvi antanke prèt+. 4 Men, Nadab ak Abiyou te mouri devan Jewova lè yo te prezante yon dife yo pa t gen dwa prezante devan Jewova+ nan Dezè Sinayi a, e mesye sa yo pa t gen pitit. Eleyaza+ ak Itama+ yo menm te kontinye sèvi antanke prèt ansanm ak Arawon, papa yo.

5 Annapre, Jewova te di Moyiz: 6 “Fè tribi Levi a pwoche+ e fè yo kanpe devan Arawon, prèt la, pou yo sèvi+ bò kote l. 7 Yo dwe fè travay Arawon ba yo fè yo e yo dwe sèvi tout pèp la devan tant reyinyon an, lè yo fè travay yo genyen ki gen rapò ak tabènak* la. 8 Yo dwe pran swen tout bagay+ ki nan tant reyinyon an e yo dwe fè travay yo pou Izrayelit yo lè yo fè travay ki gen rapò ak tabènak la+. 9 Ou dwe fè Levit yo travay ak Arawon ansanm ak pitit gason l yo. Se Bondye ki mete yo apa pami Izrayelit yo+ pou yo travay ak Arawon. 10 Ou dwe mete Arawon ak pitit gason l yo nan fonksyon yo, yo dwe fè sèvis yo kòm prèt+. Nenpòt moun ki pa gen dwa* ki ta pwoche bò tabènak la, yo dwe touye l+.”

11 Jewova te kontinye pale ak Moyiz, li te di l: 12 “Gade! Mwen pran Levit yo pami Izrayelit yo nan plas tout premye pitit Izrayelit yo+. Se pou mwen Levit yo ap ye. 13 Paske tout premye pitit se pou mwen+. Lè m te touye tout premye pitit nan peyi Ejip yo+, mwen te mete tout premye pitit pami Izrayelit yo apa pou mwen, ni moun ni bèt+. Se pou mwen yo dwe vin ye. Mwen se Jewova.”

14 Apre sa, Jewova pale ak Moyiz nan Dezè Sinayi a+, li di l: 15 “Anrejistre desandan Levi yo selon fanmi papa yo ak fanmi yo. Ou dwe anrejistre tout gason, tout sa ki gen yon mwa oswa plis+.” 16 Konsa, Moyiz te anrejistre yo sou lòd Jewova, jan l te mande l la. 17 Men non pitit gason Levi yo: Gèchon, Keyat ak Merari+.

18 Kounye a, men non pitit gason Gèchon yo, selon fanmi kote yo soti: Libni ak Chimeyi+.

19 Pitit gason Keyat yo, selon fanmi kote yo soti, se te Amram, Izeya, Ebwon ak Ouzyèl+.

20 Pitit gason Merari yo, selon fanmi kote yo soti, se te Mali+ ak Mouchi+.

Moun sa yo se fanmi Levit yo, selon zansèt yo.

21 Gèchon se zansèt moun ki sot nan fanmi Libni+ ak nan fanmi Chimeyi. Moun sa yo sot nan fanmi Gèchon. 22 Kantite gason yo te anrejistre nan fanmi moun sa yo, sa ki gen yon mwa oswa plis, se 7 500+. 23 Moun ki sot nan fanmi Gèchon yo te monte tant yo dèyè tabènak la+, nan direksyon lwès. 24 Chèf moun ki sot nan fanmi Gèchon yo, selon fanmi yo bò kot papa, se te Elyasaf, pitit Layèl. 25 Men responsablite pitit gason Gèchon yo+ te genyen nan tant reyinyon an: Yo te gen pou yo pran swen tabènak la ak tant lan+, tout sa ki te kouvri tant lan+, rido+ ki nan antre tant reyinyon an, 26 rido+ ki bare lakou a, rido+ ki nan antre lakou ki toutotou tabènak la ak lotèl la ansanm ak kòd tant lan, e yo te gen pou yo fè tout travay ki gen rapò ak bagay sa yo.

27 Keyat se zansèt moun ki sot nan fanmi Amram, fanmi Izeya, fanmi Ebwon ak fanmi Ouzyèl. Moun sa yo sot nan fanmi Keyat+. 28 Kantite gason ki sot nan fanmi sa yo, sa ki gen yon mwa oswa plis, se 8 600. Se yo ki te gen responsablite pou yo pran swen kote ki sakre a+. 29 Fanmi pitit gason Keyat yo te monte tant yo nan sid tabènak la+. 30 Chèf moun ki sot nan fanmi Keyat yo, selon fanmi yo bò kot papa, se te Elizafan, pitit Ouzyèl+. 31 Yo te gen responsablite pou yo pran swen Lach la+, tab la+, pòtlanp lan+, lotèl yo+, bagay yo+ te konn itilize nan sèvis yo t ap fè nan kote ki sakre a, rido a+, e yo te gen pou yo fè tout travay ki gen rapò ak bagay sa yo+.

32 Chèf ki alatèt Levit yo se Eleyaza+, pitit Arawon, prèt la. Li te gen pou l sipèvize travay moun ki te gen responsablite pou yo pran swen kote ki sakre a.

33 Merari se zansèt moun ki sot nan fanmi Mali ak fanmi Mouchi. Moun sa yo sot nan fanmi Merari+. 34 Kantite gason yo te anrejistre nan fanmi moun sa yo, sa ki gen yon mwa oswa plis, se 6 200+. 35 Chèf moun ki sot nan fanmi Merari yo, selon fanmi yo bò kot papa, se Zouryèl, pitit Abikayil. Yo te monte tant yo nan nò tabènak la+. 36 Pitit gason Merari yo te gen responsablite pou yo siveye ankadreman+ ki soutni tabènak la, travès li yo+, poto l yo+, sipò ki anba poto yo, tout veso l yo+ ak tout travay ki gen rapò ak bagay sa yo+, 37 ansanm ak poto ki te toutotou lakou a ak baz poto l yo+, pikèt tant lan genyen yo ansanm ak kòd tant lan genyen yo.

38 Moyiz, Arawon ansanm ak pitit gason Arawon yo te monte tant yo anfas tabènak la, nan direksyon lès, devan tant reyinyon an, nan direksyon solèy leve. Yo te gen responsablite pou yo pran swen tabènak la kòm travay yo dwe fè pou Izrayelit yo. Nenpòt moun ki pa gen dwa* ki ta pwoche bò tabènak la, yo dwe touye l+.

39 Tout gason ki Levit ki gen yon mwa oswa plis Moyiz ak Arawon te anrejistre sou lòd Jewova, selon fanmi kote yo soti, se te 22 000.

40 Apre sa, Jewova di Moyiz: “Anrejistre tout premye pitit gason Izrayelit yo, sa ki gen yon mwa oswa plis+. Konte yo, epi fè yon lis ak non yo. 41 Ou dwe pran Levit yo nan plas tout premye pitit Izrayelit yo+ pou mwen, epi pran bèt Levit yo genyen yo nan plas tout premye pitit bèt Izrayelit yo genyen yo+. Mwen se Jewova.” 42 Epi, Moyiz te anrejistre tout premye pitit Izrayelit yo, jan Jewova te ba l lòd fè sa. 43 Kantite premye pitit gason yo te anrejistre selon non yo, sa ki te gen yon mwa oswa plis, se te 22 273.

44 Jewova te kontinye pale ak Moyiz, li te di l: 45 “Pran Levit yo nan plas tout premye pitit Izrayelit yo, epi pran bèt Levit yo nan plas bèt Izrayelit yo. Se pou mwen Levit yo dwe ye. Mwen se Jewova. 46 Men pri y ap peye+ pou 273 premye pitit Izrayelit yo ki anplis Levit yo+: 47 Ou dwe pran senk chekèl* pou chak moun+, dapre chekèl ki nan kote ki sakre a*. Yon chekèl egal 20 gera*+. 48 Ou dwe bay Arawon ak pitit gason l yo lajan yo peye pou moun ki anplis yo.” 49 Se konsa, Moyiz te pran lajan yo peye pou moun ki anplis kantite moun Levit yo te ranplase yo. 50 Li te pran lajan yo te peye pou premye pitit Izrayelit yo, se te 1 365 chekèl, dapre chekèl ki nan kote ki sakre a*. 51 Apre sa, Moyiz te bay Arawon ak pitit gason l yo lajan an, jan Jewova te di l la, dapre lòd Jewova te ba li.