Bon nouvèl la itil pou lokalite w rete a
NAN monn jodi a nou tande moun di souvan : “ Prensip ki nan krisyanis la pa itil anyen. Yo pap bay bon rezilta nan sosyete konplike nou genyen jounen jodi a. ” Sepandan, gen yon rapò sou yon konvèsasyon ki te fèt ant Mohandas K. Gandhi, yon lidè endou, ak ansyen viswa britanik peyi Lenn nan, Lord Irwin, ki montre tout moun pa wè bagay la konsa. Yo di nou, Lord Irwin te mande Gandhi ki sa l panse ki ta ka rezoud pwoblèm ki genyen ant peyi Grann Bretay ak peyi Lenn. Gandhi te pran yon Bib, li ouvri l nan senkyèm chapit liv Matye a. Apresa li di : “ Lè peyi pa w ak peyi pa m rive fè yon antant ki chita sou ansèyman Kris te bay nan Sèmon sou montay la, nonsèlman lè sa a n ap jwenn solisyon pwoblèm de peyi nou yo, men n ap jwenn solisyon pou pwoblèm lemonnantye. ”
Sèmon sa a di moun fèt pou chèche vin espirityèl, pou yo gen karaktè dou, pou yo pezib, pou yo gen mizèrikòd, e pou yo renmen sa ki dwat. Li pa sèlman kondane zak asasinay, men li kondane moun ki rete fache ak lòt moun. Li pa annik kondane adiltè, men li kondane move dezi tou. Li pale kont divòs moun ap fè san reflechi ki detwi fanmi epi ki fè timoun soufri. Li di nou : ‘ Se pou w renmen menm moun ki pa renmen w, lonje lamen bay moun ki nan nesesite, sispann jije san mizèrikòd, aji ak moun menm jan ou ta renmen yo aji avèk ou. ’ Tout konsèy sa yo ap itil anpil anpil, si moun mete yo an pratik. Tank gen plis moun nan lokalite w rete a ki mete yo an pratik, se tank lokalite a ap vin pi bon !
Temwen Jehova yo jwe yon gwo wòl nan sans sa a. Labib aprann yo respekte maryaj. Yo bay pitit yo bon fòmasyon selon prensip ki dwat. Yo souliye enpòtans fanmi genyen. Fanmi ki gen tèt ansanm, se benediksyon sa ye pou lokalite w rete a, menm pou nasyon an. Listwa chaje ak egzanp yon seri pisans mondyal ki tonbe lè relasyon ant manm fanmi te vin fèb epi lavi imoral t ap grenpe nechèl. Lè gen plis moun ak plis fanmi Temwen Jewova yo ede viv ann akò ak prensip kretyen yo, sa ap fè delenkans, lavi imoral ak krim diminye nan lokalite w rete a.
Youn nan gwo pwoblèm ki yon pwa lou pou vil yo ak nasyon yo, se prejije ras. An kontradiksyon avèk sa, men sa apot Pyè te di : “ Vrèman, mwen rann mwen kont Bondye pa gen patipri, men, nan tout nasyon yon moun ki gen lakrentif li e ki pratike sa ki jis, li pran plezi nan li. ” Kanta pou Pòl, men sa l te ekri : “ Pa gen ni Jwif ni Grèk, pa gen ni esklav ni òm lib, pa gen ni mal ni femèl, paske nou tout se yon sèl moun ann inyon ak Kris Jezi. ” (Travay 10:34, 35 ; Galat 3:28). Temwen Jewova yo dakò ak pawòl sa yo. Nan biwo santral yo a, nan filyal yo ak nan kongregasyon yo, tout ras moun, tout koulè moun, ap viv ansanm e y ap travay ansanm.
Ann Afrik gen tribi ki pa ka viv ansanm san pa gen gwo akwochay. Epoutan, ki sa k pase nan kongrè Temwen Jewova yo òganize ? Moun ki sot nan divès tribi, yo manje ansanm, yo dòmi ansanm, e yo adore Bondye ansanm nan yon amoni total, nan yon fratènite ki pa gen parèy. Otorite nan gouvènman yo te sezi wè yon bagay konsa. Yon egzanp sou efè inyon sa a genyen nan vrè krisyanis la, se nan kòmantè yon jounal Nouyòk yo rele Amsterdam News ki pote dat 2 out 1958 nou jwenn li. Kòmantè jounal la te chita sou sa yo te wè nan kongrè entènasyonal nou te pale pi wo a, kote plis pase 250 000 Temwen te reyini nan lavil Nouyòk. Li di :
“ Tout kote w pase ou jwenn Nwa, Blan, Jòn, ki nan tout ran sosyal e ki soti toupatou nan lemonn, melanje, tèt ansanm lib e libè nan lakontantman. [...] Temwen yo te soti nan 120 peyi, yo t ap viv ansanm nan lapè, yon fason pou montre Ameriken ki jan bagay yo ka fèt fasil. [...] Kongrè a te yon modèl ki klè sou jan moun kapab travay, ak sou jan yo kapab viv ansanm. ”
Gen kantite moun ki kapab di prensip krisyanis la pa reyèlman itil nan monn modèn nan. Sepandan, ki lòt prensip ki bay bon rezilta, oswa kilès lòt ki pral bay bon rezilta sa a ? Si moun nan lokalite w rete a mete prensip kretyen yo an pratik depi kounye a, y ap wè ki valè yo genyen toutbonvre. Se prensip sa yo ki baz pou ini ‘ tout nasyon, tout tribi ak tout pèp ’ sou tè a, lè se Wayòm Bondye a ki pral gouvènen limanite. — Revelasyon 7:9, 10.
[Antrefilè nan paj 23]
Moun tout ras, tout koulè ap travay ansanm.
[Antrefilè nan paj 24]
Krisyanis la bay bon rezilta. Pa gen tankou l.