Jezi “te aprann obeyisans”

Jezi te toujou obeyi Jewova (Jan 8:29). Kounye a, poukisa Bib la di: “Li te aprann obeyisans nan bagay li te sibi yo”? — Ebre 5:8.

Lè Jezi te sou tè a, li te fè fas ak yon seri sitiyasyon li pa t konn jwenn nan syèl la. Paran l yo ki te leve l te renmen Jewova, men yo te enpafè (Lik 2:51). Li te sibi move tretman anba men yon seri chèf relijye ki te kòwonpi ak yon seri dirijan ki te mechan (Mat. 26:59; Mak 15:15). Anplis de sa, li te imilye tèt li e “li te vin obeyisan jis li mouri” yon fason ki atwòs. — Flp. 2:8.

Eksperyans sa yo te aprann Jezi gen obeyisans yon fason li pa t janm aprann nan syèl la. Konsa, li te kapab vini Wa pafè a ak Gran Prèt ki konprann nou an (Ebre 4:15; 5:9). Jezi te vin gen plis valè toujou pou Jewova apre l te fin aprann obeyisans nan bagay li te sibi yo. Nou menm tou, nou kapab vin gen plis valè pou Jewova, e nou ka plis itil li nan kèlkeswa asiyasyon li ban nou lè nou rete fidèl nan kèlkeswa sitiyasyon difisil nou rankontre. — Jak 1:4.