Chapit 50

Li prepare yo pou yo fè fas ak pèsekisyon

APRE Jezi fin bay apot li yo metòd pou yo fè travay predikasyon an, li ba yo avètisman konsènan opozan yo. Li di: “Gade! M ap voye nou tankou mouton nan mitan lou [...]. Pran prekosyon nou ak moun yo. Paske, y ap rele nou nan tribinal, e y ap bat nou ak kout fwèt nan sinagòg yo. Wi, y ap mennen nou devan gouvènè, devan wa, poutèt mwen.”

Malgre gwo pèsekisyon k ap tann disip Jezi yo, men asirans li ba yo: “Lè yo rele nou nan tribinal, pa enkyete nou pou fason n ap gen pou nou pale oswa pou sa n ap gen pou nou di, paske n ap konnen sa n ap gen pou nou di a lè lè a rive. Paske, se pa nou menm sèlman k ap pale, men se lespri Papa nou k ap pale nan nou.”

Apre sa, Jezi di: “Anplis de sa, frè pral livre frè l pou yo touye l, e papa pral livre pitit li. Pitit ap leve kont manman yo ak papa yo e y ap fè touye yo.” Ansuit, li di: “Tout moun ap rayi nou poutèt non mwen. Men, moun ki andire jiska lafen an, se moun sa a k ap sove.”

Se travay predikasyon an ki pi enpòtan. Se poutèt sa Jezi ensiste sou nesesite pou nou pridan dekwa pou nou toujou gen libète pou nou fè travay la. Li di: “Lè yo pèsekite nou nan yon vil, kouri al nan yon lòt. Paske, anverite m ap di nou sa: Nou pap gentan fin pase nan tout vil Izrayèl yo anvan Pitit lòm nan vini.”

Se vre, pawòl sa a Jezi te di a ki te gen enstriksyon, avètisman ak ankourajman ladan l lan te konsène 12 apot yo, men tou li konsène moun ki t ap gen pou patisipe nan travay predikasyon mondyal la k ap fèt apre lanmò l ak rezirèksyon l. Sa parèt klè lefètke l te di ‘tout moun t ap rayi’ disip li yo, pa sèlman Izrayelit yo yo te voye apot yo al preche yo. Mete sou sa, lè Jezi te voye apot li yo al fè yon kanpay predikasyon ki pa t dire anpil tan, li klè yo pa t mennen yo devan gouvènè ak wa. Anplis, fanmi moun ki te kwayan yo pa t livre yo lè sa a pou yo touye yo.

Kidonk, lè Jezi te fè konnen disip li yo pa t ap fini kanpay predikasyon y ap fè a “anvan Pitit lòm nan vini”, se bay li te bay yon pwofesi pou fè nou konnen li t ap gentan vini antanke Wa Bondye glorifye ki pral egzekite lòd Li yo nan Amagedòn anvan disip li yo fin fè travay predikasyon konsènan Wayòm Bondye a sou tout tè a.

Jezi kontinye bay disip li yo enstriksyon anrapò ak travay predikasyon an, li di yo: “Yon disip pa siperyè moun k ap anseye l la, e yon esklav pa siperyè mèt li.” Donk, disip Jezi yo dwe atann y ap jwenn menm move tretman ak menm pèsekisyon Jezi te jwenn poutèt li t ap preche Wayòm Bondye a. Epoutan, men avètisman li bay: “Pinga nou pè moun ki ka touye kò a, men ki pa ka touye nanm nan. Men pito, se pou nou pè sila a ki ka detwi ni nanm nan ni kò a nan jeyèn.”

Jezi t apral bay egzanp nan sans sa a. Avèk kouraj, li t apral afwonte lanmò olye l montre li pa fidèl anvè Jewova Dye, Sila a ki gen tout pouvwa a. Wi, se Jewova ki kapab detwi “nanm” yon moun (sa vle di nan ka sa a esperans moun nan genyen pou l egziste alavni antanke nanm vivan) oubyen okontrè se li ki kapab resisite yon moun pou l gen lavi ki pap janm fini an. Jewova, Papa nou ki nan syèl la, se vrèman yon papa ki gen lanmou ak konpasyon!

Apre sa, pou Jezi ankouraje disip li yo, li itilize yon egzanp ki montre jan Jewova demontre lanmou nan fason li pran swen yo. Li mande yo: “Èske yo pa vann de tikit pou yon ti pyès monnen ki pa gen anpil valè?” Apre sa, li di: “Epoutan, pa gen youn nan yo k ap tonbe atè san Papa nou pa konnen. Men nou menm, li konte ata branch cheve nan tèt nou. Se sa k fè, nou pa bezwen pè: nou gen plis valè pase yon bann tikit met ansanm.”

Mesaj Wayòm Jezi bay disip li yo misyon pou yo preche a pral met divizyon nan mitan moun ki abite nan menm kay, etandone nan yon fanmi ap gen kèk moun k ap aksepte l epi ap gen lòt k ap rejte l. Li esplike yo: “Pinga nou panse se lapè mwen vin met sou latè. Se pa lapè mwen vin mete, men se divizyon.” Kidonk, sa mande kouraj pou yon moun nan yon fanmi aplike verite ki nan Bib la. Jezi di: “Yon moun ki gen plis afeksyon pou papa l oswa pou manman l pase m, pa merite pou l disip mwen, e yon moun ki gen plis afeksyon pou pitit gason l oswa pou pitit fi l pase m, pa merite pou l disip mwen.”

Alafen, Jezi fè konnen moun ki resevwa disip li yo se li menm yo resevwa tou. “E kèlkeswa moun ki bay youn nan piti sa yo li te mèt se yon sèl vè dlo fre pou l bwè poutèt li se yon disip, anverite m ap di nou sa, moun sa a pa gendwa pèdi rekonpans li.” Matye 10:16-42.

▪ Ki avètisman Jezi bay disip li yo?

▪ Ki ankourajman li ba yo e ki sa l di yo pou rekonfòte yo?

▪ Poukisa enstriksyon Jezi bay yo valab tou pou kretyen k ap viv nan epòk pa nou an?

▪ Nan ki sans yon disip Jezi pa siperyè moun k ap anseye l la?