Chapit 92

Dis moun ki gen lèp geri pandan Jezi ap fè dènye vwayaj li pou l al Jerizalèm

JEZI gate plan manm Sanedren an k ap chèche touye l yo. Li kite Jerizalèm, l al nan vil Efrayim, ki nan nòdès parapò ak Jerizalèm e petèt ki gen anviwon 24 kilomèt sèlman ki separe l avè l. Se la li ret ak disip li yo, lwen ènmi l yo.

Sepandan, fèt Pak ane 33 epòk nou an ap pwoche, e Jezi pa pran tan pou l deplase ankò. Li pase Samari e li monte Galile. Se dènye vizit l ap fè nan zòn sa a anvan l mouri. Pandan l Galile, sanble li menm ak disip li yo kontinye wout la ansanm ak lòt moun ki pral Jerizalèm nan fèt Pak la. Yo pase nan wout ki travèse distri Pere a, nan lès rivyè Jouden.

Nan kòmansman vwayaj la, pandan Jezi ap antre nan yon bouk nan Samari oswa nan Galile, li rankontre dis mesye ki gen lèp. Tikras pa tikras, maladi terib sa a wonyen diferan pati nan kò yon moun ki genyen l. Li wonyen dwèt li, zòtèy li, zòrèy li, nen li ak bouch li. Pou pwoteje lòt moun anba maladi sa a, men sa Lwa Bondye a di konsènan yon moun ki gen lèp: “Li dwe kouvri moustach li e li dwe di byen fò: ‘M pa pwòp, m pa pwòp!’ Pandan tout jou maladi a sou li, li pap pwòp [...]. Li dwe rete lwen moun.”

Dis mesye ki gen lèp yo obeyi entèdiksyon Lalwa bay pou moun ki gen lèp, paske yo rete byen lwen Jezi. Sepandan, yo di byen fò: “Jezi, Anseyan, gen pitye pou nou!”

Jezi wè yo kote yo ye a, li di yo: “Al fè prèt yo wè nou.” Jezi di sa, paske lè yon moun ki gen maladi lèp refè, Lwa Bondye a bay prèt yo otorizasyon pou yo fè konnen moun sa a geri. Konsa, yo bay moun sa a dwa pou l retounen al viv nan mitan moun ki an sante.

Dis mesye ki gen lèp yo gen konfyans nan pouvwa Jezi genyen pou l fè mirak. Se poutèt sa yo kouri al wè prèt yo, menm lè yo poko geri. Pandan yo sou wout, yo jwenn rekonpans poutèt yo gen lafwa nan Jezi. Yo kòmanse wè y ap geri e yo kòmanse santi sa!

Nèf nan moun ki te gen lèp yo kontinye wout yo, men gen youn nan yo, yon Samariten, ki retounen al chèche Jezi. Poukisa? Paske li gen anpil rekonesans pou sa k rive l la. Li bay Bondye glwa byen fò, e lè l jwenn Jezi, li lage kò l nan pye l pou l di l mèsi.

Jezi di l: “Se nou toule dis ki geri, pa vre? Men, kote nèf lòt yo? Yo youn pa t wè li bon pou yo tounen vin bay Bondye glwa, eksepte mesye sa a ki soti nan yon lòt nasyon?”

Apre sa, li di Samariten an: “Leve, ou mèt ale. Lafwa w geri w.”

Pandan n ap li istwa kote Jezi geri dis mesye ki gen lèp yo, nou ta dwe reflechi sou leson ki gen nan kesyon li poze a lè l di: “Men, kote nèf lòt yo?” Lefètke nèf lòt yo montre yo engra, se yon mankman grav. Èske nou menm tou, n ap montre nou gen rekonesans menm jan ak Samariten an pou sa Bondye ban nou, san wete pwomès ki sèten li fè nou pou l ban nou lavi ki pap janm fini an nan monn nouvo jis li a? Jan 11:54, 55; Lik 17:11-19; Levitik 13:16, 17, 45, 46; Revelasyon 21:3, 4.

▪ Ki jan Jezi gate plan moun ki t ap chèche touye l yo?

▪ Ki kote Jezi ale apre sa, e ki kote l vle ale?

▪ Poukisa dis mesye ki gen lèp yo ret byen lwen, e poukisa Jezi di yo pou y al kot prèt yo?

▪ Ki leson nou ka aprann nan sa k pase a?