1^ye pati: Kwayans kretyen yo

Grasa etid biblik ou fè ak Temwen Jewova yo, ou vin konnen laverite. Se sèten sa w aprann yo fè w vin gen bon relasyon ak Bondye e yo fè w gen esperans pou w viv nan yon paradi sou tè a e pou w jwenn anpil benediksyon nan paradi sa a ki pral anba dominasyon Wayòm Bondye a. Lafwa w gen nan Pawòl Bondye a vin pi solid, e lefètke w vin fè pati kongregasyon kretyen an, ou deja jwenn anpil benediksyon. Ou rive wè ki jan Jewova trete pèp li a jodi a. — Zak. 8:23.

Kòm kounye a w ap prepare w pou w batize, gen ansyen nan kongregasyon an ki pral fè revizyon avè w sou kwayans kretyen yo (Ebre 6:1-3). Nou swete pou Jewova kontinye beni tout efò w ap fè pou w konnen l, e nou swete l ap ba w rekonpans li pwomèt la. — Jan 17:3.

1. Poukisa w vle batize?

2. Kiyès Jewova ye?

• “Jewova se vrè Dye a ni nan syèl la ni sou tè a [...]. Apre li pa gen lòt.” — Det. 4:39.

• “Ou menm, ki rele Jewova, ou se Sila a ki nan pi gwo pozisyon an e ki gen pouvwa sou tout tè a.” — Sòm 83:18.

3. Sa k fè l enpòtan pou w sèvi ak non Bondye?

• “Kidonk, men ki jan nou dwe priye: ‘Papa nou ki nan syèl la, se pou non w vin sen.’” — Mat. 6:9.

• “Tout moun ki met konfyans yo nan non Jewova ap sove.” — Wom. 10:13.

4. Bay kèk nan ekspresyon Bib la itilize pou pale de Jewova.

• “Jewova, Kreyatè tout kote ki sou tè a, se Bondye pou tout tan gen tan.” — Eza. 40:28.

• “Papa nou ki nan syèl la.” — Mat. 6:9.

• “Bondye se lanmou.” — 1 Jan 4:8.

5. Ki sa w ka bay Jewova Dye?

• “Nou dwe renmen Jewova, Bondye nou an, ak tout kè nou, ak tout nanm nou, ak tout lespri nou e ak tout fòs nou.” — Mak 12:30.

• “Se Jewova, Bondye w la, ou dwe adore, e se li menm sèl ou dwe bay yon sèvis sakre.” — Lik 4:8.

6. Poukisa w vle fidèl ak Jewova?

• “Pitit mwen, montre w saj e fè kè m kontan, pou m ka reponn moun k ap pwovoke m nan.” — Pwo. 27:11.

7. Kiyès ou priye, e nan non kiyès ou dwe priye?

• “Anverite m ap [Jezi] di nou sa: Si nou mande Papa a yon bagay nan non mwen, l ap ban nou l.” — Jan 16:23.

8. Bay kèk nan bagay ou ka priye pou yo.

• “Kidonk, men ki jan nou dwe priye: ‘Papa nou ki nan syèl la, se pou non w vin sen. Se pou Wayòm ou an vini. Se pou volonte w fèt sou tè a kou nan syèl la. Ban nou pen nou bezwen pou jounen an. Padone peche nou, menm jan nou menm tou nou padone moun ki peche kont nou. E pa kite nou tonbe anba tantasyon, men delivre nou anba Mechan an.’” — Mat. 6:9-13.

• “Men asirans nou gen nan Bondye: kèlkeswa sa nou mande l selon volonte l, li tande nou.” — 1 Jan 5:14.

9. Ki sa k ka fè Jewova pa koute priyè yon moun?

• “Y ap rele Jewova pou yo mande l èd, men li pap reponn yo [...]. Poutèt tout mechanste y ap fè yo.” — Miche 3:4.

• “Je Jewova sou moun ki jis yo e zòrèy li ap koute siplikasyon yo fè. Men, Jewova vire do bay moun k ap fè sa ki mal.” — 1 Pyè 3:12.

10. Kiyès Jezi Kris ye?

• “Simon Pyè reponn: ‘Ou se Kris la, Pitit Bondye vivan an.’” — Mat. 16:16.

11. Poukisa Jezi te vin sou tè a?

• “Pitit lòm nan pa t vini pou moun sèvi l, men li te vini pou l sèvi moun e pou l bay lavi l kòm ranson pou libere anpil moun.” — Mat. 20:28.

• “Mwen [Jezi] dwe al anonse bon nouvèl Wayòm Bondye a nan lòt vil yo tou, paske se pou sa Bondye te voye m.” — Lik 4:43.

12. Ki jan w ka montre w rekonesan pou sakrifis Jezi a?

• “Li te mouri pou tout moun, yon fason pou moun k ap viv yo pa viv pou tèt yo ankò, men pou yo viv pou sila a ki te mouri pou yo a e ki te leve a.” — 2 Kor. 5:15.

13. Ki otorite Jezi genyen?

• “Mwen resevwa tout pouvwa ni nan syèl la ni sou tè a.” — Mat. 28:18.

• “Bondye leve l met nan yon pozisyon ki pi wo, e avèk bonte, li ba l non ki anlè tout lòt non an.” — Flp. 2:9.

14. Èske w kwè se kolèj santral Temwen Jewova yo ki “esklav fidèl” Jezi nome a?

• “Kiyès ki vrèman esklav fidèl ki prevwayan an mèt li met responsab sèvitè ki lakay li yo pou ba yo manje nan bon moman?” — Mat. 24:45.

15. Èske lespri sen se yon moun?

• “Zanj lan reponn, li di l: ‘Lespri sen ap vin sou ou e pisans Sila a ki nan pi gwo pozisyon an ap kouvri w. Se pou rezon sa a, y ap rele timoun k ap fèt la sen e y ap rele l Pitit Bondye.’” — Lik 1:35.

• “Kidonk, si nou menm, aktout nou se pechè, nou konnen pou nou bay pitit nou sa k bon, nou pa bezwen mande si Papa nou ki nan syèl la ap bay moun lespri sen si yo mande l li!” — Lik 11:13.

16. Ki fason Jewova sèvi ak lespri sen l?

• “Se grasa pawòl Jewova syèl la te fèt, se grasa souf bouch li tout bagay ki ladan l yo te fèt.” — Sòm 33:6.

• “Nou pral gen pisans lè lespri sen vin sou nou, e nou pral sèvi m temwen [...] nan zòn ki pi lwen sou tè a.” — Tra. 1:8.

• “Pa gen okenn pwofesi nan Ekriti a ki soti nan entèpretasyon moun fè sou sa k ap pase. Paske, se pa t janm volonte lòm ki fè vin gen pwofesi, men yon seri moun te pale pawòl ki soti nan Bondye, pandan lespri sen t ap gide yo.” — 2 Pyè 1:20, 21.

17. Ki sa Wayòm Bondye a ye?

• “Bondye nan syèl la pral tabli yon wayòm ki pap janm kraze. E wayòm sa a pap vin anba men okenn lòt pèp. L ap kraze tout wayòm sa yo, l ap elimine yo, e se li menm sèl k ap rete pou toutan.” — Dàn. 2:44.

18. Ki byenfè Wayòm Bondye a ap pote pou ou?

• “L ap siye tout dlo nan je yo, pap gen lanmò ankò, e moun pap nan lapenn ankò akoz moun pa yo ki mouri. Pap gen ni rèl, ni doulè ankò. Ansyen bagay yo disparèt.” — Rev. 21:4.

19. Ki jan w fè konnen Wayòm nan pral fè w jwenn benediksyon talè konsa?

• “Disip yo pwoche kote l apa, yo di l: ‘Di nou non: Ki lè bagay sa yo ap fèt, e ki siy k ap siy prezans ou e k ap siy fen sistèm nan? Jezi reponn yo, li di: ‘[...] Nasyon pral leve kont nasyon, e wayòm pral leve kont wayòm. Pral gen rate manje ak tranblemanntè nan yon zòn apre yon lòt. Yo pral preche bon nouvèl sa a konsènan Wayòm nan sou tout tè a, kòm yon temwayaj pou tout nasyon. Apre sa, lafen an ap vini.’” — Mat. 24:3, 4, 7, 14.

• “Met sa nan tèt ou: nan dènye jou yo, tan yo pral di, yo pral difisil pou moun sipòte. Paske, moun yo ap renmen pwòp tèt yo, y ap renmen lajan, y ap grandizè, y ap ògeye, y ap blasfeme, y ap dezobeyi paran yo, y ap engra, yo pap fidèl, yo pap gen afeksyon pou moun parèy yo, yo pap dispoze antann yo, y ap pale moun mal, y ap san metriz, y ap sovaj, yo pap renmen sa ki byen, y ap trèt, y ap gen tèt di, y ap gonfle ak ògèy, y ap renmen plezi olye yo renmen Bondye, y ap parèt gen atachman pou Bondye, men y ap aji yon fason ki kontrè ak fòs atachman sa a. Moun sa yo, evite yo.” — 2 Tim. 3:1-5.

20. Ki jan w ka montre Wayòm nan enpòtan pou ou?

• “Kidonk, kontinye chèche Wayòm nan an premye e kontinye chèche fè sa ki jis nan je Bondye an premye.” — Mat. 6:33.

• “Jezi di disip li yo: “Si yon moun vle suiv mwen, se pou l nye tèt li, se pou l pran poto soufrans li e se pou l kontinye suiv mwen.” — Mat. 16:24.

21. Kiyès Satan ak demon yo ye?

• “Nou menm, nou soti nan papa nou, Dyab la [...]. Li te yon asasen depi lè li te kòmanse.” — Jan 8:44.

• “Yo pimpe gwo dragon an sou tè a, li menm ki premye sèpan an, li menm yo rele Dyab la e yo rele Satan an, li menm k ap twonpe lemonnantye a. Yo pimpe l sou tè a, e yo pimpe zanj li yo sou tè a avèk li.” — Rev. 12:9.

22. Ki akizasyon Satan te lage sou Jewova ak moun k ap adore L yo?

• “Fi a di sèpan an: ‘Nou gen dwa manje fwi nan pyebwa ki nan jaden an. Men, kanta pou fwi pyebwa ki nan mitan jaden an, Bondye te di: “Nou pa dwe manje ladan l, non, nou pa dwe manyen l. Si nou fè sa, n ap mouri.’” Epi, sèpan an di fi a: ‘Nou pap mouri pyès. Paske, Bondye konnen jou nou manje fwi pyebwa sa a je n ap ouvri e n ap vin menm jan ak Bondye, n ap konnen sa ki byen ak sa ki mal.’” — Jen. 3:2-5.

• “Satan reponn Jewova: ‘Depi yon moun wè lanmò devan l, l ap bay tout sa l genyen pou l sove lavi l.’” — Jòb 2:4.

23. Ki jan w ka pwouve akizasyon Satan yo se manti?

• “Sèvi [Bondye] ak tout kè w.” — 1 Kwo. 28:9.

• “Jiskaske m mouri, mwen pap sispann ret fidèl ak Bondye!” — Jòb 27:5.

24. Poukisa moun mouri?

• “Akoz yon sèl moun peche antre nan monn nan, e akoz peche lanmò antre, e konsa lanmò blayi sou tout moun paske yo tout te peche.” — Wom. 5:12.

25. Nan ki kondisyon mò yo ye?

• “Moun ki vivan yo konnen y ap mouri, men moun ki mouri yo pa konn anyen ditou.” — Ekl. 9:5.

26. Ki espwa ki gen pou moun ki mouri yo?

• “Pral gen yon rezirèksyon ni pou moun ki jis, ni pou moun ki enjis.” — Tra. 24:15.

27. Ki kantite moun ki pral dirije nan syèl la ak Jezi?

• “Mwen gade, mwen wè Ti Mouton an ki kanpe sou Mòn Siyon. Li gen 144 000 moun avè l, e yo gen non l ak non Papa l ki ekri sou fwon yo.” — Rev. 14:1.