Diskou Jezi te bay sou mòn nan

Apre Jezi fin chwazi 12 apot yo, Jezi desann mòn nan e li rive kote yon gwo foul moun te rasanble. Yo te soti Galile, Jide, Ti, Sidon, Siri ak sou lòt bò Rivyè Jouden an. Yo te vini ak moun ki t ap soufri anba maladi e te gen kèk moun demon t ap fè soufri. Jezi te geri yo tout. Apre sa, li chita sou mòn nan, epi l kòmanse pale. Li te esplike ki sa n dwe fè pou n vin zanmi Bondye. Nou dwe konnen nou bezwen Jewova e nou dwe aprann renmen l. Men, nou pap ka renmen Bondye si n pa renmen moun parèy nou. Nou dwe janti ak tout moun e n dwe byen sèvi ak tout moun, menm moun ki ènmi nou.

Jezi te di: ‘Se pa zanmi nou sèlman pou nou renmen. Nou bezwen aprann renmen ènmi nou, e nou bezwen aprann padone moun ak tout kè nou. Si yon moun fache avè w, al kote l menm kote a epi mande l padon. Sèvi ak lòt moun menm jan n ta renmen yo sèvi avèk nou.’

Epitou, Jezi te bay moun yo bon konsèy sou bagay materyèl. Men sa l te di yo: ‘Li pi enpòtan pou yon moun zanmi Jewova pase l gen anpil lajan. Yon vòlè ka pran lajan w, men, pèsonn pa ka vòlè zanmitay ou genyen ak Jewova. Sispann bay tèt ou pwoblèm pou sa w ap manje, sa w ap bwè ak sa w ap met sou ou. Gade zwazo yo. Bondye toujou veye pou yo gen ase manje pou yo manje. Menmsi w bay tèt ou pwoblèm, sa pap fè w viv yon jou anplis. Sonje, Jewova konnen ki sa w bezwen.’

Foul moun yo pa t janm tande yon moun pale tankou Jezi. Responsab nan relijyon yo, anpalan de Farizyen yo ak espè nan Lalwa yo, pa t anseye yo bagay sa yo. Ki sa k fè Jezi te yon gran anseyan konsa? Paske se nan Jewova tout sa l t ap anseye yo te soti.