666 : Èske se tou senpleman yon mistè ?

‘ Pyès moun pa ka ni achte ni vann, sof moun ki gen mak la, ki gen non bèt sovaj la oswa chif non l lan. Se la yon moun ap bezwen sajès : Se pou moun ki gen entèlijans kalkile chif bèt sovaj la, paske se yon chif òm, e chif sa a se sis san swasannsis. ’ — Revelasyon 13:17, 18.

PA GEN anpil sijè nan Bib la ki eveye enterè konsa lakay moun ni ki enkyete moun plis pase pwofesi ki konsène mak oubyen non bèt sovaj la : chif 666 la. Kit se nan televizyon, sou Entènèt, nan sinema, nan liv ak nan jounal, yo pa janm sispann fè devinèt sou sijè sa a.

Gen kèk moun ki kwè 666 la se mak antikris Bib la pale a. Gen lòt moun ki di se yon sòt de mak yon moun oblije genyen pou idantifye l. Li tankou yon tatwaj oswa yon sikui entegre ki gen yon kòd dijital sou li yo foure nan kò yon moun ki pèmèt yo idantifye moun nan kòm yon sèvitè bèt la. Gen lòt menm ki kwè 666 la se mak tout pap katolik yo genyen. Lèt ki nan tit ofisyèl pap la, Vicarius Filii Dei (Reprezantan Pitit Bondye a), yo ranplase yo ak chif women e yo fè yon seri de konbinezon ak chif sa yo pou yo vin jwenn 666. Gen moun menm ki di yo ka kalkile menm chif sa a ak non laten anperè women Dyokletyen oswa ak non ebre Seza Newon.a

Sepandan, entèpretasyon sa yo se imajinasyon, se envansyon, e yo pa menm ditou ak sa Bib la di sou mak bèt la, jan nou pral wè sa nan atik ki vin apre a. Bib la fè konnen lè Bondye pral mete yon pwen final nan sistèm sa a, kòlè l pral frape moun ki gen mak bèt la sou yo (Revelasyon 14:9-11 ; 19:20). Kidonk, pou nou rive konprann siyifikasyon chif 666 la, sa mande plis pase annik rezoud yon jwèt pasyans ki enteresan. Erezman, Jewova Dye ki se lanmou an pèsonn, li menm ki sous limyè espirityèl la, li pa kite sèvitè l yo nan fènwa sou kesyon enpòtan sa a. — 2 Timote 3:16 ; 1 Jan 1:5 ; 4:8.

[Nòt anba paj]