“Se pi bèl kado mwen te resevwa!”

Se sa yon tifi ki gen 13 an te di lè yo te fè l kado yon ti chen. Gen yon dam ki reyisi nan kesyon biznis ki di kado ki te chanje lavi l se yon òdinatè papa l te ba li lè l te lekòl. Gen yon mesye ki fè konnen pi bèl kado li te resevwa se yon kat madanm li te fè pou li pou premye anivèsè maryaj yo.

Chak ane, anpil moun pase yon pakèt tan e yo fè gwo efò pou yo konnen ki “pi bèl” kado yo ka bay yon zanmi oswa yon fanmi nan yon okazyon espesyal. E pifò nan yo ta renmen moun yo bay kado yo reyaji menm jan ak moun nou site pi wo yo. E ou menm? Èske w ta renmen bay yon kado moun ap apresye oubyen w ta renmen resevwa yon kado konsa?

Sa t ap bon paske lè w bay yon kado oswa w resevwa youn, sa gen efè ni sou moun ki bay li a ni sou moun ki resevwa l la. Anfèt, Bib la di: “Yon moun pi kontan lè l bay pase lè l resevwa.” (Travay 20:35). Plis moun ou bay kado a kontan se plis w ap kontan tou.

Kidonk, ki sa w ka fè pou kado w bay la fè ni ou menm ni moun ou bay li a kontan? Si w pa konn ki “pi bèl” kado w ka bay, ki sa w ka fè pou moun apresye kado w bay la kanmenm?