Ki sa ki kapab ede nou kenbe fèm nan lafwa ?
1 Depi lè nou te fèk ap frekante òganizasyon Jewova a, nou gen prèv pwogrè espirityèl nou yo se yon sous lajwa pou nou ! Toutfwa, pou nou rete ‘ anrasinen, bati e pou nou vin estab nan lafwa ’, li nesesè pou nou kontinye fè pwogrè espirityèlman (Kol. 2:6, 7). Pandan pifò nan nou ap fè pwogrè espirityèl, gen kèk ki ale aladeriv paske yo pa rive ‘ kenbe fèm nan lafwa ’. (1 Kor. 16:13.) Nou kapab bat pou sa pa rive nou. Ki jan ?
2 Se pou nou toujou gen aktivite espirityèl : Se pou nou bati yon bon pwogram espirityèl avèk oganizasyon Jewova a ki chaje ak sa nou bezwen espirityèlman. Reyinyon yo, asanble yo ak kongrè yo ban nou jarèt pou n grandi pi plis epi pou nou vin pi estab nan domèn espirityèl, akondisyon nou toujou prezan pou nou rekòlte byenfè sa yo (Ebre 10:24, 25). Si nou gen yon pwogram pou nou li Bib la, La Tour de Garde, Réveillez-vous ! ak liv ki gen manje solid Pawòl Bondye a regilyèman, sa pral fè rasin espirityèl nou yo vin fon e solid (Ebre 5:14). Annou fikse objektif espirityèl epi annou travay avèk dilijans pou n atenn yo, sa ap ban nou avantaj k ap dire nèt ale. — Fil. 3:16.
3 Èd nan men moun ki gen matirite : Chèche fè plis zanmi avèk moun ki gen matirite espirityèl nan kongregasyon an. Chèche konnen ansyen yo piske se yo menm prensipalman ki kapab fòtifye nou (1 Tes. 2:11, 12). Asepte tout konsèy oubyen sijesyon yo ta ka ba w (Efez. 4:11-16). Asistan ministeryèl yo yo menm tou dispoze ede lòt moun vin fèm nan lafwa. Konsa, ou ka chèche ankourajman nan men frè sa yo.
4 Èske w bezwen koutmen nan ministè a ? Pale avèk ansyen yo pou mande yo èd. Pètèt yo ka rantre w nan pwogram “ Pyonye yo ap ede lòt moun ” nan. Èske w fèk batize ? Si w etidye liv Notre ministère a epi si w aplike sa l di, sa ap eksite w fè pwogrè pou ka rive gen matirite espirityèl. Èske w se yon paran ? Se pou w toujou kontinye fòtifye timoun ou yo espirityèlman. — Efez. 6:4.
5 Lè nou anrasinen epi nou estab nan lafwa, sa ap fè nou jwi yon relasyon sere kole avèk Jewova, sa ap fè nou jwi yon bon anbyans avèk frè nou yo. Sa ap fè nou reziste kont atak Satan yo, sa ap fòtifye esperans lavi etènèl nou genyen an. — 1 Pyè 5:9,10.