Montre nou gen sousi pou “ timoun ki san papa yo ”
1 Jewova se “ yon papa pou timoun ki san papa yo ”. (Sòm 68:5.) Sousi li genyen pou byennèt yo parèt klè nan kòmandman sa a li te bay nasyon Izrayèl tan lontan an : “ Nou pa dwe malmennen okenn vèv ni okenn timoun ki san papa. Si nou malmennen li, nan kèlkeswa fason an, e si apre sa li vin ap rele ban mwen, m ap tande rèl li a san mank. ” (Egz. 22:22, 23). Anplis de sa, nan lwa Bondye te bay la, li te pran dispozisyon pou ede yo jwenn sa yo te bezwen pou yo viv (Det. 24:19-21). Nan sistèm kretyen an, yo egzòte vrè adoratè yo pou yo “ pran swen òfelen yo ak vèv yo nan tribilasyon yo ”. (Jak 1:27.) Ki jan nou kapab imite Jewova, li menm ki gen sousi pou timoun ki gen yon sèl paran k ap elve yo, oubyen timoun k ap viv nan yon fanmi kote tout moun yo pa gen menm relijyon ?
2 Yon fòmasyon espirityèl : Si w se yon paran k ap leve pitit ou pou kont ou, oubyen si mari w oswa madanm ou se yon enkwayan, li ka difisil pou w dirije yon etid biblik regilye nan kay la ak timoun ou yo. Men, si ou ta renmen lè timoun yo vin gran pou yo ekilibre e pou yo gen matirite, li trèzenpòtan pou w fè yon etid biblik regilye ki adapte ak bezwen yo (Pwo. 22:6). Li enpòtan anpil tou pou w pale avèk yo sou bagay espirityèl chak jou (Det. 6:6-9). Pafwa ou kapab santi w dekouraje, men pinga w bese lebra. Mande Jewova pou l ba w fòs e pou l gide w pandan w ap “ kontinye leve [timoun ou yo] nan disiplin ak nan avètisman Jewova ”. — Efe. 6:4.
3 Si w bezwen èd pou w andose responsablite biblik ou genyen, fè ansyen yo konn sa. Petèt y ap anmezi pou yo ba w sijesyon ki itil, oubyen yo kapab ede w tabli yon bon pwogram espirityèl pou fanmi an.
4 Èd lòt moun ka bay : Nan premye syèk epòk nou an, Timote te vin yon sèvitè Jewova ki zele, malgre li te grandi nan yon fanmi kote tout moun pa t gen menm relijyon. Sandout, efò zele manman l ak grann li te fè pou yo anseye l Ekriti sakre yo, pandan l te jèn, te jwe yon gwo wòl nan sa (Travay 16:1, 2 ; 2 Tim. 1:5 ; 3:15). Sepandan, Timote te jwenn byenfè tou grasa frekantasyon lòt kretyen, tankou apot Pòl ki pale de li ‘ antanke pitit byenneme l nan Seyè [a], yon pitit ki fidèl ’. — 1 Kor. 4:17.
5 Menm jan an tou jodi a, ala bon sa bon lè gen frè ak sè ki gen matirite espirityèl ki montre yo gen sousi pou tigason ak tifi ki san papa nan kongregasyon an ! Èske nou konn non yo chak ? Èske nou konn pale avèk yo lè nou vin nan reyinyon ak nan lòt okazyon ankò ? Envite yo soti ansanm avèk nou nan predikasyon. Petèt, tanzantan nou ka envite yo nan etid familyal nou oswa nan bonjan ti divètisman nou òganize. Yo kapab vini ansanm ak paran yo ki kwayan an, oswa ansanm ak paran k ap leve yo pou kont li a. Lè jèn sa yo konsidere nou kòm zanmi yo, petèt y ap pi anvi imite egzanp nou e y ap pi anvi asepte konsèy nou ba yo. — Fil. 2:4.
6 Jewova gen anpil sousi pou tigason ak tifi ki san papa, e li beni efò n ap fè pou nou ede yo renmen laverite epi mete l an pratik nan lavi yo. Gen anpil timoun ki te leve ak yon sèl paran, oswa nan kay kote moun yo divize, ki te resevwa ankourajman konsa. E kounye a, y ap sèvi fidèlman kòm pyonye, asistan ministeryèl, ansyen, siveyan itineran, misyonè, oswa manm fanmi Betèl. Menm jan ak Papa nou ki nan syèl la, annou tout chèche mwayen pou nou “ laji kè nou ” an rapò ak afeksyon nou genyen pou timoun ki san papa yo. — 2 Kor. 6:11-13.