**Chèche vin pi maton nan travay predikasyon an: Ofri moun yo liv Sa Labib anseye a**

Rezon ki fè sa enpòtan: Liv Sa Labib anseye a se prensipal zouti nou gen nan valiz predikasyon nou pou n anseye moun yo. Sepandan, anvan nou itilize l pou nou fè etid ak yon moun, toudabò nou bezwen bay moun nan liv la. Se sa k fè, nou tout dwe fè efò pou nou vin maton nan fason n ap ofri liv Sa Labib anseye a nan ministè a (Pwo. 22:29). Gen anpil fason nou ka fè sa, e pwoklamatè yo dwe sèvi ak prezantasyon k ap bon pou tèritwa pa yo.

Fason pou nou fè l:

Poze yon kesyon k ap enterese moun nou rankontre a, yon kesyon k ap pèmèt nou ale nan yon chapit byen presi nan liv la. Nou ka menm chwazi youn nan kesyon ki nan kòmansman yon chapit. Apre nou fin koute repons moun nan bay, li yon vèsè ki apwopriye, epi montre l yon paragraf nan sijè a, petèt nou ka fè yon ti pale tou kout avè l sou paragraf la.
Yon lòt fason nou ka fè sa, se lè nou sèvi ak paj entwodiksyon yo pou nou eveye enterè moun nan epi apre sa nou montre l ki kote nan liv la l ap jwenn repons Bib la bay. Pa egzanp, nou ka pale sou yon move nouvèl yo te bay, pa gen twò lontan, e nou ka esplike l gen anpil moun k ap chèche repons pou plizyè kesyon ki nan paj 3 a. Oubyen nou ka di l n ap vizite vwazen nou yo pou n ede yo gen yon pwennvi pozitif sou lavni. Apre sa, nou ka montre l desen ki nan paj 4 ak paj 5 yo, epi nou ka poze l kesyon sa a: “Ki pwomès pami pwomès sa yo ou ta renmen wè ki reyalize?” Yon lòt bagay nou ka fè se di moun nan n ap vizite moun yo pou n fè yon ti pale avèk yo pou n ka ede yo jwenn repons pou yon seri gwo kesyon moun konn ap poze nan lavi a. Ansuit, montre moun nan kesyon ki anba, nan paj 6 la, epi mande l kiyès nan kesyon sa yo ki pi enterese l.
Sèvi ak metòd dirèk la pou n kòmanse yon etid biblik. Nou ka di moun nan: “N ap montre vwazen nou yo liv sa a ki fèt pou ede moun etidye Labib. Èske w konn wè l deja? [Kite moun nan reponn.] Si w gen kèk minit, m ta renmen montre w ki jan w ka sèvi avè l pou w aprann anpil bagay nan pwòp Bib ou.”

Eseye sa a pandan mwa a:

Fè plizyè repetisyon pandan adorasyon an fanmi an.
Pandan nou nan predikasyon, pataje ak lòt pwoklamatè sa n te prepare pou n di (Pwo. 27:17). Chanje prezantasyon an, si nou pa jwenn bon rezilta.