Fason Kreyatè nou an fè n konnen pwomès li yo ki montre l renmen nou

Depi lè Bondye te fin kreye lèzòm, li te pale ak yo pa mwayen zanj yo ak pwofèt yo. Anplis de sa, li te chwazi fè ekri mesaj li ak benediksyon l pwomèt yo pou nou. Pwomès Bondye yo gen efè sou avni nou. Donk, ki kote nou ka jwenn pwomès Bondye yo jodi a?

Nou jwenn mesaj Bondye a nan Ekriti sakre yo (2 Timote 3:16). Kòman Bondye te sèvi ak pwofèt yo pou fè ekri mesaj sa a (2 Pyè 1:21)? Bondye te mete panse l nan lespri moun ki t ap ekri Pawòl li a pou yo te ka ekri panse sa yo. Sitiyasyon konsa konn rive jodi a tou. Si yon biznisman mande yon sekretè l pou l ekri yon lèt, n ap dakò se biznisman nan ki mèt lèt sa a. Menm jan an tou, menmsi Bondye te sèvi ak yon seri gason pou ekri mesaj li a, an reyalite, se li ki Mèt Bib la, oswa Ekriti sakre yo.

PAWÒL BONDYE A VIN DISPONIB POU TOUT MOUN

Pawòl Bondye a tèlman gen valè, Bondye vle pou tout moun li l epi konprann li. Jodi a, Bondye bay yon “bon nouvèl k ap dire pou toutan” ki fasil pou “moun tout nasyon, tout tribi, tout lang” jwenn (Revelasyon 14:6). Grasa benediksyon Bondye, Pawòl li a disponib plis pase nenpòt lòt liv sou tè a; moun ka li l nan plis pase 3 000 lang, ann antye oubyen an pati.