1 Samyèl

31 Twouve, moun Filisti yo t ap fè lagè ak pèp Izrayèl la+. Sòlda izrayelit yo te kouri pou sòlda Filisti yo, e sòlda Filisti yo te touye anpil nan yo sou Mòn Gilbowa+. 2 Sòlda Filisti yo t ap kouri san rete dèyè Sayil ak pitit gason l yo. Yo te touye Jonatan+, Abinadab ak Malkichwa, pitit gason Sayil yo+. 3 Batay la te vin rèd anpil pou Sayil. Sòlda Filisti ki t ap tire flèch yo te tire flèch ki pran Sayil, e flèch yo te blese Sayil grav+. 4 Apre sa, Sayil di sèvitè a ki t ap pote zam li yo: “Pran epe w la epi pèse m avè l pou mesye ki pa sikonsi sa yo+ pa vin pèse m epi maltrete m.” Men, sèvitè l la ki t ap pote zam li yo pa t vle fè sa paske li te pè anpil. Lè sa a, Sayil pran epe a e li lage kò l sou li+. 5 Lè sèvitè l la ki t ap pote zam li yo wè l mouri+, li menm tou li lage kò l sou epe pa l la e li mouri bò kot Sayil. 6 Konsa, Sayil ak twa pitit gason l yo, sèvitè l la ki te konn pote zam li yo ansanm ak tout sòlda ki te avè l yo mouri nan jou sa a+. 7 Lè moun nan pèp Izrayèl la ki te nan zòn vale a* ak zòn Jouden an wè sòlda Izrayèl yo kouri e Sayil ak pitit gason l yo mouri, yo kòmanse kouri kite vil yo+. Apre sa, sòlda Filisti yo antre nan vil yo e yo pran vil sa yo.

8 Nan demen, lè moun Filisti yo vini pou yo pran tout bagay ki te sou kadav yo, yo jwenn Sayil ak twa pitit gason l yo blayi sou Mòn Gilbowa+. 9 Se konsa, yo koupe tèt Sayil, yo pran ekipman konba ki te sou li yo e yo voye moun nan tout tèritwa peyi Filisti al gaye nouvèl la+ nan tanp zidòl yo+ e pami tout moun nan pèp yo a. 10 Apre sa, yo mete ekipman konba l yo nan kay ki gen estati Achtorèt yo e yo pandye kadav li sou miray Bètchan an+. 11 Lè moun Jabèsgalaad yo+ aprann sa moun Filisti yo fè Sayil, 12 tout sòlda yo leve, yo vwayaje tout nuit lan, y al pran kadav Sayil ak kadav pitit gason l yo sou miray Bètchan an. Yo retounen Jabès avèk yo e yo boule yo la. 13 Apre sa, yo pran zosman yo+, yo antere yo anba pye tamaris* ki nan Jabès la+. Apre sa, yo fè sèt jou san yo pa manje.