Ezekyèl
27 Jewova pale avè m yon lòt fwa ankò, li di m: 2 “Pitit lòm, kanta pou ou, chante yon chante ki tris* pou Ti+, 3 e men sa pou w di Ti:
‘Ou menm k ap viv nan antre lanmè a,
Ou menm k ap fè komès ak moun ki nan yon pakèt zile,
Men sa Jewova, Seyè ki Souvren an, di:
“O Ti, ou di: ‘Pa gen pi bèl pase m+.’
4 Tèritwa w rive jis nan mitan lanmè,
E moun ki te bati w yo te fè w bèl nèt.
5 Ou tankou yon bato. Yo te fè tout planch ou yo ak bwa jenevriye ki sot Seni+.
Yo te pran yon pye sèd ki sot Liban pou yo fè yon ma pou ou.
6 Yo te fè ram ou yo ak bwadchèn ki sot Bazan.
Yo te fè pati devan an ak bwa sapen ki sot nan zile Kitim+ yo ki dekore ak ivwa.
7 Vwal ou a te fèt ak twal len ki gen plizyè koulè ki sot ann Ejip.
Twal ki te kouvri pon w lan te fèt ak fil ble ak lenn vyolèt ki sot nan zile Elicha yo+.
8 Se moun Sidon ak moun Avad+ ki t ap rame pou ou.
Se moun ou genyen ki fò anpil yo, o Ti, ki te sèvi kòm maren pou ou+.
9 Se moun ki gen eksperyans* ak moun ki fò ki soti Gebal yo+ ki te konn bouche jwen w yo+.
Tout bato ki sou lanmè a ansanm ak maren yo te konn vin kote w pou yo fè komès.
10 Moun peyi Pès yo, desandan Loud yo+ ak desandan Pout yo te nan lame w la. Yo te konn al nan lagè pou ou.
Se sou ou yo te konn pandye boukliye yo ak kas yo. Yo te fè w jwenn anpil glwa.
11 Moun Avad ki te nan lame w la te konn kanpe sou tout miray ou yo.
Te gen yon seri mesye ki brav nan fòtrès ou yo.
Yo te konn pandye boukliye won yo sou tout miray ou yo,
E yo te fè w bèl nèt.
12 “‘“Moun Tasis yo+ te konn fè komès avè w paske w te gen anpil richès+. Yo te konn ba w ajan, fè, eten ak plon pou machandiz ou yo+. 13 Moun Javan yo, moun Toubal yo+ ak moun Mechèk yo+ te konn fè komès avè w. Yo te konn ba w esklav+ ak bagay ki fèt an kuiv pou machandiz ou yo. 14 Desandan Togama yo+ te konn ba w cheval ak milèt pou machandiz ou yo. 15 Moun Dedan yo+ te konn fè komès avè w. Ou te konn bay komèsan nan anpil zile travay. Yo te konn ba w ivwa+ ak bwadebèn pou yo peye w. 16 Moun Edòm yo te konn fè biznis avè w paske w te gen anpil bon bagay. Yo te konn ba w tikwaz, lenn vyolèt, twal bwode plizyè koulè, bon kalite twal, koray ak ribi pou machandiz ou yo.
17 “‘“Moun Jida ak moun peyi Izrayèl te konn fè komès avè w. Yo te konn ba w ble ki soti Minit+, bon bagay pou moun manje, siwo myèl+, luil ak luil santi bon+ pou machandiz ou yo+.
18 “‘“Moun Damas yo+ te konn fè biznis avè w paske w te gen anpil bon bagay e w te gen anpil richès. Yo te konn ba w diven ki soti Èlbon ak lenn ki soti Saha*. 19 Moun Vedan yo ak moun Javan yo ki nan zòn Ouzal te konn ba w fè fòje, kas* ak wozo santi bon pou machandiz ou yo. 20 Moun Dedan yo+ te konn vann ou twal pou w met sou do* bèt. 21 Ou te konn bay Arab yo ak tout chèf Keda yo+ travay. Moun sa yo te konn vann ti mouton, gwo mal mouton ak kabrit+. 22 Komèsan ki moun Cheba e ki moun Rama yo+ te konn fè komès avè w. Yo te konn ba w tout kalite bon pafen, pyè ki gen anpil valè ak lò pou machandiz ou yo+. 23 Moun Aran yo+, moun Kane yo, moun Edenn yo+, komèsan ki moun Cheba yo+, moun Asou yo+ ak moun Kilmad yo te konn fè komès avè w. 24 Yo te konn vann bèl rad nan mache w yo, rad san manch ki fèt ak fil ble, twal bwode plizyè koulè ansanm ak tapi ki gen plizyè koulè. Tout bagay sa yo te byen mare ak kòd.
25 Se nan bato Tasis yo+ yo te konn pote machandiz ou yo.
Se sa k fè ou te konn plen ak machandiz e w te konn chaje anpil* nan mitan lanmè a.
26 Moun k ap rame pou ou yo te konn mennen w byen lwen sou lanmè.
Van ki sot nan direksyon lès te fè w koule nan mitan lanmè a.
27 Richès ou yo, bon bagay ou yo, machandiz ou yo, maren w yo, matlo w yo,
Tout moun k ap bouche jwen w yo, moun k ap vann machandiz ou yo+ ak tout sòlda w yo+,
Wi, tout moun* ki anndan w yo,
Yo tout ap koule avè w nan mitan lanmè a lè jou malè a rive sou ou+.
28 Lè maren w yo pran rele, tout zòn ki bò lanmè yo ap tranble.
29 Tout moun k ap rame yo, tout maren yo, tout matlo yo
Ap desann bato yo e y ap kanpe atè.
30 Y ap rele byen fò e y ap kriye anpil pou ou+
Pandan y ap voye pousyè sou tèt yo e pandan y ap woule kò yo nan sann dife.
31 Y ap kale tèt yo e y ap mete twal sak sou yo.
Y ap kriye anpil* e y ap rele anpil.
32 Pandan y ap plenn, y ap chante yon chante ki tris e y ap rele pou ou. Y ap di:
‘Kiyès ki tankou Ti ki ret an silans kounye a nan mitan lanmè a+?
33 Lè machandiz ou yo te konn sot sou lanmè vin jwenn ou, ou te fè anpil pèp kontan+.
Tout richès ou te genyen yo ak tout machandiz ou te genyen yo te fè wa latè yo vin rich+.
34 Kounye a, ou fè nofraj nan mitan lanmè, nan dlo ki fon anpil+,
E tout machandiz ou yo ak tout moun ou yo koule ansanm avè w+.
35 Tout moun ki abite nan zile yo ap ret gade w tou sezi+.
Wa moun sa yo ap tranble tèlman y ap pè+, figi yo ap montre yo boulvèse.
36 Komèsan ki nan nasyon yo ap sezi lè yo wè sa k rive w la.
W ap disparèt bridsoukou e yon fason ki terib.
W ap sispann egziste pou toutan+.’”’”