Ezekyèl

6 Jewova pale avè m yon lòt fwa ankò, li di m: 2 “Pitit lòm, vire figi w nan direksyon mòn Izrayèl yo epi pwofetize kont yo. 3 Men sa pou w di: ‘O nou menm mòn Izrayèl yo, tande sa Jewova, Seyè ki Souvren an, di: Men sa Jewova, Seyè ki Souvren an, di mòn yo, ti mòn yo, rivyè yo ak vale yo: “Gade! M ap fè ènmi vin atake nou ak epe e m ap detwi kote ki wo yo konn fè adorasyon yo. 4 M ap kraze lotèl nou yo, m ap detwi lotèl pou nou boule lansan yo+ e m ap lage moun nou yo yo touye yo devan zidòl nou yo ki bay degoutans*+. 5 M ap lage kadav moun Izrayèl yo devan zidòl y ap sèvi yo ki bay degoutans e m ap gaye zo nou toutotou lotèl nou yo+. 6 Kèlkeswa kote nou rete a, m ap detwi vil yo+, m ap kraze kote ki wo nou konn fè adorasyon yo e kote sa yo ap ret vid+. M ap kraze lotèl nou yo nèt, m ap detwi zidòl nou yo ki bay degoutans, m ap detwi lotèl pou nou boule lansan yo, m ap disparèt bagay nou fè ak men nou yo. 7 Moun yo touye yo ap tonbe nan mitan nou+ e n ap konnen mwen se Jewova+.

8 “‘“Men, m ap kite yon rès nan nou, paske, gen nan nou k ap chape anba kout epe nan mitan nasyon yo lè nou fin gaye nan peyi yo+. 9 Moun ki chape yo ap sonje m nan mitan nasyon kote y ap ann egzil yo+. Y ap vin konprann kè m t ap dechire poutèt kè yo pa t fidèl*: Yo te vire do ban mwen+ e yo te vin anvi wè zidòl yo te genyen yo ki bay degoutans+. Y ap wont e y ap rayi tout mechanste ak move bagay yo te fè yo+. 10 Y ap konnen mwen se Jewova, e y ap konnen lè m te di mwen t ap lage kalamite sa a sou yo a se pa t pawòl anlè+.”’

11 “Men sa Jewova, Seyè ki Souvren an, di: ‘Bat men w, frape pye w, epi plenn poutèt tout mechanste ak tout move bagay Izrayèl fè yo, paske, y ap tonbe anba kout epe e y ap mouri anba grangou ak maladi+. 12 Moun ki lwen an ap mouri anba maladi, moun ki pre a ap tonbe anba kout epe e tout moun ki chape anba bagay sa yo ap mouri anba grangou. M ap lage tout kòlè m nèt sou yo+ 13 e n ap konnen mwen se Jewova+ lè kadav moun yo touye yo ap nan mitan zidòl yo genyen yo ki bay degoutans, y ap toutotou lotèl yo genyen yo+, y ap sou chak mòn ki byen wo, sou tout tèt mòn yo, anba tout gwo pyebwa e anba branch gwo pyebwa kote yo te konn fè ofrann santi bon pou kalme zidòl yo genyen yo ki bay degoutans+. 14 M ap lonje men m pou m pini yo, m ap fè peyi a tounen yon dezè, e tout kote yo abite yo ap vin pi mal pase dezè ki toupre Dibla a. Lè sa a, y ap konnen mwen se Jewova.’”