Andirans bay rekonpans

¹ “ Grasa andirans nou, n ap rive genyen nanm nou. ” ​(Lik 21:19). Pawòl sa yo, ki fè pati de pwofesi Jezi te bay konsènan “ fen sistèm de choz la ”, ede nou konprann etan n ap kenbe entegrite nou, nou dwe prepare nou pou nou sibi anpil eprèv. Men, grasa fòs Jewova, nou chak ka “ andire jiska lafen ” e nou chak ka “ sove ”. — Mat. 24:3, 13 ; Fil. 4:13.

² Pèsekisyon, pwoblèm sante, pwoblèm ekonomik ak gwo soufrans nan domèn afektif ka rann lavi a difisil pou nou chak jou. Sepandan, nou pa dwe janm bliye Satan ap eseye kraze entegrite nou devan Jewova. Chak jou ki pase e nou rete fidèl devan Papa nou, se yon jou anplis nou kontribye pou li ka reponn defi Pwovokatè a. E sa rekonfòte nou lefètke nou konnen li pa bliye ‘ dlo ki sot nan je ’ nou akoz eprèv nou rankontre. Dlo sa yo gen anpil valè pou Jewova, e entegrite nou fè kè l kontan. — Sòm 56:8 ; Pwo. 27:11.

³ Eprèv yo rafine nou : Afliksyon kapab ede nou detekte si fwa nou fèb, oubyen tou li ka ede nou dekouvri kèk fay nan pèsonalite nou, tankou ògèy ak enpasyans. Olye pou n ap chèche suiv metòd ki pa biblik pou nou mete fen nan eprèv yo oswa pou nou kouri pou yo, pito nou suiv konsèy nou jwenn nan Pawòl Bondye a, ki mande pou nou kite “ andirans lan fin fè travay li nèt ”. Poukisa ? Se paske si nou andire eprèv nou rankontre yo fidèlman, n ap “ vin yon moun total, yon moun anfòm nan tout bagay ”. (Jak 1:2-4.) Andirans ka ede nou kiltive yon seri de kalite ki gen anpil valè. Pa egzanp, l ap fè nou vin rezonab, n ap kapab mete nou nan plas lòt moun e n ap gen mizèrikòd. — Wom. 12:15.

⁴ Kalite lafwa nou pase anba eprèv : Lè nou andire devan pwoblèm, nou vin gen yon fwa solid ki pase anba eprèv, e yon fwa konsa gen anpil valè nan je Bondye (1 Pyè 1:6, 7). Yon fwa konsa ban nou kapasite pou nou rete fèm devan lòt eprèv nou ka rankontre alavni. Anplis, nou santi nou gen apwobasyon Bondye, e sa ranfòse esperans nou, li fè esperans sa a vin pi reyèl pou nou toujou. — Wom. 5:3-5.

⁵ Jak 1:12 souliye pi gwo rekonpans n ap jwenn poutèt nou andire, li di : “ Byennere moun ki kontinye andire eprèv, paske lè l fin tounen yon moun apwouve, l ap resevwa kouwòn lavi a. ” Se sa k fè, ann rete fèm nan atachman nou pou Bondye avèk konfyans l ap rekonpanse “ moun ki kontinye renmen l ” yo anpil anpil.

Dezyèm pati : Annou kondui etid biblik k ap pwogrese

Fè preparasyon pou nou kondui etid la

¹ Pou nou efikas nan fason nou kondui etid biblik, sa mande plis pase annik egzamine sijè n ap trete a epi annik chèche vèsè yo bay yo. Nou bezwen fè etid la yon fason ki touche kè etidyan an. Men, pou nou rive fè sa, sa mande pou nou fè yon bon preparasyon toutpandan nou gen etidyan an nan tèt nou. — Pwo. 15:28.

² Ki jan pou nou prepare : Pou kòmanse, se pou w priye Jewova pou moun nan, se pou w priye pou bezwen l. Mande Jewova pou l ede w touche kè etidyan an (Kol. 1:9, 10). Pou tèm etid la ka chita byen nan tèt ou, ou bezwen pran yon ti tan pou w egzamine tit chapit la oswa tit leson an. Apre sa, se pou w egzamine soutit yo ansanm ak imaj, kare, oswa nenpòt lòt bagay yo mete pou rann etid la pi klè. Poze tèt ou kesyon sa a : ‘ Ki objektif prensipal etid nou pral fè a ? ’ Yon kesyon konsa ap ede w mete aksan sou pwen prensipal yo pandan w ap kondui etid la.

³ Ou bezwen egzamine chak paragraf avèk swen. Chèche repons pou kesyon yo e lè w jwenn yo, sa pou w make sèlman se mo kle ak ekspresyon kle ki gen nan repons lan. Analize byen pou w wè ki rapò ki genyen ant pwen prensipal paragraf la ak vèsè yo site yo, e chwazi kiyès nan vèsè yo w ap li lè w ap fè etid la. Petèt ou ka twouve li itil pou w ekri kèk remak nan maj piblikasyon ou sèvi pou w fè etid la. Etidyan an dwe wè klè sa l ap aprann nan se sou Pawòl Bondye a li chita. — 1 Tes. 2:13.

⁴ Adapte etid la selon bezwen etidyan an : Yon lòt pwen ankò, lè w ap prepare etid la, panse a etidyan ou pral wè a. Eseye imajine kesyon li ka genyen e bat pou w prevwa pwen li ka mal pou l konprann oswa li ka mal pou l aksepte. Ou bezwen mande tèt ou : ‘ Ki sa l ap bezwen konprann pou l fè pwogrè espirityèl ? Ki pwen l ap bezwen travay ? Ki jan mwen ka rive touche kè l ? ’ Ansuit, adapte ansèyman w lan an konsekans. Pafwa, ou ka santi li nesesè pou w vini ak yon egzanp, yon esplikasyon oswa yon seri de kesyon pou w ede etidyan an konprann yon pwen oswa yon vèsè (Ney. 8:8). Men, evite ajoute enfòmasyon ki pa nesesè parapò ak tèm etid la. Si w fè yon rezime toukout nan fen etid la, sa ap ede etidyan an sonje pwen prensipal yo.

⁵ Ala kontan nou kontan lè nou wè Jewova jwenn louwanj dèske nouvo yo pote fwi ki gen rapò ak jistis (Fil. 1:11) ! Pou nou rive ede yo atenn objektif sa a, nou bezwen byen prepare chak fwa nou pral fè yon etid biblik.