Preche Wayòm nan se yon bèl privilèj

¹ Chak jou, gen plizyè milya moun sou tè a ki benefisye dispozisyon Jewova pran avèk jenewozite pou l pèmèt moun rete an vi (Mat. 5:45). Sepandan, se yon vyepti kantite nan moun sa yo ki montre rekonesans yo anvè Kreyatè yo a lè yo preche bon nouvèl Wayòm nan, yon privilèj san parèy (Mat. 24:14). Nan ki pwen ou bay bèl privilèj sa a enpòtans ?

² Predikasyon Wayòm nan onore Bondye e li pote espwa ak lapè pou moun ki anba detrès nan peryòd boulvès jodi a (Ebre 13:15). Pou moun ki byen reyaji devan mesaj la, sa siyifi lavi etènèl (Jan 17:3). Ki karyè pwofàn oswa ki pwofesyon ki bay byenfè konsa ? Apot Pòl te konsidere ministè l tankou yon trezò, e li te montre apresyasyon l gen pou li nan fason li te akonpli l. — Tra. 20:20, 21, 24 ; 2 Kor. 4:1, 7.

³ Nou cheri bèl privilèj nou genyen an : Yon fason nou montre rekonesans nou pou privilèj nou genyen pou nou preche, se lè nou fè atansyon ak kalite sèvis n ap bay la. Èske nou rezève tan pou nou prepare yon prezantasyon ki pou touche kè moun k ap koute nou yo ? Èske nou ka travay pou nou vin pi abil nan fason nou sèvi ak Bib la ak nan fason n ap rezone ak moun yo ? Èske nou travay tèritwa yo asiyen nou an afon ? Èske nou ka kòmanse yon etid biblik epi kontinye kondui l ? Menm jan ak kretyen wen lontan yo e menm jan ak sa ki la jodi a, bonjan pwennvi nou genyen sou aktivite sa a ankouraje nou. E nou cheri privilèj nou genyen an. — Mat. 25:14-23.

⁴ Si w ap fè fas ak pwoblèm laj, si sante w pa anfòm, oswa si w rankontre lòt sitiyasyon difisil, efò w ap fè pou w patisipe nan ministè a avèk zèl gen anpil enpòtans tou. Pawòl Bondye a ban nou asirans Jewova bay efò sa yo nou fè nan sèvis li anpil valè, menmsi efò sa yo kapab pa sanble enpresyone lòt moun. — Lik 21:1-4.

⁵ Predikasyon Wayòm nan se yon gwo sous satisfaksyon. Yon sè ki gen 92 an di : “ Ala kontan m kontan lè m sonje plis pase 80 ane mwen fè nan sèvis Bondye, san okenn regrè ! Si m te ka reviv lavi m ankò, mwen t ap chwazi viv menm fason an, paske vrèmanvre, ‘ bonte Bondye moun pa merite a pi bon pase lavi ’. ” ​(Sòm 63:3). Nou menm tou, ann apresye bèl privilèj Bondye ban nou pou nou preche Wayòm nan.

Douzyèm pati : Annou kondui etid biblik k ap pwogrese

Ede etidyan yo kòmanse etid biblik e ede yo kondui yo

¹ Lè moun n ap etidye Labib avèk yo fèk kòmanse patisipe nan predikasyon, ide pou yo kòmanse pwòp etid biblik pa yo e pou yo kondui etid sa yo ka entimide yo. Ki jan nou ka ede yo kiltive yon etadespri pozitif anrapò ak aspè trèzenpòtan sa a ki gen nan ministè a ? — Mat. 24:14 ; 28:19, 20.

² Lè yon etidyan ranpli kondisyon pou l vin yon pwoklamatè ki poko batize, an jeneral li deja ap pran bonjan fòmasyon nan Lekòl ministè teyokratik la. Fòmasyon li resevwa lè li prepare patisipasyon yo e lè li prezante yo antanke elèv ap ede l devlope talan li genyen pou l anseye e sa nesesè pou l vin “ yon ouvriye ki pa gen anyen pou l wont, ki manyen pawòl verite a kòrèkteman ”. — 2 Tim. 2:15.

³ Anseye yo grasa egzanp nou ba yo : Pou Jezi te fòme disip li yo, li te ba yo enstriksyon ki klè e li te bay yo bèl egzanp pou yo suiv. Li te di : “ Nenpòt moun yo enstwi kòrèkteman pral vin tankou pwofesè l. ” ​(Lik 6:40). Li trèzenpòtan pou w imite Jezi, pou w bay yon bèl egzanp nan ministè w. Ofiramezi etidyan w lan ap suiv egzanp ou ba li nan ministè a, l ap vin reyalize objektif yon moun k ap fè vizit se pou l kòmanse etid biblik.

⁴ Esplike etidyan an, lè nou ofri yon moun yon etid biblik, an jeneral, li pa nesesè pou nou di moun nan an detay sa yon etid biblik enplike. Souvan li pi bon pou nou annik sèvi ak youn oswa de paragraf nan yon piblikasyon nou itilize pou nou fè etid pou nou montre moun nan ki jan yon etid fèt. N ap jwenn kèk sijesyon pratik sou fason nou ka kòmanse etid biblik nan paj 8 Ministè Wayòm sa a oswa nan paj 6 Ministè Wayòm janvye 2002.

⁵ Lè sa apwopriye, envite etidyan an pou l akonpaye w oubyen pou l akonpaye yon lòt pwoklamatè eksperimante nan lòt etid biblik. Li ka fè kòmantè sou yon paragraf oswa sou yon vèsè kle. Konsa, grasa sa etidyan an obsève, l ap aprann anpil bagay sou fason pou l kondui etid biblik k ap pwogrese (Pwo. 27:17 ; 2 Tim. 2:2). Felisite l e montre l ki jan li ka amelyore.

⁶ Fòmasyon nouvo pwoklamatè yo resevwa pou yo anseye Pawòl Bondye ap ekipe yo pou akonpli yon “ zèv ki bon ” : kòmanse etid biblik pa yo epi kondui yo (2 Tim. 3:17). Se pa ti kontan n ap kontan pou nou wè n ap travay kòtakòt ak yo pou nou lanse envitasyon touchan sa a : “ Se pou nenpòt moun ki vle, pran dlo lavi a gratis. ” — Re 22:17.