Jezi ak disip li yo fèk pase twazyèm nuit yo nan Betani depi lè yo sot Jeriko. Kounye a, nan lendi maten 10 Nizan an, kou l jou, yo deja nan wout pou y al Jerizalèm. Jezi grangou. Se sa k fè lè l wè yon pye fig frans, l al ladan l. Èske l ap jwenn fig?

Pye fig frans lan pouse fèy anvan lè, etandone sezon fig se jis nan mwa jen, e kounye a yo sèlman nan fen mwa mas. Se sa k fè, Jezi panse pye fig frans lan gentan ap bay fig anvan lè. Men, li pa jwenn anyen. Fèy yo fè moun panse pye fig la gen fig. Men sa Jezi di annapre: “Pèsonn pa gendwa janm manje fwi ki soti nan ou ankò.” ​(Mak 11:14). Menm kote a pye fig frans lan kòmanse seche, se nan demen maten, disip yo wè rezilta pawòl Jezi a ak sa l vle di.

Jezi ak disip li yo kontinye wout yo, e nan yon ti moman yo rive Jerizalèm. Li antre nan tanp lan li te enspekte nan lavèy nan aprèmidi. Men jodi a, Jezi fè plis pase yon enspeksyon, li aji menm jan li te fè sa sa gen twazan, lè l te vin nan fèt Pak ane 30 epòk nou an (Jan 2:14-16). Fwa sa a, Jezi mete “moun ki t ap vann nan tanp lan ak moun ki t ap achte yo deyò”. Apre sa, li chavire “tab kanbis yo ak ban moun ki t ap vann pijon yo”. (Mak 11:15.) Li pa kite okenn moun k ap pote yon bagay pou al nan vil la fè chemen dekoupe nan lakou tanp lan.

Poukisa Jezi fè gwo aksyon sa a kont moun ki t ap chanje lajan e ki t ap vann bèt nan tanp lan? Men sa Jezi di: “Èske sa pa ekri: ‘Y ap rele kay mwen an yon kay pou tout nasyon vin lapriyè’? Men nou menm, nou fè l tounen yon gwòt ki chaje ak vòlè.” ​(Mak 11:17). Rezon ki fè li di yo vòlè se paske yo mande moun ki oblije achte bèt yo bezwen pou fè sakrifis yo yon pri egzajere. Se sa k fè, Jezi konsidere aktivite komès sa yo kòm yon mwayen pou yo dechèpiye moun oswa pou yo vòlè yo.

Nòmalman, lè prèt an chèf yo, espè nan Lalwa yo ak chèf yo ki t ap dirije pèp la tande sa Jezi fè a, yon lòt fwa ankò, yo chèche yon mwayen pou yo fè touye l. Men, yo gen yon pwoblèm. Yo pa konn ki jan pou yo elimine Jezi, etandone tout pèp la te ret la anba bouch li ap koute l.

Apa Juif yo, gen moun lòt nasyon ki vin nan fèt Pak la tou. Moun sa yo se moun ki konvèti nan relijyon Juif yo. Pami yo, gen kèk Grèk ki vin adore Bondye nan fèt la. Yo pwoche kot Filip, petèt akoz non grèk li genyen an, e yo mande pou yo wè Jezi. Filip al kot Andre, petèt paske li pa fin sèten si se yon bon moman pou moun yo rankontre Jezi. Yo toude al fè Jezi konn sa. Sanble Jezi te toujou nan tanp lan.

Jezi konnen se sèlman kèk jou li rete anvan l mouri. Donk, se pa moman pou l ap chèche fè tout moun wè l, jan moun yo swaf sa. Se sa k fè, li bay apot yo yon egzanp. Li di: “Lè a rive pou Pitit lòm nan jwenn glwa. Anverite m ap di nou sa: Si yon grenn ble pa tonbe nan tè a e li pa mouri, li rete yon sèl grenn. Men, si li mouri, lè sa a, l ap pwodui anpil fwi.” — Jan 12:23, 24.

Yon grenn ble ka sanble pa gen anpil valè. Men, si yo mete l nan tè epi li “mouri”, l ap jèmen e rive yon lè l ap pouse, l ap vin yon pye ble k ap bay anpil grenn ble. Menm jan an tou, se sèl Jezi ki pafè sou tè a. Men, si l mouri fidèl devan Bondye, grasa li, moun ki fidèl ki dispoze fè sakrifis menm jan avè l yo ap jwenn lavi ki pap janm fini an. Se sa k fè Jezi di: “Yon moun ki twò renmen lavi l ap detwi l, men yon moun ki rayi lavi l nan monn sa a ap prezève l pou lavi ki pap janm fini an.” — Jan 12:25.

Jezi pap pale de tèt li sèlman, paske apre sa li di: “Si yon moun vle sèvi m, se pou l suiv mwen, e kote mwen ye, se la sèvitè m nan ap ye tou. Si yon moun vle sèvi m, Papa a ap onore l.” ​(Jan 12:26). Ala yon bèl rekonpans! Moun Papa a onore yo pral ansanm ak Kris nan Wayòm nan.

Pandan Jezi ap panse ak gwo soufrans ak lanmò terib k ap tann li, men sa l di: “Kounye a, mwen boulvèse. Men, ki sa pou m di? Papa, sove m anba sa k pral rive a.” Men, Jezi pa t vle pa fè volonte Bondye. Men sa li di: “Epoutan, rezon ki fè m vini se pou m andire moman sa a.” ​(Jan 12:27). Jezi dakò ak tout dispozisyon Bondye pran, san wete lanmò li kòm sakrifis.

Pandan Jezi nan tanp lan lendi 10 Nizan an, li pale konsènan lanmò k ap tann li nan yon ti tan. Jezi ap enkyete l sou fason yo pral sal repitasyon Papa l, se poutèt sa li di: “Papa, fè non w jwenn glwa.” Gen yon gwo vwa ki sot nan syèl la ki di: “Mwen te fè l jwenn glwa e m ap fè l jwenn glwa ankò.” — Jan 12:27, 28.

Foul moun ki kanpe la yo pa rive konprann sa k pase a. Gen kèk moun ki panse se loray ki gwonde. Gen lòt ki di: “Se yon zanj ki pale avè l.” ​(Jan 12:29). Anfèt, se vwa Jewova yo fèk sot tande! E se pa premye fwa moun tande vwa Bondye anrapò ak Jezi.

Nan moman batèm Jezi, sa gen twazan edmi, Jan ki te konn batize moun nan te tande Bondye di konsènan Jezi: “Men Pitit Gason m nan, pitit mwen renmen anpil la, li menm mwen pran plezi nan li a.” Apre sa, yon ti tan apre fèt Pak ane 32 epòk nou an, aparans Jezi te chanje devan Jak, Jan ak Pyè. Twa mesye sa yo te tande Bondye di: “Se Pitit Gason m, Pitit mwen renmen anpil la, li menm mwen pran plezi nan li a. Koute l.” ​(Matye 3:17; 17:5). Men kounye a, sa fè twazyèm fwa moun tande vwa Bondye ankò. Men fwa sa a, lè Jewova pale a, anpil moun tande!

Men sa Jezi di: “Se pa pou mwen vwa sa a pale, men se pou nou.” ​(Jan 12:30). Sa montre aklè Jezi se Pitit Bondye toutbon, Mesi yo te anonse a.

Anplis de sa, lefètke Jezi te rete fidèl, li bay moun egzanp sou fason pou yo mennen lavi yo e li montre Satan Ledyab, chèf monn nan, merite detwi. Men sa Jezi di: “Kounye a, jijman monn nan ap fèt. Kounye a, yo pral mete chèf monn nan deyò.” Lanmò Jezi k ap pwoche a pap yon echèk, okontrè, lanmò sa a ap yon viktwa. Sa k fè sa? Men sa Jezi esplike: “Epoutan, lè yo leve m anlè sou tè a, m ap rale tout kalite moun vin jwenn mwen.” ​(Jan 12:31, 32). Jezi ap rale moun vin jwenn li grasa lanmò l, konsa, l ap ouvri chemen pou moun ka gen lavi ki pap janm fini an.

Men sa foul moun yo di anrapò ak zafè “leve” Jezi pale a: “Lalwa fè nou konnen Kris la ap la pou toutan. Kòman w fè di yo dwe leve Pitit lòm nan anlè? Kiyès Pitit lòm sa a ye?” ​(Jan 12:34). Malgre tout prèv moun yo genyen, san wete vwa Bondye yo sot tande a, pifò nan yo pa kwè Jezi se Pitit lòm nan toutbonvre, Mesi yo te pwomèt la.

Jan Jezi te fè sa anvan, li pale de tèt li ankò antanke “limyè” a (Jan 8:12; 9:5). Men sa l di pou l ankouraje foul la: “Limyè a ap nan mitan nou pou yon tikras tan ankò. Mache pandan nou gen limyè a, pou fènwa pa domine sou nou. [...] Pandan nou gen limyè a, demontre nou gen lafwa nan limyè a, pou nou ka vin pitit limyè.” ​(Jan 12:35, 36). Apre Jezi fin di pawòl sa yo, li retire kò l paske se pa t 10 Nizan li te gen pou l mouri. Se nan jou 14 Nizan an, jou fèt Pak la, yo te gen pou yo “leve” l, sa vle di pou yo kloure l sou yon poto. — Galat 3:13.

Lè nou gade aktivite Jezi te fè pandan l te sou tè a, li klè pwofesi sa a te akonpli lè Juif yo pa t mete lafwa nan li. Ezayi te anonse je pèp la t ap fèmen e kè yo t ap di, e konsa yo pa t ap kase tèt tounen pou yo jwenn gerizon (Ezayi 6:10; Jan 12:40). Vrèmanvre, pifò nan Juif yo fè espre yo rejte prèv ki montre Jezi se Sila a Bondye te pwomèt k ap ba yo delivrans lan, sa vle li se chemen lavi a.

Nikodèm ak Jozèf moun Arimate ak anpil lòt chèf “te mete lafwa” nan Jezi. Men, èske yo t ap montre yo gen lafwa oswa èske yo t ap pè fè sa paske yo pè pou yo pa pèdi pozisyon yo nan sinagòg la oswa paske yo “renmen jwenn glwa nan men lèzòm”? — Jan 12:42, 43.

Jezi esplike ki sa sa gen ladan l pou yon moun mete lafwa nan li, li di: “Moun ki mete lafwa nan mwen, se pa nan mwen sèlman li mete lafwa, men li mete lafwa nan Sila a ki voye m nan tou. E moun ki wè m wè Sila a ki voye m nan tou.” Verite Bondye aprann Jezi pou l anseye yo ak sa Jezi kontinye ap fè konnen yo tèlman enpòtan, sa pouse Jezi di: “Yon moun ki rejte m e ki pa aksepte pawòl mwen, gen yon bagay k ap jije l. Se pawòl mwen di k ap jije l nan dènye jou a.” — Jan 12:44, 45, 48.

Men sa Jezi di pou l fini: “Mwen pa pale selon mwen menm, men Papa a ki voye m ban m lòd sou sa pou m di ak sa pou m anseye. Mwen konnen lòd li bay la ap pèmèt moun jwenn lavi ki pap janm fini an.” ​(Jan 12:49, 50). Jezi konnen nan yon tikras tan, san l pral koule an sakrifis pou moun ki demontre lafwa nan li yo ka gen lavi. — Women 5:8, 9.