LESON 6

Aplike vèsè yo yon fason ki klè

Jan 10:33-36.

SA POU W FÈ: Pa annik li yon vèsè epi w pase nan lòt pwen an. Asire w moun k ap koute w yo byen wè rapò ki genyen ant vèsè w li a ak pwen w ap egzamine a.

FASON POU W FÈ SA:

Fè mo kle yo parèt. Apre w fin li yon vèsè, met aksan sou mo ki gen yon rapò dirèk ak pwen prensipal ki nan sijè w la. Ou ka fè sa lè w repete mo sa yo oswa lè w poze yon kesyon pou w pouse moun k ap koute w yo idantifye mo kle yo.

Si w itilize diferan mo pou w esplike ide ki nan vèsè a, asire w moun k ap koute w yo ap toujou wè rapò ki genyen ant mo ki nan Bib la ak pwen prensipal w ap devlope a.
Fè pwen an parèt klè. Si w gen yon bon rezon pou w li yon vèsè, esplike ki jan mo kle ki nan vèsè a soutni rezon sa a.

Kite Bib ou ouvri toutpandan w ap esplike vèsè a. Sa ap ede moun k ap koute w yo wè rapò ki genyen ant sa w ap di yo ak vèsè w sot li a.
Fè yon aplikasyon ki senp. Evite pale sou yon seri detay ki pa gen rapò ak pwen prensipal la. Selon sa moun k ap koute w yo deja konnen sou sijè a, chèche wè ki kantite detay ki nesesè pou w fè pwen ki nan aplikasyon w ap fè a parèt klè pou yo e pou yo konprann li.