Moyiz te pase 40 an ap viv Madyan. Li te marye e l te vin gen pitit. Yon jou, pandan Moyiz t ap pran swen mouton l yo bò Mòn Sinayi, li te wè yon bagay ki te fè l sezi. Te gen yon pye pikan ki te gen dife ladan l, men pye pikan an pa boule! Lè Moyiz avanse pou l wè sa k fè sa, li tande yon vwa nan touf pikan an ki di l: ‘Moyiz! Pinga w vin pi pre pase kote w ye a. Retire sandal ou paske kote w kanpe a se yon kote ki sakre.’ Se Jewova ki te sèvi ak yon zanj pou l pale ak Moyiz.

Moyiz te pè, se sa k fè l te kouvri figi l. Vwa a te di l: ‘Mwen wè soufrans Izrayelit yo. Mwen pral delivre yo anba men Ejipsyen yo e m ap mennen yo nan yon bon peyi. Se ou menm ki pral fè pèp mwen an soti nan peyi Ejip.’ Èske w pa panse sa te ka fè Moyiz sezi?

Moyiz te mande Bondye: ‘Ki sa m pou m di lè pèp la mande m kiyès ki voye m?’ Bondye reponn: ‘Di yo se Jewova, Bondye Abraram nan, Bondye Izarak la ak Bondye Jakòb la ki voye w.’ Epi, Moyiz di: ‘E si pèp la pa koute m?’ Jewova te bay Moyiz prèv l ap ede l. Li te mande Moyiz pou l lage baton l lan atè. Apre sa, baton an te tounen yon koulèv! Lè Moyiz pran koulèv la nan ke, li te tounen yon baton ankò. Epi, Jewova di: ‘Lè w fè mirak sa a, sa ap montre se mwen ki voye w.’

Moyiz di: ‘Mwen pa konn pale byen.’ Epi, men pwomès Jewova te fè Moyiz: ‘M ap di w sa pou w di e m ap voye Arawon, frè w la, avè w pou ede w.’ Piske Moyiz te konnen Jewova te avè l, li te pran madanm li ak pitit gason l yo e li retounen ann Ejip.

Farawon te fòse Izrayelit yo travay di kòm esklav. Jewova te voye Moyiz ak Arawon al pot yon mesaj bay Farawon, men sa l te voye di l: ‘Kite pèp mwen an ale pou yo ka adore m nan dezè a.’ Farawon te reponn yon fason ki montre li pa gen respè, li te di: ‘Sa Jewova di a pa enterese m, epi m pap kite Izrayelit yo ale.’ Apre sa, Farawon te fòse yo travay pi di toujou. Jewova t apral bay Farawon yon leson. Ou konn ki jan l te fè sa? Li te lage dis flewo oubyen malè sou peyi Ejip. Jewova te di Moyiz: ‘Farawon pap koute m. Demen maten, l ap bò Rivyè Nil la. Al kote l, epi di l, piske l pa kite pèp mwen an ale, tout dlo Rivyè Nil la ap tounen san.’ Moyiz te obeyi, epi l al kot Farawon. Farawon t ap gade lè Arawon te frape Rivyè Nil la ak baton l, e rivyè a te tounen san. Rivyè a te vin gen move sant, pwason yo te mouri e moun pa t ka bwè dlo Rivyè Nil la. Aktout sa, Farawon te refize kite Izrayelit yo ale.

Sèt jou annapre, Jewova fè Moyiz retounen al pale ak Farawon, li di l: ‘Si w pa voye pèp mwen an ale, peyi Ejip ap plen ak krapo.’ Arawon te leve baton l lan, e krapo te kòmanse kouvri peyi a. Moun yo te jwenn krapo anndan kay yo, sou kabann yo ak nan veso yo. Te gen krapo toupatou! Farawon te mande Moyiz pou l sipliye Jewova pou l fè malè sa a sispann. Farawon te pwomèt l ap kite Izrayelit yo ale. Se sa k fè, Jewova te fè malè a sispann. Tout krapo yo te mouri e Ejipsyen yo te rasanble yo fè plizyè pil. Peyi a te kòmanse vin gen move sant. Men, Farawon te toujou pa kite pèp la ale.

Apre sa, Jewova di Moyiz: ‘Arawon dwe frape baton l lan atè, e pousyè a ap tounen yon pakèt moustik k ap pike moun.’ Menm moman an, te vin gen moustik toupatou. Kèk nan moun Farawon yo te di l: ‘Se Bondye ki lage malè sa a.’ Malgre sa, Farawon pa t kite Izrayelit yo ale.