YON MONN TÈT ANBA

4 | Pwoteje esperans ou

POUKISA SA ENPÒTAN?

Enkyetid ki gen nan monn tètchaje sa a ka agrave sitiyasyon moun yo nan domèn fizik ak nan domèn emosyonèl. Anpil moun ki viktim kalite evènman sa yo pa wè okenn espwa pou lavni. Ki jan yo reyaji?

Anpil nan yo refize panse ak lavni.
Gen nan yo ki lage kò yo nan alkòl oswa dwòg pou yo ka bliye pwoblèm yo.
Gen kèk nan yo ki fè konprann lanmò pi bon pase lavi. Yo mande tèt yo “Poukisa pou m kontinye viv?”.

Sa w ta dwe konnen

Gen kèk nan pwoblèm w ap rankontre yo ki ka la pou yon ti tan e sanzatann, sa ka chanje pou vin pi bon.
Menmsi sitiyasyon w pa ta chanje, gen bagay ou ka fè pou ede w jere sa.
Bib la bay bonjan espwa, yon solisyon k ap dire pou tout pwoblèm lèzòm yo.

Sa w ka fè kounye a

Men sa Bib la di: “Pa janm bay tèt nou pwoblèm pou demen, paske demen ap gen pwòp pwoblèm pa l. Chak jou gen kont traka pa l.” — Matye 6:34.

Viv yon jou alafwa. Pa kite enkyetid konsènan demen anpeche w fè sa w ta dwe fè jodi a.

Plede enkyete pou bagay negatif ki ka rive, se sèlman ogmante l ap ogmante strès ou e l ap febli espwa w gen pou yon pi bon avni.

SA W KA FÈ — Kèk konsèy ki ka ede w

KONSANTRE W SOU SA KI POZITIF

Men sa Bib la di: “Pa gen yon jou ki bon pou yon moun ki nan lapenn, men, yon moun ki gen kè kontan toujou ap fete.” (Pwovèb 15:15). Yon pwennvi ki negatif ka anpeche w wè solisyon ki anba je w yo. Poutan, yon pwennvi pozitif ka ede w panse ak fason w ka jere sitiyasyon w.

Limite kantite tan w pase nan gade ak tande nouvèl.
Nan fen chak jounen, fè yon lis de ou twa bagay ou ka gen rekonesans pou yo.
Fè yon lis tout sa w gen pou w fè, e mete ladan l sèlman sa w ap ka fè pou jounen an. Separe gwo travay yo an plizyè etap ki pi piti, konsa w ap ka wè rezilta efò w yo nan fen jounen an.

CHÈCHE ÈD

Men sa Bib la di: “Yon moun ki met kò l apa [...] refize aji avèk sajès.” (Pwovèb 18:1). Ou pap ka soti nan yon twou ki fon poukont ou, men grasa èd yon lòt moun ou ka reyisi.

Chèche èd fanmi w oswa zanmi w.
Epitou, chèche wè ki fason ou menm ou ka ede yo. Lè w ede lòt moun, sa ap ede w gen yon pwennvi ekilibre sou pwoblèm pa w yo.
Si w pèdi espwa ak anvi pou w viv, li t ap bon pou w chèche fè yon konsiltasyon medikal. Pafwa, lè yon moun santi bagay yo twòp pou li konsa, se konn yon sentòm pwoblèm sante tankou depresyon. Anpil moun te reyisi jwenn èd lè yo chèche tretman.a

a Reveye n! pa rekòmande okenn tretman presi nan kesyon lasante.

Bib la ofri bonjan espwa

Men sa youn nan moun ki te patisipe nan ekri Sòm yo te di Bondye nan yon priyè: “Pawòl ou se yon lanp pou pye m e li se yon limyè pou wout mwen.” (Sòm 119:105). Annou egzamine ki jan Bib la, pawòl Bondye a, jwe wòl sa yo:

Lè l fè nwa, yon lanp ap ede nou konnen kote pou n met pye nou. Menm jan an tou, Bib la gen sajès pratik ki ka gide nou lè n bezwen pran yon desizyon difisil.

Yon limyè ka klere wout nou yon fason pou n wè pi lwen devan nou. Menm jan an tou, Bib la ka ede nou wè pi klè ki sa demen sere pou nou.

Bib la se yon liv sakre ki pa sèlman esplike istwa lèzòm depi okòmansman, men tou, li bay bonjan espwa pou lavni. Li reponn kesyon sa yo:

Ki jan?

Fason soufrans lèzòm te kòmanse: Men sa Bib la di: “Menm jan akoz yon sèl moun peche antre nan monn nan, e akoz peche lanmò antre, e konsa lanmò blayi sou tout moun paske yo tout te peche.” — Women 5:12.

Poukisa?

Rezon ki fè dominasyon lèzòm nan echwe lè y ap eseye rezoud pwoblèm nou yo: Men sa Bib la di: “Se pa lòm ki pou deside ki kote l ap met pye l.” (Jeremi 10:23). Fason monn nan ye jodi a konfime verite sa a.

Ki sa?

Sa Bondye pral fè pou l rezoud pwoblèm nan: Men sa Bib la di: “L ap siye tout dlo nan je yo, pap gen lanmò ankò, e moun pap nan lapenn ankò akoz moun pa yo ki mouri. Pap gen ni rèl, ni doulè ankò.” — Revelasyon 21:4.