LESON 15

Pale ak konviksyon

1 Tesalonisyen 1:5.

SA POU W FÈ: Montre w kwè toutbon sa w ap di a se laverite e w kwè sa w ap di a enpòtan.

Byen prepare. Etidye sijè a jiskaske w konprann ki jan ide ki nan Ekriti yo ka mennen nan yon sèl konklizyon ki lojik. Eseye sèvi ak kèk mo senp pou w prezante pwen prensipal ki nan sijè a. Konsantre w sou fason y ap ede moun k ap koute w yo. Priye pou w jwenn lespri sen.

Lè w ap prepare prezantasyon w lan, repete l awotvwa pou w ka gen ide yo byen klè nan lespri w e pou w ka amelyore l.
Sèvi ak mo ki montre w gen konviksyon. Olye w repete mo yo egzakteman jan yo ye nan rechèch ou te fè nan piblikasyon yo, sèvi ak pwòp mo pa w. Chwazi mo ki montre w gen asirans nan sa w ap di a.
Pale ak tout kè w e avèk senserite. Pale ak yon volim vwa ki apwopriye. Kote sa pa yon pwoblèm, gade moun k ap koute w yo nan je pou w kenbe kontak ak yo.

Pa konfonn pale ak konviksyon ak lè yon moun manke tak, lè l vle fè kwè se sa l di ki bon oswa lè l ap fòse moun. Menm lè w ap pale ak senserite, ankouraje moun k ap koute w yo yon fason ki demontre lanmou.