Nou menm jèn, kontinye fè pwogrè apre n fin batize

1. Ki bon bagay anpil jèn deja fè?

CHAK ane, gen plizyè milye jèn kretyen ki batize. Èske w deja fè sa? Si w deja fè sa, frè w ak sè w yo nan kongregasyon an kontan pou ou, e Jewova kontan tou (Pwo. 27:11)! Fè yon ti reflechi sou tout sa w deja fè. Ou te byen etidye Pawòl Bondye a, e petèt ou te fè plizyè ane ap fè sa. Etid ou te fè yo te konvenk ou Bib la se Pawòl Bondye. Sa k pi enpòtan an, ou te vin aprann konnen Sila a ki te fè ekri Bib la e w te vin aprann renmen l. Ou te tèlman vin renmen Jewova, ou te vwe l lavi w, e kounye a, ou se yon sèvitè Jewova ki batize. Se yon bon desizyon w te pran!

2. Sou ki sa nou pral pale nan atik sa a?

² Sandout lafwa w te pase anba divès kalite eprèv toutpandan w t ap fè pwogrè pou w batize. Men, tank w ap vin pi gran, w ap jwenn lòt eprèv ankò. Satan pral chèche fè w sispann renmen Jewova e l pral chèche fè w sispann sèvi l (Efe. 4:14). Ou pa dwe kite sa rive. Ki sa k kapab ede w ret fidèl ak Jewova epi kenbe pwomès ou te fè l lè w te vwe l lavi w la? Ou dwe kontinye fè pwogrè, sa vle di, ou dwe kontinye “fè efò” pou w vin gen matirite antanke kretyen (Ebre 6:1). Men, ki jan w ka fè sa? Se sou sa nou pral pale nan atik sa a.

KI JAN W KA VIN GEN MATIRITE ANTANKE KRETYEN?

3. Ki pwogrè tout kretyen bezwen fè apre yo fin batize?

³ Apre n fin batize, nou tout bezwen kontinye suiv konsèy apot Pòl te bay kretyen nan vil Efèz yo. Li te ankouraje yo pou yo “fin grandi nèt” antanke kretyen (Efe. 4:13). Se yon lòt fason pou l te di yo: ‘Kontinye fè pwogrè.’ N ap ka konprann sa Pòl te di a lè n konpare pwogrè yon moun fè pou l vin gen matirite antanke kretyen ak lè yon timoun ap grandi. Lè yon tibebe fèk fèt, paran l kontan anpil e yo santi yo fyè. Men, li pa kapab ret tibebe toutan. Rive yon lè, l ap bezwen sispann fè yon seri bagay “ki gen rapò ak timoun”. (1 Kor. 13:11.) Se menm bagay la pou kretyen yo tou. Apre n fin batize, nou dwe kontinye fè pwogrè. Ann wè kèk konsèy ki kapab ede n fè sa.

4. Ki kalite ki kapab ede w fè pwogrè antanke kretyen? Esplike. (Filipyen 1:9).

⁴ Ou bezwen vin gen plis lanmou pou Jewova. Ou deja renmen Jewova anpil. Men w kapab vin pi renmen l toujou. Ki jan w ka fè sa? Apot Pòl montre youn nan fason nou kapab fè sa, jan n ka wè sa nan Filipyen 1:9. (Li vèsè a.) Pòl te priye pou lanmou kretyen nan vil Filip yo “ogmante chak jou pi plis”. Donk, nou kapab vin gen plis lanmou. Nou kapab vin gen lanmou sa a lè n vin gen yon “konesans egzak [ak] yon konpreyansyon total”. Plis nou aprann konnen Jewova, se plis nou renmen l, e se plis nou renmen pèsonalite l ak fason l aji. Nou vin pi anvi fè kè l kontan e nou pap janm vle aji yon fason k ap fè l lapenn. Nou fè tout sa n kapab pou n rive konprann volonte l ak fason n kapab fè volonte l.

5-6. Ki jan n ka vin pi renmen Jewova? Esplike.

⁵ Jezi te imite Papa l yon fason ki pafè. Donk, lè n aprann konn Jezi pi byen, n ap vin pi renmen Jewova (Ebre 1:3). Pi bon fason pou n aprann konn Jezi, se lè n etidye kat Evanjil yo. Si w poko gen bon abitid pou w li Bib la chak jou, sa w panse si w ta kòmanse fè sa depi kounye a? Pandan w ap li istwa lavi Jezi, byen reflechi sou kalite l yo. Li te yon moun ki abòdab, li te renmen pran timoun piti nan bra l (Mak 10:13-16). Li te met disip li yo alèz. Yo pa t santi yo jennen pou yo te di l sa yo panse (Mat. 16:22). Kidonk, Jezi te imite Papa l ki nan syèl la, sa ki montre Jewova vrèman abòdab. Nou kapab priye Jewova, e lè n ap fè sa, nou kapab di l tout sa k nan kè n. Nou konnen li pap jije nou. Li renmen nou e li gen sousi pou nou. — 1 Pyè 5:7.

⁶ Jezi te gen pitye pou moun. Men sa apot Matye fè konnen: “Lè l wè foul moun yo, li gen pitye pou yo, paske yo te depafini e yo te lage tankou mouton ki san bèje.” ​(Mat. 9:36). E Jewova li menm, ki jan l santi l? Men sa Jezi te di: “Papa m ki nan syèl la pa ta renmen pou menm youn nan tipiti sa yo peri.” ​(Mat. 18:14). Èske pawòl sa yo pa touche kè n? Donk, tank nou aprann konn Jezi pi byen, se tank nou vin pi renmen Jewova.

7. Lè w pase tan ak frè ak sè ki gen matirite, ki jan sa kapab ede w?

⁷ Yon lòt fason w ka vin pi renmen Jewova epi fè pwogrè antanke kretyen, se lè w pase tan ak frè ak sè ki gen matirite nan kongregasyon an. Gade jan yo gen anpil kè kontan. Yo pa janm regrèt desizyon yo te pran pou yo sèvi Jewova. Mande yo rakonte w kèk eksperyans yo te fè nan sèvis Jewova a. Lè w gen yon desizyon enpòtan pou w pran, mande yo konsèy. Dayè, “tout bagay mache byen lè gen anpil moun k ap bay konsèy”. — Pwo. 11:14.

8. Ki sa w ka fè si w ta vin gen dout sou sa Bib la di?

⁸ Konbat dout ou genyen yo. Jan nou te wè sa nan paragraf 2 a, Satan pral eseye anpeche w kontinye fè pwogrè. Youn nan fason l ka fè sa, se lè l fè w gen dout sou yon seri bagay ou te aprann nan Bib la. Pa egzanp, petèt yon lè, gen moun ki pral chèche fè w kwè se pa Bondye ki kreye nou, men, nou egziste grasa evolisyon. Sandout, lè w te pi piti, ou pa t bay sa twòp enpòtans, men, kòm ou vin pi gran kounye a, petèt yo anseye w sa lekòl. Sa pwofesè w yo di pou kore teyori evolisyon an kapab parèt lojik e w ka anvi dakò ak yo. Men, petèt yo pa janm chèche jwenn prèv ki montre gen yon Kreyatè. Sonje prensip nou jwenn nan Pwovèb 18:17 la, men sa l di: “Moun ki pale anvan nan yon pwosè parèt gen rezon, jiskaske lòt moun nan vini epi li poze l kesyon.” Pa annik kwè je fèmen tout sa yo di w nan lekòl ou, okontrè, pran tan pou w byen egzamine verite ki nan Pawòl Bondye a. Fè rechèch nan piblikasyon nou yo. Pale ak frè ak sè ki te kwè nan evolisyon yon lè. Mande yo ki sa k te fè yo vin gen konviksyon gen yon Kreyatè ki renmen nou. Konvèsasyon ki ankourajan konsa kapab ede w jwenn prèv ki montre gen yon Kreyatè.

9. Ki sa w aprann nan egzanp Melissa?

⁹ Gen yon sè ki rele Melissa ki te fè rechèch sou sijè ki gen rapò ak kreyasyon an, e sa te ede l anpilb. Men sa l di: “Nan lekòl, fason pwofesè yo pale de evolisyon fè moun kwè se laverite. Okòmansman, mwen te pè fè rechèch anrapò ak dout mwen te genyen yo. Mwen te pè pou m pa t vin gen dout sou kwayans mwen. Men, mwen te di tèt mwen Jewova pa vle nou sèvi l je fèmen. Donk, mwen te kòmanse fè rechèch. Mwen te li liv Y a-t-il un Créateur qui se soucie de vous? ak bwochi La vie a-t-elle été créée? ak bwochi Cinq questions à se poser sur l’origine de la vie. Se egzakteman sa m te bezwen. Mwen te dwe fè sa pi bonè.”

10-11. Ki sa ki kapab ede w kontinye rete pwòp nan domèn moral? (1 Tesalonisyen 4:3, 4).

¹⁰ Evite gen move konduit. Pandan adolesans ou, dezi seksyèl ou genyen yo kapab fò anpil, e lòt moun ka ap fè gwo presyon sou ou pou w fè imoralite seksyèl. Se sa Satan ta renmen w fè. Ki sa k ka ede w rete pwòp nan domèn moral? (Li 1 Tesalonisyen 4:3, 4.) Lè w ap priye, di Jewova sa w santi. Fè l konnen ki jan w santi w toutbon, e mande l pou l ba w fòs (Mat. 6:13). Sonje Jewova vle ede w, li pa vle kondane w (Sòm 103:13, 14). Ou kapab chèche jwenn èd nan Pawòl Bondye a tou. Melissa nou te pale de li pi wo a te fè anpil efò pou l reziste kont yon seri panse li te genyen ki pa t pwòp. Men sa l di: “Piske m li Bib la chak jou, sa te ede m kontinye lite. Sa te fè m sonje se byen Jewova m ye e se li mwen vle sèvi.” — Sòm 119:9.

¹¹ Pa chèche rezoud pwoblèm ou yo poukò w. Fè paran w konnen sa k ap trakase w. Se vre, li pa fasil pou w pale sou bagay konsa, men li enpòtan pou w fè sa. Men sa Melissa di: “Mwen te priye Jewova pou l ban m kouraj, e annapre m t al pale ak papa m sou pwoblèm mwen te genyen an. Apre sa, mwen te santi m soulaje anpil. Mwen konnen Jewova te fyè de mwen.”

12. Ki jan w kapab pran bon desizyon?

¹² Kite prensip ki nan Bib la gide w. Tank w ap vin pi gran, paran w ap pèmèt ou pran pwòp desizyon w. Men, gen anpil bagay toujou ou poko konnen. Ki sa k ka ede w pou w pa fè yon bagay ki ka gen move efè sou amitye w ak Jewova (Pwo. 22:3)? Men sa yon sè ki rele Kari fè konnen ki te ede l pran pi bon desizyon. Li te rann li kont kretyen ki gen matirite yo pa bezwen yon règ pou yo konn sa pou yo fè nan chak sitiyasyon. Men sa l di: “Mwen te bezwen konprann prensip ki nan Bib la olye m annik suiv yon seri règ.” Lè w ap fè lekti Labib, mande tèt ou: ‘Ki sa vèsè sa a aprann mwen sou fason Jewova panse? Èske vèsè sa a gen prensip ki kapab ede m gen bon konduit? Si se sa, ki jan sa ap ede m lè m aplike yo?’ ​(Sòm 19:7; Eza. 48:17, 18). Lè w li Bib la, e w medite sou prensip ki ladan l yo, l ap pi fasil pou w pran desizyon k ap fè kè Jewova kontan. Tank w ap kontinye fè pwogrè, w ap remake ou pa bezwen gen yon règ pou chak sitiyasyon, paske w ap vin konprann fason Jewova panse.

13. Ki jan bon zanmi kapab ede w? (Pwovèb 13:20).

¹³ Chwazi fè zanmi ak moun ki renmen Jewova. Jan nou te wè sa pi wo a, moun ou chwazi kòm zanmi ka ede w vin yon kretyen ki gen matirite. (Li Pwovèb 13:20.) Gen yon sè ki rele Sara ki te vin pa gen kè kontan ankò. Men, gen yon bagay ki te rive ki te fè l vin gen kè kontan ankò. Men sa Sara di: “Mwen te vin gen bon zanmi nan bon moman. Mwen te konn pran randevou ak yon jèn sè chak semèn pou n etidye Toudegad ansanm. Yon lòt zanmi m te ede m pou m kòmanse fè kòmantè nan reyinyon. Grasa èd zanmi m yo te ban mwen, mwen te vin bay etid pèsonèl mwen ak lapriyè plis enpòtans. Mwen te vin gen yon pi bon relasyon ak Jewova e m te kòmanse santi m gen kè kontan ankò.”

14. Ki jan Julien te vin gen bon zanmi?

¹⁴ Ki jan w kapab fè zanmi ak moun k ap gen bon enfliyans sou ou? Men sa Julien, yon frè k ap sèvi kòm ansyen kounye a, di: “Lè m te pi jèn, mwen te vin bon zanmi moun mwen te konn preche ansanm avèk yo. Zanmi sa yo te chofe nan travay fè disip la, e yo te ede m wè jan travay sa a kapab bay kè kontan. Mwen te vin gen objektif pou m antre nan sèvis aplentan. Epitou, mwen te rann mwen kont rezon ki fè m pa t gen anpil bon zanmi, se paske m t ap chèche fè zanmi ak moun ki pòy mwen sèlman. Annapre, mwen te vin gen bon zanmi tou pandan m nan Betèl. Egzanp yo te bay te ede m pi byen chwazi detant m ap pran, e sa te fè m vin pi pwòch ak Jewova.”

15. Ki avètisman Pòl te bay Timote anrapò ak fè zanmi? (2 Timote 2:20-22).

¹⁵ Ki sa w kapab fè si w ta vin rann ou kont gen yon moun nan kongregasyon an ki pa ka yon bon zanmi pou ou? Pòl te konnen gen kèk moun nan kongregasyon premye syèk la ki pa t gen bon konduit antanke kretyen, se sa k fè li te avèti Timote pou l veye kò l ak yo. (Li 2 Timote 2:20-22.) Amitye nou gen ak Jewova a gen anpil valè. Nou te fè anpil efò pou n vin pwòch ak Jewova, donk, nou pa dwe kite pèsonn gate amitye sa a. — Sòm 26:4.

LÈ W GEN OBJEKTIF, KI JAN SA KAPAB EDE W FÈ PWOGRÈ ANTANKE KRETYEN?

16. Ki objektif konsa ou ta dwe chèche genyen?

¹⁶ Chèche gen bonjan objektif. Chèche gen objektif k ap ranfòse lafwa w e k ap ede w vin yon kretyen ki gen plis matirite (Efe. 3:16). Pa egzanp, ou ka deside pi byen suiv pwogram ou genyen pou w fè etid pèsonèl ou e pou w li Labib (Sòm 1:2, 3). Oubyen tou, ou kapab fè efò pou w priye pi souvan e pou w fè sa ak tout kè w. Petèt ou bezwen fè plis atansyon lè w ap chwazi detant w ap pran ak kantite tan w ap pase ladan yo (Efe. 5:15, 16). Lè Jewova wè jan w ap fè efò pou w fè plis pwogrè, sa ap fè kè l kontan.

17. Ki satisfaksyon w ap jwenn lè w ede lòt moun?

¹⁷ W ap vin gen plis matirite antanke kretyen lè w ede lòt moun. Men sa Jezi te di: “Yon moun pi kontan lè l bay pase lè l resevwa.” ​(Tra. 20:35). W ap vin gen anpil kè kontan si w sèvi ak yon pati nan tan w ak nan fòs ou genyen pandan w jèn nan pou w ede lòt moun. Pa egzanp, ou kapab chèche gen objektif pou w ede frè ak sè nan kongregasyon w lan ki granmoun e ki andikape. Petèt, ou kapab al fè komisyon pou yo, oswa montre yo ki jan pou yo sèvi ak aparèy elektwonik yo genyen. Si w se yon frè, chèche gen objektif pou w vin sèvitè ministeryèl pou w ka ede frè w ak sè w yo (Flp. 2:4). Epitou, ou montre w renmen moun ki pap sèvi Jewova yo lè w preche yo bon nouvèl Wayòm nan (Mat. 9:36, 37). E si sa posib, chèche gen objektif pou w antre nan yon fòm sèvis aplentan.

18. Ki jan sèvis aplentan ka ede w vin pi pwòch ak Jewova?

¹⁸ Sèvis aplentan kapab ba w anpil okazyon pou w vin pi pwòch ak Jewova. Si w pyonye, ou ka gen posiblite asiste Lekòl pou evanjelizatè Wayòm nan. Ou ka al sèvi nan Betèl, oswa patisipe nan pwojè konstriksyon òganizasyon an ap fè. Men sa Kaitlyn, yon jèn sè ki pyonye, di: “Yon bagay ki te vrèman ede m vin gen plis matirite antanke kretyen apre m fin batize se lefètke m te konn preche ansanm ak frè ak sè ki gen eksperyans. Egzanp yo te ankouraje m pou m chèche konprann Bib la pi byen e pou m vin yon pi bon anseyan.”

19. Ki benediksyon w ap jwenn pandan w ap kontinye fè efò pou w vin yon kretyen ki gen matirite?

¹⁹ Pandan w ap kontinye fè efò pou w vin yon kretyen ki gen matirite, w ap jwenn anpil benediksyon. Ou pap gaspiye jenès ou nan chèche fè yon seri bagay ki pa vrèman enpòtan (1 Jan 2:17). Ou pap pran move desizyon ki te ka fè w soufri. Okontrè, w ap vrèman reyisi nan lavi w e w ap gen kè kontan toutbon (Pwo. 16:3). Bon egzanp ou bay ap ankouraje frè w ak sè w yo, jèn kou granmoun (1 Tim. 4:12). E sa k pi enpòtan an, w ap santi w anpè e w ap satisfè lefètke w konnen ou fè kè Jewova kontan e dèske w gen yon relasyon sere avè l. — Pwo. 23:15, 16.