«Neʼets ka olnáj an alwaʼ kaw»
«Ani tin puwél an tsabál neʼets ka olnáj an alwaʼ kaw, abal patal an atiklábchik kin atsʼaʼ ani tam neʼets ka ulits in taltal an xeʼtsintaláb.» (MATEO 24:14)
¿Jantʼoj in leʼak kin uluw a Jesús? An Evangelio in kʼál a Lucas in ulal abal a Jesús «u xeʼtsinal al yan i bichow ani al yan i kwenchaláb in olnál an alwaʼ kaw» (Lucas 8:1). «U kwaʼal u uchbíl kin kʼalej ku ólchij an inik al píl i bichow an alwaʼ kaw. Ani talbél in uluw: Kom játs tin abadh kʼal a Dios.» (Lucas 4:43.) Okʼox in abaʼchik in aykolil abal ka kʼalej kin ólnaʼ an alwaʼ kaw al i bichow ani i kwenchal axi yab lej ow. Talbél in uchaʼchik: «Kwaʼal ti kin ólnanchij u bij tin puwél an tsabál» (Hechos 1:8; Lucas 10:1).
Jawaʼ in tʼajaʼchik an kʼaʼál aykol. In aykolil a Jesús dhubatkʼij in tujchij kin tʼajaʼ an tʼojláb. Ti Hechos 5:42 in ulal: «Chudhél chudhél ban templo ani ti kʼimádh, xeʼetschik ti exóbchix kʼal in Káwintal a Dios ani ti ólchix kʼal in bij a Jesucristo». Axéʼ xi tʼojláb yab expidh in tʼajálak talchik i atikláb, patal in aykolil a Jesús in tʼajálakchik. A August Neander, in dhuchaʼ: «Abal a Celso, jats an kʼaʼál atikláb axi in kawíliy in aykolil a Jesús. Jajáʼ in telalakchik abal an béletnom koʼnél, an tsʼejkom pajabláb, an tsʼejkom tóltom ani i atiklábchik axi yab exoblámadh, in tsápnanchalakchik kin ólnaʼ an alwaʼ kaw». A Jean Bernardi, axi in dhuchaʼ an libro Les premiers siècles de LʼÉglise (Los primeros siglos de la Iglesia), in uluw abal an aykolchik kwaʼalak kin ólchij patal an atiklab an alwaʼ kaw, tin puwél an Tsabál. Jaxtám, «kwaʼal kin ólnaʼ an alwaʼ kaw ban bél, ban bichow, ban plazas juʼtáj ti waʼats i atikláb ani ban atáj. Jayej kwaʼalakchik kin tʼajaʼ, bélits max in tametnál i kʼibataláb o imbáj». Ani jantʼiniʼ tin dhuchaʼ talbél, kwaʼalak ka kʼalejchik ti ólnom «tin puwél an Tsabál».
¿Jitaʼchik in tʼajál axéʼ xi tʼojláb xowéʼ? A David Watson in uluw abal «an atiklábchik yab u utel kʼal a Dios kom an iglesias yab in tsapnanchal ka kʼalej ti ólnom ani kin exobchij an atiklábchik». Ban libro ¿Por qué se van los católicos?, a José Luis Pérez Guadalupe in dhuchaʼ abal «expidh an ólchixchik kʼal a Jehová u kʼalel ti ólnom atáj ti atáj», ani abal an evangélicos, an adventistas ani kʼeʼat i belomtaláb yab in tʼajál antsanáʼ.
Lej exbadh jawaʼ in uluw a Jonathan Turley al jun i informe del Cato Institute: «Abal expidh ki uluw ‹ólchix kʼal a Jehová› ani an atiklábchik in exlálits abal jajáʼchik u ulel ti ólnom tin kʼimáʼ tam yab in aychal. Ani abal jajáʼchik yab expidh pel abal kin bukʼuw jawaʼ in exlál, jajáʼchik chubax in belál jawaʼ in ólnal» (Cato Supreme Court Review, 2001-2002).
[Recuadro]
¿Tatáʼ a tʼajámalits ti kwéntaj axéʼ?
I exobnámalits abal an tʼojláb axi in tʼajálchik in tejwamedhál abal chubax pel i aykol kʼal a Cristo. ¿A exlálits jitaʼ jats? Xowéʼ ta kʼicháj waʼats yan i atikláb axi in ulal abal pel i aykol kʼal a Cristo. A Jesús in uluw: «Yab patal axi ti kin bijiy tin Ajatik neʼets ka otsits tin Eyaltal a Dios, expidh neʼets ka otsits jitats kin tʼajchij in kulbetal u tátaj ti eb» (Mateo 7:21). Abal ki batsʼuw an alwaʼtaláb axi neʼets kin chiʼdhaʼ in Eyaltal a Dios lej exbadh ki exlaʼ jitaʼ játs axi in tʼajchal in kulbetal a Dios, ani ki tʼajaʼ ti kwéntaj jitaʼ játs an chubax aykol kʼal a Cristo ani ki tsapnanchij ku kwajiy kʼal jajáʼchik. ¿A leʼ ka exlaʼ más tin kwéntaj in Eyaltal a Dios ani an alwaʼtaláb axi neʼets kin chiʼdhaʼ? (Lucas 4:43.) An ólchixchik kʼal a Jehová neʼets ti ólchij más tin kwéntaj axéʼ.