KONOWIXTALÁB TIN KWÉNTAJ AN BIBLIA
¿In pakwlál a Jehová an walabtaláb axi lej kidháb?
I éjtowal ki kulbedhaʼ a Dios
An Biblia in ulal abal an atiklábchik pel i walablom. Kom i okʼox tátaj, a Adán, tu watʼbanchij an walabtaláb. Jaxtám, tam junchikíl u wálbinal ani talbél u tʼeʼpinal kʼal jawaʼ i tʼajál. A Jesús in tsakámil a Dios tsemets abal kin jalbiy i wálab. Jaxtám xowéʼ u pakwlanchab i wálab. Axéʼ pel jun i tsʼejwalixtaláb axi a Dios tu pidhámal. (Ka ajiy Romanos 3:23, 24.)
Waʼats jitaʼ in tʼajámal i walabtaláb axi lej kidháb, jaxtám in konowiyalchik tin baʼ max neʼets ka pakwlanchat kʼal a Dios. An Biblia in ulal abal max ku walbin, a Dios etsʼey tu tʼokedhanchal i ichích kʼal in xitsʼál in tsakámil, Jesucristo (1 Juan 1:7). A Jehová in pakwlál an walabtaláb axi lej kidháb, max jun i atikláb ka chubax tʼeʼpin kʼal jawaʼ in tʼajámal. (Ka ajiy Isaías 1:18.)
¿Jantʼoj kwaʼal ki tʼajaʼ wawáʼ abal a Dios tu ku pakwlanchij i wálab?
Max i leʼ abal a Dios tu ku pakwlanchij i wálab okʼox kwaʼal ki exlaʼ, ki exbay jaleʼ tin tʼajál jantʼoj, ki exlaʼ an abatnaxtaláb axi Jajáʼ tu pidhál (Juan 17:3). A Jehová in pakwlanchal jitaʼ chubax u tʼeʼpinal kʼal in wálab ani in tsápnanchal yabáts kin tʼajaʼ. (Ka ajiy Hechos 3:19.)
I éjtowal ki kulbedhaʼ a Dios kom Jajáʼ tu éxbayal. Jajáʼ lej alwaʼ inik ani u yajnanchix. ¿Yab aníts abal axéʼ in tʼajál abal ki leʼnaʼ ki kulbedhaʼ a Dios ani ki tʼajaʼ ti jaʼúb? (Ka ajiy Salmo 103:13, 14.)