¿Jaleʼ tin jilál a Dios ki yajchiknaʼ?

¿JANTʼOJ IN ATSʼÁL A DIOS TAM IN TSUʼTAL ABAL I YAJCHIKNÁL?

Michelle: Nének Sofía. In lej kulbél kom tu elál.

Sofía: Nanáʼ jayej, in kulbél tu tsuʼuw junilekʼij.

Michelle: Tam ti kʼaʼál tu tsaʼbiy u t’ilmáts abal jantʼoj in atsʼál a Dios tam in tsuʼtal abal i yájchiknal.a Ani tatáʼ tin uchaʼ abal biyálits a leʼ ka exlaʼ axéʼ ani más kom tsʼojbéj a mamá. Ani, ¿jantʼiniʼ tin atsʼál xóʼ a mamá?

Sofía: Junchikíl yaʼul, pero xoʼ kʼwajat alwaʼ.

Michelle: In kulbél ku atsʼaʼ abal kʼwajat alwaʼ. Chubax wálab lej kʼibat a atsʼál

Sofía: Aníts tam junchikíl u tsálpayal jaykʼiʼ neʼets ki jilaʼ ki yajchiknaʼ.

Michelle: Yab kidhab ka tsálpay antsanáʼ. Wálab a tʼilál abal tam ti kʼaʼál tu tsaʼbiy i jilaʼ axéʼ xi konowixtaláb: ¿Jaleʼ tin jilál a Dios ka wa’tsin i yajchiktaláb max in kwaʼal an tsapláb abal kin talabédhaʼ?

Sofía: Aníts u tʼilál.

Michelle: Okʼxidh ki tsuʼuw jawaʼ in ulal an Biblia u léʼ abal ki tʼilaʼ jawaʼ i exóbnaʼ tam ti kʼaʼál tu tsaʼbiy.

Sofía: Alwa’.

Michelle: Abal ki tujuw ki tʼilaʼ abal an Biblia in olnál tin kwéntaj jun i inik axi in konówiy a Dios jaleʼ tin jilál ki yajchiknaʼ bélits antsanáʼ yab kʼwiyan kʼal a Dios.

Sofía: Aníts. Nixéʼ yabak u exlál.

Michelle: Jayej i tsu’uw abal a Dios in lej yajnál tam in tsu’tal abal i yájchiknal. An Biblia in ulal abal tam ti in bichówil in yájchiknaʼ «a Dios in ats’a’ yajchik».b Chubax tu kanatbedhál ki exla’ abal a Dios jayej in yajchiknál jawa’ i watʼál.

Sofía: Aníts.

Michelle: Tatá’ jayej tin ucha’ abal a belál abal jun a kʼicháj a Dios ne’ets kin talabédhaʼ patal an yajchiktaláb.

Sofía: Játs jawa’ yab u éxbayal, ¿jale’ ti yab in talabedhálits an yajchiktaláb max in ejtowal kin t’aja’?

¿JITA’ IN ULAL AN CHUBAXTALÁB?

Michelle: Abal ki exbay, ki tsu’uw jawa’ in ula an libro ti Génesis a exlál tin kwéntaj an waliláb axi yab kwa’alak kin k’apuw a Adán ani a Eva.

Sofía: Aníts in exóbchin ban catesismo. Uchan k’al a Dios abal yab kin k’apuw nixé’ xi waliláb, pero yabchik in belka’.

Michelle: Aníts. Pero wanaj ki tsu’uw jant’oj wat’ey ok’xidh ka jek’ombéj, kom axé’ ne’ets tu ku wilk’anchij jale’ ti yajchiknál. ¿A le’ ka ajiy jawa’ in ulal Génesis capitulo 3 an versículos 1 ma ti 5?

Sofía: Aníts in ulal: «Tam, k’al patal an ko’nélchik axi a Dios in ts’ejkámal an tsan in tejwamédha’ abal más tsalpadh ani in ucha’ an mimláb: ‹¿chubax abal ti uchámalchik a Dios abal yab a ejtowal ka k’apuw jawákits tam waliláb axi ka lé’na’?› Tok’tsin an uxum: ‹Patal an waliláb axi waʼats i ejtowal ki k’apuw. Pero in walil an te’ axi k’wajat ts’ejel ban jardín a Dios tu uchámal: «Yab kwa’alchik ka k’apuw nibal ka taka’ max ka t’aja’ ne’ets kit tsemets»›. Tam an tsan in tókʼtsiy an uxum: ‹yabchik ne’ets kit tsemets, kom a Dios in exlál abal tam tatá’chik ka k’apuw axé’ xi waliláb ne’ets ka japk’in a wal ani ne’ets ka bajuwchik ejtíl a Dios. Ani ne’ets ka exla’ jawa’ alwa’ ani jawa’ yab alwa’›».

Michelle: Ki exóbna’ axé’chik xi pejach. Ok’ox, in ulal abal a Eva tawnáj k’al jun i tsan. Al k’e’at i pejach in ulal abal a Satanás in éyendha’ jun i tsanc abal ka káwin k’al a Eva. ¿Jant’oj uchanchik k’al a Dios abal ne’etsak kin wat’aʼ max kin k’apuw nixe’ xi waliláb?

Sofía: Abal ne’etsakchik ka tsemets.

Michelle: Chubax. Talbél a Satanás in jólbiy a Dios. Ka tsu’uw jawa’ in uluw: «Yabchik ne’ets kit tsemets». K’wajatak in ulal abal a Dios pel jun i janamkáw.

Sofía: Nixé’ yabak in olchinének.

Michelle: Ani kom a Satanás in uluw abal a Dios pel jun i janamkáw. K’al axé’ xi jolbixtaláb axi in t’aja’ a Satanás in t’ajál ki konówiy ti ba’, ¿jita’ in ulal an chubaxtaláb? ¿Tata’ a exlál jita’ in ulal an chubaxtaláb?

Sofía: Mmm... Yab u exlál.

Michelle: Ki tsálpay k’al axé’. Jun a kʼicháj in che’el tu tsaʼbiy ani tu uchál abal nana’ u kwa’al más i tsapláb. ¿Jant’ini’ ne’ets ti kin tejwamédhanchij abal yab chubax jawa’ u ulal?

Sofía: Walám kwa’al ki tejwamédha’ jita’ más tsapik.

Michelle: Aníts. Walám i ejtowal ki dhaya’ jant’oj alchik ani ki tsu’uw jita in éjtowal kin dhaya’. Nixé’ chubax ne’ets kin tejwamédha’ jita’ más tsapik.

Sofía: Aníts.

Michelle: Pero max tu jólbiy abal tatá’ ets’ey it janamkáw, walám ne’ets ka yéjenchij i k’ij abal ka tejwamédhaʼ jita’ in ulal an chubaxtaláb.

Sofía: Komʼíj.

Michelle: Axéʼ yab i éjtowal ki tejwamédhaʼ dhubatk’ij.

Sofía: Chubax jawa a ulal.

Michelle: ¿Yab aníts abal ne’ets ka yéjenchij i k’ij abal axi k’e’atchik kin tsu’uw abal a ulal an chubaxtaláb?

Sofía: Aníts ne’ets kin yéjenchij i k’ij.

Michelle: Ki tsu’uw junílekʼij jawa’ in ulal Génesis. ¿In uluw an Diablo abal jajá’ in kwa’al más i tsapláb kej a Dios?

Sofía: Imbáj.

Michelle: Abal a Dios yab k’ibatak kin tejwamédhaʼ abal jajá’ más tsapik. Jawa’ a Satanás in uluw pel abal a Dios pel jun i janamkáw. Ejtíl max k’wajatak in uchal a Eva: «A Dios k’wajat ti k’ambiyal ani naná’ k’wajat tu uchál an chubaxtaláb».

Sofía: Kʼwajatits u éxbayal.

Michelle: A Dios lej tsalpadh. Ani in exlálak abal kwa’alak kin jila’ i k’ij abal axi k’e’atchik kin tsu’uw jita’ in ulal an chubaxtaláb.

JUN I LEJ EXBADH KONOWIXTALÁB.

Sofía: Pero, ¿yab in tejwamédha’ jita’ in ulal an chubaxtaláb tam ti tsemets a Eva?

Michelle: Aníts pero a Satanás in uluw k’e’at i janamtaláb. Ki tsu’uw juníl jawa’ in ulal an pejach 5. ¿Jant’oj más uchan a Eva k’al an Diablo?

Sofía: Abal max kin k’apuw an waliláb ne’ets ka japk’in in wal.

Michelle: Aníts ani uchan abal max «kin k’apuw an waliláb ne’ets kin bajuw ejtíl a Dios ani ne’ets kin exla’ jawa’ alwa’ ani jawa’ yab alwa’». K’al axé’ xi kaw’ k’wajatak in jólbiyal a Dios abal in k’anchal an atiklábchik jawa’ alwa’.

Sofía:Ah.

Michelle: Ani k’al axé’ jayej k’wajat in jólbiyal a Dios.

Sofía: ¿Jale’ ta ulal antsaná’? Yab u éxbayal.

Michelle: Kom a Satanás k’wajatak in uchál a Eva ani jayej patal wawa’ abal ne’ets ku k’wajiy más alwa’ max a Dios yab tu ku ábatna’. A Jehová in exlálak abal ne’etsak kin yéjenchij i k’ij abal a Satanás kin tejwamédha’ max chubax jawa’ in ulal. Jaxtám in jila’ abal a Satanás kin ábatna’ an tsabál al wéʼ i k’ij. Jaxtám xowéʼ ta kʼicháj wa’ats yan i yajchiktaláb. Kom jita’ in abatnál axé’ xi xe’tsintaláb pel an Diablo ani yab a Dios.d Pero u lé’ tu pidha’ i alwa’ ólchixtaláb.

Sofía: ¿I alwa’ olchixtaláb?

Michelle: Aníts, an Biblia tu ólchal jant’oj lej alwa’ tin kwéntaj a Dios in ulal abal a Jehová k’wajat utat k’al wawa’ tam i yájchiknal. I elál jun i t’iplab ban Salmo 31:7 Axé’ in dhucha’ an ts’ale’ David jajá’ in lej yájchikna’, pero ka t’aja’ ti kwéntaj jawa’ in ucha’ a Dios. ¿A le’ ka ajiy tata’ jawa’ in ulal?

Sofía: Aníts in ulal: «ne’ets ku ats’a’ lej kulbél kom tata’ tin k’anidhál, kom tata’ a t’ajál ti kwéntaj abal k’wajat u yajchiknál, tata’ a exlál abal lej yájlidh u ichích».

Michelle: Bélits abal a David in léj yájchikna’, u kanatbédhabak kin exla abal u tsu’tabak k’al a Dios jawa’ k’wajatak in watʼál. Ani tatá’, ¿ti kanatbedhál ka exla’ abal a Jehová in éxbayal jawa’ k’wajat a watʼál, bélits abal an atiklábchik yab in éxbayal jawa’ a ats’ál?

Sofía: Chubax tin lej tólmiyal.

Michelle: Jayej an Biblia in olnál abal a Dios lej we’its ne’ets kin tixk’a’ patal jawa’ in t’ajál ki yájchikna’. Jayej tu exóbchal abal we’its ne’ets ka talabedháj in eyaltal a Satanás ani patal an odhnaxtaláb axi in t’ajámal. Ma an kʼibataláb axi a tametnámal tatá’ ani a Mamá. ¿U ejtowal kin wichiy xi junakej an semana? U léʼ tu wilk’anchij jale’ ti lej belál abal lej we’its a Dios ne’ets kin tixk’a’ an yajchiktaláb.e

Sofía: U tsu’tal alwa’.