¿Jaykʼiʼ ti tujey ti ábatnom in Éyaltal a Dios? (tsabchíl pejach)

KI TSAB TSUʼUW JAWAʼ IN WÁCHIBNAʼ A NABUCODONOSOR

Julio: Nenek Ernesto, in kulbél tu tsuʼuw junilekʼij. In lej kulbél kin chich kʼal tataʼ patal an semana abal kin tʼilmats tin kwéntaj kʼal an Biblia.a ¿Jantʼiniʼ it kʼwajat?

Ernesto: In kʼwajat alwaʼ. Kʼakʼnamal.

Julio: ¡Lej alwaʼ! Tam tu tsaʼbiy u tʼilmats abal jaléʼ an Ólchixchik kʼal a Jehová in olnál abal in Éyaltal a Dios tujey ti ábatnom ti 1914.b I tsuʼuw abal an capitulo 4 kʼal a Daniel tu tólmiyal abal jaléʼ tu ulel ki tsalpay antsanaʼ. ¿A tʼilál jawaʼ játs?

Ernesto: Aníts, an wáchib axi in koʼoy an tsʼalej Nabucodonosor.

Julio: Antsanáʼ játs. Jajáʼ in wáchibnaʼ jun i pulik teʼ axi u ulelak ti eb. Ti   wáchib in atsʼaʼ abal jun i angel in uluw abal ka kotoyat an teʼ. Jilkʼon jun i pejach i teʼ ani jayej in ibíl. Talbél ti watʼey «buk i kʼij» puwey junilekʼij an teʼ.c Jayej i tsuʼuw abal an kʼej kaw putun tsabíl. ¿A tʼilál jawaʼ játs an kʼaʼal?

Ernesto: Játs jawaʼ in wataʼ a Nabucodonosor, ¿yab aníts? Olman ani kʼwajiy antsanáʼ buk i támub.

Julio: Aníts. Olman ani in koʼoy kin jilaʼ kin tajaʼ ti tsʼalej. Tsabchíl jantʼiniʼ ti putun an kʼej kaw pel tam ti tʼokʼbayat in Éyaltal a Dios al buk i kʼij. Nixeʼ xi támub tujey tam ti Jerusalén odhnaʼ ti támub 607 okʼxidh ka chich a Jesucristo. Ma tam ti tam yabáts waʼtsinenek ni jun i eyal axi kin abatnaʼ tin bij a Jehová, tam ti taʼpan nixeʼ xi kʼij in bijiy jun i tsʼalej pero xoweʼ tiwaʼ ti eb. Antsanaʼ tam ka putun an buk i kʼij neʼetsak kin tujchij ti ábatnom in Éyaltal a Dios tiwaʼ ti eb. Tam xoweʼ i exóbnaʼits jaykʼij ti tujey ka ajiyat an buk i kʼij. Xoweʼ kwaʼal ki tsuʼuw jay owey abal ki exlaʼ jaykʼij ti tujey ti ábatnom in Eyaltal a Dios. ¿Kʼwajat a éxbayal?

Ernesto: Aníts, in kʼwájat u tʼilál jawaʼ i exobnámal.

Julio: Ki tsuʼuw tam jay owey an buk i kʼij. Nanaʼ okʼxidh u koʼoy ku exóbnaʼ abal yab ku ukʼchiy ni jantoj. Neʼets ku tsápnanchij ku wilkʼaj jantʼiniʼ tatáʼ más ka exbay.

Ernesto: Alwaʼ.

TALEL AN BUK I KʼIJ, U TUJÉL IN TALTAL AXÉ XI XEʼTSINTALÁB

Julio: Kʼaʼal jantʼiniʼ ti putun pel kʼal a Nabucodonosor, an buk i kʼij pel buk i támub. Tsabchíl jantʼiniʼ ti putun, pel kʼal in Éyaltal a Dios, ani owey mas i kʼij.

Ernesto: ¿Ani jantʼiniʼ ta exlál?

Julio: An buk i kʼij tujey al an támub 607 okʼchidh kʼal a Cristo, tam ti a Jerusalén kʼalej talabedhach. Max ki ajiy al nixeʼ xi támub buk i támub, neʼets ku ulits ban támub 600 okʼchidh kʼal a Cristo ani al nixeʼ xi támub yab watʼey ni jantʼoj axi kwaʼal kin tsuʼuw kʼal in Éyaltal a Dios. Jayej jantʼiniʼ i tsuʼumalits, tam ti a Jesús chich ti tsabál yan i támub talbél, in uluw abal an buk i kʼij yabayej u talel.

Ernesto: Aníts, u tʼilaʼits.

Julio: Jaxtám abal ki exbay, buk i kʼij yab pel buk i támub. Pel jun i kʼij axi más u owel.

Ernesto: ¿Más u owel? ¿jay i kʼij?

Julio: i libro kʼal a Apocalipsis, waʼats jun i kʼej axi kwaʼal kin tsuʼuw kʼal jawaʼ in uluw a Daniel. Neʼets tu tólmiy abal ki exlaʼ jay owey an buk i kʼij. An kʼej kaw in ulal abal ox i támub kʼal tsʼejel pel 1.260d a kʼicháj ani buk i kʼij pel tsabíl in yanem 2.520 a kʼicháj. ¿Ma tejeʼ kʼwajat a exbayal?

Ernesto: Aníts, pero yabayej u exbayal jaleʼchik tatáʼ a belal abal in Éyaltal a Dios tujey ti támub1914.

Julio: Alwaʼ xoweʼ neʼets ki exóbnaʼ. Al junchij i kʼej kaw jun i kʼicháj pel jun i támub.e 2520 a kʼicháj pel 2520 i támub. Max ki ajiy 2520 i támub ma ti 607 okʼxidh ka waʼtsin a Cristo neʼets ku ulíts ti 1914.f Jaxtám i éjtowal ki uluw nixeʼ xi támub taley an buk i kʼij ani a Jesús kʼalej bijidh jantʼiniʼ i tsʼalej tin Éyaltal a Dios. Jaye ti 1914 tujey ti putnal jawaʼ an Biblia in ulumal abal neʼets ka watʼey tin taltal a kʼicháj.

Ernesto: ¿A éjtowal ka punuw jun i tʼipláb?

Julio: Ti Mateo 24:7, a Jesús in kʼej uluw jantʼoj neʼets ka watʼey tam kin tujchij ti ábatnom tiwaʼ ti eb: «I pulik bichowlom neʼets ka pejexin kʼal i pulik bichowlom ani an tsʼalechik neʼets ka tomolnaxin, neʼets ka waʼatsin yan i jayíl júʼtamkʼij neʼets ka tʼelelats an tsabál». Ka tʼajaʼ ti kwéntaj a Jesús in uluw abal neʼets ka waʼtsin i jayíl ani júʼtamkʼij neʼets ka tʼelelats an tsabál. ¿Yab játs nixeʼ jawaʼ kʼwajat ti watʼel xoweʼ ta kʼicháj tin puwél an tsabál?

Ernesto: Aníts, lej chubax.

Julio: A Jesús jayeJ in uluw abal neʼetsak ka waʼtsin i pejextaláb. Ani ti libro kʼal a Apocalipsis abal yab expidh neʼets ka waʼtsin i pejextaláb ti kwenchal, neʼets ka waʼatsin i pejextaláb al an pulik bichowchik ti puwél an tsabál.g ¿A tʼilál jaykʼij ti tujey an kʼaʼal pulik pejextaláb?

Ernesto: i 1914. Játs an támub tam tataʼchik a ulal abal a Jesús in tujchiy ti eyal. Xowéʼ u éxbayits abal tsablom u júmbinal.

Julio: Antsanáʼ jats. Tam i exobnal tsablom an kʼej kaw kʼal an buk i kʼij ani axi tin taltal axe xi xeʼtsintalab u jilkʼonal lej tajax. An ólchixchik kʼal a Jehová i lej belál abal ti 1914 a Jesús in tujchij ti eyal ani ma nixeʼ a kʼicháj kʼwajatits tu kʼwajíl tin taltal an xeʼtsintaláb.h

Ernesto: In kʼwajat u tsapnanchal ku exbay patal axéʼ.

Julio: Tu exbayal. Nanáʼ jayej u tsuʼuw kʼibat tam ti kaʼal in exobchin. U aychal abal jawaʼ i exobnamal ti tólmiy bélits abal an Biblia yab in ulal an támub 1914. An Ólchixchik kʼal a Jehová i kwaʼal jaleʼ ti lej belál abal a Jesús in tujchiy ti eyal al nixeʼ xi támub. Ernesto, ¿a tʼajaʼ ti kwéntaj abal patal jawaʼ i exobnámal kʼwajat ban Biblia?

Ernesto: Aníts, nixeʼ játs axi etsʼey u jikʼpal. Tatáʼ tin exobchal patal kʼal an Biblia. Jawaʼkits tam konowixtaláb nanaʼ ku tʼajaʼ, tataʼ yab jaykʼij a ulal «nanaʼ u belal» o «nanaʼ u tsalpayal». Etsʼey a eyendhál an Biblia. Tam, ¿jaleʼ ti lej kʼibat ki exbay? ¿jaleʼ ti yab in uluw a Dios abal a Jesús neʼetsak ti tsʼalej ti 1914?

Julio: Pel jun i alwaʼ konowixtaláb, Ernesto. Waʼats yan i exobintaláb ti Biblia axi yab neʼets ki exbay dhubatkʼij. ¿jaleʼ tin tʼajaʼ a Dios antsanaʼ? ¿jaleʼ ti kwaʼal ki lej tsápnanchij abal ki exbay? ¿a leʼ ki exobnaʼ nixéʼ kʼeʼat a kʼicháj?

Ernesto: Aníts, neʼets tu aychij.