TEMA DE PORTADA | NE’ETS KA LEJ K’IJÍDHNA’ KA AJIY AN BIBLIA
¿Jant’oj i éjtowal ki t’aja’ abal ki k’ijídhna’ ki ajiy an Biblia?
Kwa’al ki tsalpay jant’oj i éjtowal ki t’aja’ abal ki k’ijídhna’ ki ajiy an Biblia. Ki tsu’uw jant’oj i éjtowal ki t’aja’.
Ka takuy jun i Biblia axi ka éxbanchij. Max ka takuy jun i Biblia axi in kwa’al yan i kaw axi lej k’ibat ka exbay, yab ne’ets ka k’ijídhna’ tit ajum. Jaxtám ka aliy jun i Biblia axi yab k’ibat ka éxbanchij, abal jawa’ ka ajiy ka ulits ta ichích. Jayej kwa’al ka takuy jun i Biblia axi yab jalchámej an tsálapchik.a
Ka eyendha’ jawa’ ít kalnek. Xowé’ ta k’icháj, an Biblia yabáts expidh a éjtowal ka ko’oy ti uw, jayej a éjtowal ka ko’oy ta pat’alil, a éjtowal ka ajiy ti Internet, ka pa’ba’ ban computadora, ban tableta o ban teléfono. Al talchik i biblias, in chi’dhál abal ka ni’chij ani ne’ets ka kalej k’e’at i versículos o k’e’at i biblias, ani in kwa’al i audio max expidh a lé’ ka ats’a’. Talchik in kulbetnál kin ats’a’ tam ne’ets ban autobús abal tin t’ojlábil, tam k’wajat ti pak’ul o tam k’wajat in t’ajál k’e’at jant’oj. ¿Jawa’ játs axi a lé’ ka eyendha’ tatá’? ¿A éjtowal ka tsápnanchij ka eyendha’?
Ka aliy más i olchixtaláb. Max ka eyendha’ k’e’at i tolmixtaláb abal ka ajiy an Biblia, ne’ets ka kulbétna’ más. Wa’ats i mapas axi ne’ets ti tólmiy abal ka exla’ ju’táj ti wat’ey jawa’ k’wajat a ajiyal ani jayej ne’ets ti tólmiy abal ka tsalpay jant’ini’ ti wat’ey. An artículos axi k’wajat al axé’ xi revista ani an pejach axi in bij «Exobchixtaláb axi kaldhach ti biblia» axi ti jw.org, ne’ets ti tólmiy abal ka exbay yan i t’ilab axi ti Biblia.
Yab expidh ka ajiy jun i t’ilab. Max a ats’ál k’ibat ka ajiy patal an Biblia ma tin tujtal, ka takuy jun i pejach axi más a kulbetnál. Max a lé’ ka exóbna’ tin kwéntaj jun i atikláb axi lej exladh ti Biblia, a éjtowal ka ajiy expidh tin kwéntaj jajá’. An recuadro «Ka exóbna’ más tin kwéntaj i atiklábchik axi ti Biblia» ne’ets ti lej tólmiy. A éjtowal ka takuy an tema axi más ka kulbétna’, ani játs ka ajiy. O jayej a éjtowal ka ajiy tin áy, abal ka exbay jant’ini’ ti k’alej ti wat’el. ¿A éjtowal ka tujchij ka eyendha’ jun k’al axé’, abal ka k’ijídhna’ ka ajiy más an Biblia?
a Yan i atikláb in kulbetnál kin ajiy an Traducción del Nuevo Mundo, kom in t’ajámalchik ti kwéntaj abal yab jalchámej i tsalap, yab in kwa’al i kaw axi k’ibat ani yab k’ibat ka ajiy. Axé’ xi Biblia in ts’ejkál an ólchixchik k’al a Jehová ani k’wajat al 130 i kawintaláb. A éjtowal ka pa’ba’ ti jw.org o ka pa’ba’ an aplicación JW Library. O max a lé’ ti uw, an ólchixchik k’al a Jehová in éjtowal ti nenchij jun ta k’ima’.