Jantʼiniʼ ki eyendhaʼ an tratados abal ku tujey tu tʼilom kʼal an atiklábchik

Ti enero ti 2018, an Tolmixtaláb abal ti exóbal tujey in kaldhál ban kʼaʼál página talchik i tsalap abal ku tʼilmáts ban olnomtaláb. U olchinenek abal lej alwaʼ ki exóbnaʼ ki tʼilmay an atiklábchik ani yab expidh ki jilchij an publicaciones. An videos in kʼál an pejach «Tsalap abal ku tʼilmáts» tu lej tolmiyámal ki exlaʼ jantʼiniʼ ki eyendhaʼ expidh an Biblia abal ku tujey tu tʼilom kʼal an atiklábchik. ¿Walám pél abal yabáts ki eyendhaʼ nibal jún i publicación? Imbáj. An tratados lej alwaʼ abal ku tujey tu tʼilom kʼal an atiklábchik. I ejtowal ki eyendhaʼ antsanáʼ:

1. Ki tʼajchij an konowixtaláb axi kʼwajat ban portada ani ki jilaʼ abal kin takuy jún i tokʼtsixtaláb.

2. Ki ólchij an texto axi kʼwajat ban tsabchíl página ma walkʼiʼ. I ejtowal ki ajiy ani ki exóbnaʼ kʼal an atikláb an tratado, max jajáʼ jolat.

3. Ki pidhaʼ an tratado ani ki uchaʼ abal in ejtowal kin talabedhaʼ kin ajiy tam ka jolkʼan.

4. Okʼxidh ku kʼalej, ki tejwamédhanchij an konowixtaláb axi kʼwajat ban pejach «Ka konówiy ta baʼ» ani ki uchaʼ abal i ejtowal ki tókʼtsiy pil a kʼicháj.

Tam ku wichiy, ki tokʼtsinchij an konowixtaláb ani ki jilchij kʼeʼat i konowixtaláb abal tam ku wichiy. I ejtowal ki aliy jún i konowixtaláb ban página ti Internet o al an publicación axi in olnál an tratado tin taltal an página. Tam ki tsalpay abal in tomnalits ki eyendhaʼ jún i publicación, i ejtowal ki ólchij an folleto Jawaʼ a Dios tu ólchal lej alwaʼ o jawakits tam kʼeʼat i publicación axi i eyendhál abal ki bínaʼ i exobintaláb kʼal an Biblia.