EXOBINTALÁB 22
I exobchixtaláb abal ku kʼwajiy alwaʼ ti ejatal
«A Jehová játs axi tu pidhál i tsalpadhtaláb» (PROV. 2:6).
AJATLÁB 89 Jehová bendice al que escucha y obedece
JAWAʼ NEʼETS KI EXÓBNAʼa
1. ¿Jaleʼ i yéjenchal patal i tsalpadhtaláb? (Proverbios 4:7)
¿A YEJENCHÁMAL ka takuy jantʼoj exbadh xowéykʼij? Walám a konchij a Jehová i tsalpadhtaláb abal ka exlaʼ jantʼoj ka tʼajaʼ (Sant. 1:5). An tsʼalej Salomón in dhuchaʼ abal lej exbadh «ki koʼoy i tsalpadhtaláb» (ka ajiy Proverbios 4:7). A Salomón kʼwajatak ti kaw tejéʼ tin kwéntaj an tsalpadhtaláb axi in binál a Jehová (Prov. 2:6). Pero, ¿walám in éjtowal tu ku pidhaʼ i tsalpadhtaláb a Jehová abal ki támetnaʼ an kʼibataláb axi i kwaʼal xowéʼ? Aníts, ani al axéʼ xi exobintaláb neʼets ki tsuʼuw.
2. ¿Jantʼoj neʼets tu ku tólmiy abal ki koʼoy i tsalpadhtaláb?
2 Jantʼoj axi neʼets tu ku lej tólmiy ki koʼoy i tsalpadhtaláb játs ki exóbnaʼ ani ki eyendhaʼ ti ejatal an exobchixtaláb axi in bínaʼ tsab i inik axi ti biyál. Okʼox neʼets ku kawin tin kwéntaj a Salomón. An Biblia in ulal abal a Dios in pidhaʼ a Salomón yan i tsalpadhtaláb ani in tólmiy abal kin exbay yan jantʼoj (1 Rey. 4:29). Talbél, neʼets ku kawin tin kwéntaj a Jesús, jajáʼ játs an inik axi más tsalpadh axi kʼwajinek ban Tsabál (Mat. 12:42). Jun i kʼej kaw in uluw axéʼ tin kwéntaj a Jesús: «Neʼets ka pidhan i tʼokat tsapláb kʼal a Jehová, neʼets kin koʼoy yan i tsalpadhtaláb ani kin exbay yan jantʼoj» (Is. 11:2).
3. ¿Jantʼoj neʼets ki exóbnaʼ?
3 Kom a Salomón ani a Jesús pidhan i tsalpadhtaláb kʼal a Jehová, jajáʼchik in ejtow kin bínaʼ yan i exobchixtaláb axi u lej eynal abal wawáʼ. Al axéʼ xi exobintaláb neʼets ki tsuʼuw jantʼoj in tomnál ki tsalpay tin kwéntaj an tumín, an tʼojláb ani tin kwéntaj wawáʼ.
¿JANTʼOJ IN TOMNÁL KI TSALPAY TIN KWÉNTAJ AN TUMÍN?
4. ¿Jantʼiniʼ tu kʼwajílak a Salomón ani a Jesús?
4 A Salomón lej tumínladhak ani in kwaʼalak lej yan i kʼaláb (1 Rey. 10:7, 14, 15). Pero a Jesús yab in kwaʼalak yan jantʼoj, nibal in kwetém kʼimáʼ (Mat. 8:20). Bélits antsanáʼ a Salomón ani a Jesús u tsálpaxak tekedh tin kwéntaj an tumín kom tin tsablóm u pídhnalak i tsalpadhtaláb kʼal a Jehová.
5. ¿Jantʼoj in tsálpayalak a Salomón tin kwéntaj an tumín?
5 A Salomón in tʼajaʼ ti kwéntaj abal an tumín tu tólmiyal (Ecl. 7:12). An tumín tu tólmiyal abal ki watʼaʼ a kʼicháj ani jayej abal ki tsʼaʼiy jantʼoj axi i kulbetnál. Pero bélits abal a Salomón in kwaʼalak yan i tumín, in tʼajaʼ ti kwéntaj abal waʼatsak kʼeʼat jantʼoj axi in kwaʼal más in jalbíl. Jun i tʼiplab, jajáʼ in dhuchaʼ: «Más alwaʼ ku exláj jantʼiniʼ i atikláb axi in tʼajál jawaʼ tekedh ani yab expidh kom u tumínladh» (Prov. 22:1; nota). Jayej in tʼajaʼ ti kwéntaj abal an atikláb axi tumínladh yab etsʼey in atsʼal kulbél kʼal jawaʼ in kwaʼalits (Ecl. 5:10, 12). Jayej in uluw abal lej kʼakʼadh ki belaʼ abal expidh an tumín in éjtowal tu ku tólmiy, kom bélits max i kwaʼal yan, jun dhúbatkʼij i éjtowal ki kʼibaʼ (Prov. 23:4, 5).
¿Kʼwajat tin tʼokʼbayal u kʼalábil, abal ku tʼojonchij más a Jehová? (Ka tsuʼuw an párrafos 6 ani 7)d.
6. ¿Jantʼoj in tsálpayalak a Jesús tin kwéntaj an kʼaláb? (Mateo 6:31-33).
6 A Jesús u tsálpaxak tekedh tin kwéntaj an tumín. Junchikíl u kʼapulak alwaʼ ani in utsʼálak i utsʼnél (Luc. 19:2, 6, 7). Ejtíl, an kʼaʼál labidh tʼajbiláb axi in tʼajaʼ pel kin wenkʼoj an jáʼ ti vino (Juan 2:10, 11). Jayej, tam ti tsemets in kaykimak jun in kotón axi lej jálbidh (Juan 19:23, 24). Pero a Jesús yab expidh in tsálpayalak kʼal patal jawaʼ in éjtowal kin koʼoy. Jajáʼ in uluw abal yab i éjtowal ki kʼakʼnaʼ tsab jantʼoj, yab i éjtowal ki kʼanidhaʼ a Dios ani jayej an tumín (Mat. 6:24). A Jesús in uluw abal max ki tʼojonchij a Jehová, Jajáʼ neʼets tu ku pidhaʼ jawaʼ i yéjenchal (ka ajiy Mateo 6:31-33).
7. ¿Jantʼoj tam lablixtaláb in batsʼumal jun i epchal kom in tsálpayal tekedh tin kwéntaj an tumín?
7 Yan i epchal in batsʼumal yan i alwataláb kʼal jawaʼ a Jehová tu exóbchal tin kwéntaj an tumín. Ki tsuʼuw in tʼiplabil in kʼal jun i epchal axi in bij Daniel. Jajá in ulal: «Tam tin tsákamej u takuy abal neʼetsak ku tʼojonchij expidh a Jehová». Kom a Daniel in tsapnanchámal ka kʼwajiy kulbél kʼal jawaʼ in kwaʼal, in ejtowámal ka tólmixin juʼtáj u watʼel i yajchiktaláb ani ti Betel. Jayej in ulal: «Yab in tʼeʼpinal kʼal jawaʼ u takuy ku tʼajaʼ. Max u aliyamálak jun i alwaʼ tʼojláb, walám neʼets ku ataʼ yan i tumín pero yabak neʼets ku koʼoy u jaʼúb axi xowéʼ u kwaʼal. U atsʼál in lej kulbél kom u takuy ku tʼojonchij a Jehová ani yab expidh tin atlom. An lablixtaláb axi a Jehová tin pidhámal yab u éjtowal ku tsʼaʼiy kʼal i tumín». Tam, max ki eyendhaʼ i ejatal abal ki tʼojonchij a Jehová ani yab abal tu atlom neʼets ki atsʼáʼ lej kulbél.
¿JANTʼOJ IN TOMNÁL KI TSALPAY TIN KWÉNTAJ AN TʼOJLÁB?
8. ¿Jaleʼ ti exlál abal a Salomón u tsálpaxak tekedh tin kwéntaj an tʼojláb? (Eclesiastés 5:18, 19).
8 A Salomón in uluw abal lej alwaʼ ku kulbéj kʼal jun i tʼojláb, kom pel jantʼiniʼ jun i tsʼejwalixtaláb axi tu pidhál a Jehová (ka ajiy Eclesiastés 5:18, 19). Jayej in uluw abal jawakits tam tʼojláb in binál i alwataláb (Prov. 14:23). Ani játs in tʼajaʼ ti kwéntaj jajáʼ kom lej tʼojon. In tsʼejkaʼ yan i atáj, in tʼayaʼ yan jantʼoj, in tsʼejkaʼ i jardines axi lej pakʼdhaʼ ani ma i bíchowchik (1 Rey. 9:19; Ecl. 2:4-6). Tʼojon lej tsapik ani walám in atsʼaʼ lej kulbél. Pero in exlálak abal in yéjenchalak jantʼoj más. In tʼajaʼ yan jantʼoj abal a Jehová. Ejtíl, in tsʼejkanchij jun i templo lej alabél, axéʼ xi tʼojláb owey buk i támub (1 Rey. 6:38; 9:1). Talbél tin tʼajámal yan i tʼojláb, in tʼajaʼ ti kwéntaj abal jawaʼ más exbadh játs kin tʼojonchij a Jehová. Jajáʼ in dhuchaʼ: «Jawaʼ más exbadh játs axéʼ: Ka tʼojonchij a Jehová ani ka belkaʼ» (Ecl. 12:13).
9. ¿Jantʼoj in tʼajaʼ a Jesús abal yab ka atáj kʼal an tʼojláb?
9 A Jesús in lej kulbetnálak ti tʼojnal. Tam ti tsákamej in tólmiyalak in papá ti dhakúm téʼ (Mar. 6:3). Walám in tátajchik in atsʼálak lej kulbél kom a Jesús u tólmixak abal kin ataʼchik i tumín. Kom a Jesús yabák wálbidh, patal jawaʼ in tʼajálak u kalelak alwaʼ. Walám waʼatsak yan kʼal jitaʼ tu tsʼaychinal jawaʼ in tsʼejkál. I tsálpayal abal a Jesús in lej kulbetnálak in tʼojlabil. Pero yab in jilálak abal kʼal in tʼojlabil ka tʼokʼbanchat kin tʼojonchij a Jehová (Juan 7:15). Tam ti xeʼetsak ti ólnom in ólchalak an atikláb abal yabchik ka lej tʼeʼpin kʼal jawaʼ in yéjenchal. In exóbchalak abal ka tʼeʼpin kin tʼojonchij a Jehová abal ka kʼwajiychik abal etsʼey (Juan 6:27). Ani ban Sermón del Monte in uluw abal más alwaʼ ki lubaʼ ki koʼoy i kʼaláb tiwaʼ ti éb (Mat. 6:20).
¿Jantʼoj i éjtowal ki tʼajaʼ abal ku tsálpaxin tekedh tin kwéntaj an tʼojláb ani ki aynanchij ki tʼojonchij a Jehová? (Ka tsuʼuw an párrafos 10 ani 11)e.
10. ¿Jantʼoj i éjtowal ki watʼaʼ max i lej kulbetnál i tʼojlabil?
10 An tsalpadhtaláb axi tu pidhál a Jehová tu tólmiyal ki koʼoy jun i tsalap axi tekedh tin kwéntaj an tʼojláb. An Biblia tu olchál abal kwaʼal ku tʼojon tsapik ani ki tʼajaʼ jun i alwaʼ tʼojláb (Efes. 4:28). Walám ti tʼojlabil u uchnének abal u lej ikʼax ani abal i tʼajál lej alwaʼ i tʼojlabil. Nixéʼ in éjtowal kin tʼajaʼ abal ki léʼnaʼ ku tʼojon más abal ki kulbédhaʼ axi tu tʼojondhál ani antsanáʼ ka kawin alwaʼ tin kwéntaj an epchalchik. Pero max ki tʼajaʼ antsanáʼ, i éjtowal kʼayúm kʼayúm ki jilaʼ ki tʼojonchij a Jehová jantʼiniʼ ti biyál ani yabáts ki béletnaʼ alwaʼ i yanél. Max játs i watʼamal, kwaʼal ki tʼajaʼ jantʼoj.
11. ¿Jantʼoj in exóbnaʼ a William kʼal in tʼiplábil jun i ókʼnom?
11 Jun i epchal axi in bij William in exóbnaʼ abal lej exbadh ku tsálpaxin tekedh tin kwéntaj an tʼojláb. Jajaʼ tʼojon kʼal jun i epchal axi pelak i ókʼnom ti tamkuntaláb. A William in uluw axéʼ tin kwéntaj an epchal: «In tsápnanchal yab kin pidhaʼ lej watʼadh yan in exbádh an tʼojláb. Lej ikʼax ani u tʼojnal lej alwaʼ, jaxtám u lej aliyáb. Pero tam ka wakléts, yabáts u tʼeʼpinal kʼal an tʼojláb, expidh kin béletnaʼ in yanél ani kin tʼojonchij a Jehová. U tʼajámal ti kwéntaj abal u kʼwajíl lej kulbél».b
¿JANTʼOJ IN TOMNÁL KI TSALPAY TIN KWÉNTAJ WAWÁʼ?
12. ¿Jantʼiniʼ tu tsálpaxak a Salomón tam ti kʼaʼál, pero jantʼoj in watʼaʼ talbél?
12 Biyat a Salomón in tʼojonchij alwaʼ a Jehová, yab in kʼadhatnaʼ tin baʼ. Tam ti tsákamej in exbay abal yab in éjtowal kin tʼajaʼ jantʼoj tin kwetémtal ani in konchij a Jehová abal ka tólmiyat (1 Rey. 3:7-9). Tam ti tujey ti eyal in tʼajaʼ ti kwéntaj abal yab in tomnálak kin kʼadhatnaʼ tin baʼ. Jajáʼ in dhuchaʼ: «An kʼadhataláb játs axi in tʼajál abal jun ka ukʼpin ani kin yajchiknaʼ» (Prov. 16:18). Pero talbél in ukʼchij axéʼ xi kaw. In tujchiy kin kʼadhatnaʼ tin baʼ ani yabáts in belkaʼ a Jehová. Jun i tʼiplab, yab in belkaʼ axéʼ xi abatnaxtaláb axi in binámal a Jehová: «An tsʼalej yab kwaʼal kin koʼoy yan in kʼimádhil abal yab ka owméj kʼal a Jehová» (Deut. 17:17). A Salomón in koʼoy 700 in kʼimádhil ani 300 in uxumil ani yan kʼal axéʼ xi mimláb in kʼakʼnálak kʼeʼat i dioses (1 Rey. 11:1-3). Walám in tsalpay abal yab jantʼoj neʼetsak ka watʼey. Pero kʼayúm kʼayúm, owméj kʼal a Jehová ani in yajchiknaʼ (1 Rey. 11:9-13).
13. ¿Jantʼoj i exobnál kom a Jesús in koʼoy yan i tsaʼataláb?
13 A Jesús etsʼey in koʼoy i tsaʼataláb ani yab in kʼadhatnaʼ tin baʼ. Okʼxidh ka chích ti Tsabál in tʼajaʼ yan i tʼojláb lej alabél ti éb. Colosenses 1:16 in ulal abal a Jesús tólmixin abal ka tsʼejkáj patal jawaʼ waʼats ti éb ani ti Tsabál. Tam ti pujan in ejtow kin tʼilaʼ patal jawaʼ in tʼajámal ti éb kʼal a Jehová (Mat. 3:16; Juan 17:5). Pero yab jaykʼiʼ tin kʼadhatnaʼ tin baʼ kom lej tʼojnének, ani yab jaykʼiʼ tin uluw abal jajáʼ más exbadh. Jajáʼ in uchaʼ in aykolil abal yab chích ti Tsabál abal ka tʼojonchat, chích abal ka tólmixin ani kin bínaʼ in ejatal abal ka kʼaniyat an atiklábchik (Mat. 20:28). Jayej in uluw abal expidh in tʼajálak jawaʼ abnének kʼal in Tátaj ti éb (Juan 5:19). A Jesús in koʼoy yan i tsaʼataláb, ¿yab ánits abal i léʼ ki nitsʼbiy?
14. Kʼal jawaʼ in uluw a Jesús, ¿jantʼoj yab in tomnál ki tsalpay tin kwéntaj wawáʼ?
14 A Jesús jayej in tólmiy in aykolil kin exbay abal in kwaʼalchik yan in jalbíl. Jun a kʼicháj, in exóbchij abal kʼal a Dios u koʼoncháb ajidh patal in xiʼíl (Mat. 10:30). Axéʼ xi kaw tu lej kanatbedhál max i tsálpayal abal yab jantʼoj i jalbíl. Tu exóbchal abal a Jehová tu lej tʼajál ti kwéntaj ani i kwaʼal yan i jalbíl. A Jehová tu utumal tin bichówil ani tu uchámal abal i éjtowal ku kʼwajiy abal etsʼey ban Ít Tsabál, ¿walám in tomnál ki uchaʼ abal yab tekedh jawaʼ in tsálpayal tu ku pidhaʼ?
¿Jantʼoj tam alwataláb walám yab neʼets ki batsʼuw, max expidh ki tsalpay ti kwetémtal? (Ka tsuʼuw an párrafo 15)f.
15. a) ¿Jantʼoj in uluw An Ólchix Uw abal in tómnál ki tsalpay tin kwéntaj wawáʼ? b) Antsanáʼ jantʼiniʼ tejwaʼ ban página 24, ¿jantʼoj yab neʼets ki tʼajaʼ max expidh ki tsalpay ti kwetémtal?
15 In tʼajál 15 i támub, An Ólchix Uw tu tólmiy ki koʼoy jun i tsalap tekedh tin kwéntaj wawáʼ. In uluw: «Yab i léʼ ki kʼadhatnaʼ ti baʼ ani ki tsalpay abal wawáʼ más u exbadh. Pero jayej yab i léʼ ki tsalpay abal yab jantʼoj i jalbíl. Kwaʼal ku tsálpaxin tekedh tin kwéntaj wawáʼ ani jaxtám kwaʼal ki exlaʼ jawaʼ i éjtowal ki tʼajaʼ ani jawaʼ yab i éjtowal ki tʼajaʼ». Jun i epchal mimláb in uluw axéʼ: «Yab u éjtowal ku tʼajaʼ patal alwaʼ, pero jayej yab in lej pójkax. Antsanáʼ jantʼiniʼ axi más an atikláb, u tsápnanchal ku tʼajaʼ jawaʼ alwaʼ, pero junchikíl in ukʼpinal».c ¿I tʼajál ti kwéntaj abal i yéjenchal ku tsálpaxin tekedh tin kwéntaj wawáʼ?
16. ¿Jaleʼ tu exóbchal a Jehová?
16 A Jehová in eyendhál an Biblia abal tu ku exóbchij yan jantʼoj. In tʼajál antsanáʼ kom tu kʼanidhál ani in léʼ abal ku kʼwajiy kulbél (Is. 48:17, 18). Jawaʼ i éjtowal ki tʼajaʼ abal chubax ki atsʼaʼ u kulbél játs ki tʼojonchij expidh a Jehová. Max ki tʼajaʼ antsanáʼ yab neʼets ki yajchiknaʼ, ejtíl an atiklábchik axi in pidhál lej watʼadh yan in jalbíl an tumín, an tʼojláb o axi expidh in tsálpayal tin kwetémtal. Jaxtám, ki tʼajaʼ jawaʼ tekedh ani ki kulbédhanchij in ichích a Jehová (Prov. 23:15).
AJATLÁB 94 Agradecidos por la Palabra de Dios
a A Jehová in tólmiy a Salomón ani Jesús abal kin koʼoychik yan i tsalpadhtaláb. Jajáʼchik in bínaʼ i exobchixtaláb abal tu ku tólmiy ki exbay jantʼoj in tomnál ki tsalpay tin kwéntaj an tumín, an tʼojláb ani tin kwéntaj wawáʼ. Neʼets ki tsuʼuw jantʼoj i éjtowal ki exóbnaʼ tin kwéntaj nixéʼchik xi exobchixtaláb axi in bínaʼ, ani jantʼiniʼ in eyendhámal tin ejatal talchik i epchal.
b Ka tsuʼuw an artículo «Cómo disfrutar del trabajo duro», axi kʼwajat al An Ólchix Uw axi ti 1 a febrero ti 2015.
c Ka tsuʼuw an artículo «La Biblia nos ayuda a sentirnos satisfechos», axi kʼwajat al An Ólchix Uw axi ti 1 a agosto ti 2005.
d JAWAʼ U TEJWAMÉL BAN IMÁGENES. A Juan ani a Tomás pel tsab i ólchix kʼal a Jehová. A Juan expidh in tsálpayal kin béletnaʼ an carro, pero a Tomás in eyendhál in carro abal kin néʼdhaʼ an epchalchik ban olnomtaláb ani ti tamkuntaláb.
e JAWAʼ U TEJWAMÉL BAN IMÁGENES. A Juan kʼwajat ti tʼojnal ma wákal kom in léʼ kin kulbédhaʼ kʼal jitaʼ tu tʼojondháb. Tam u uchnal ka tʼojon más, a Juan in tʼajál. A Tomás pel i tólmix ókʼnom ani nixéʼ xi wákal in junál jun i okʼnom abal kin tsaʼbiy jun i epchal. Kʼal axi tu tʼojondháb, in exlálits abal talchik i wákal u kalel más kʼíjilej kom kʼwajat in tʼojonchal más a Jehová.
f JAWAʼ U TEJWAMÉL BAN IMÁGENES. A Juan expidh in tsálpayal kʼal jajáʼ, pero a Tomás kʼwajat ti tólmix abal ka tsʼejkáj jun i atáj tamkuntaláb ani in exlámal más in jaʼúb.